ටෝනි රොබට්ස් යනු ඉංග්රීසි පිටපත් රචකයායි.
රොබට් බාස් යනු නිකම්ම නිකං බාස් කෙනෙකි.
රොබට් බාස් මිටියක් ගෙන ඇණයකට ගසන්නේ පුදුමාකාර බයකිනි.
ඔහු ඇණයට ගසන්නේ ද ඇණයට රිදේවිදැයි යන ආකාරයටය.
රොබට් බාස් බයෙන් ඇණයට තලන්නේ ටෝනි රොබට්ස් නිසාය.
මිටියෙන් ඇණයට තලන ශබ්දය මඳක් හෝ උස්ව ඇසුණොත් ටෝනි රොබට්ස් කෑගසයි.
ටෝනි රොබට්ස්, රොබට් බාස්ට බනින්නේ බල්ලා, බූරුවා, හරකා ආදී සත්තු වත්තේ ඇති නැති සියලු සිව්පාවුන්ගේ නම් ඈඳා ගනිමිනි.
ඒ ශබ්දය නිසා තමන්ට හරියට කොපි චෙක් කරන්න බැරි බව පවසා ටෝනි වීසි කරන ආර්ට් වර්ක් පාවි යන්නේ රොකට් මෙනි.
ටෝනි රොබට්ස් ගේත්, රොබට් බාස් ගේත් මේ ආරවුලට හේතුව කවුරුවත් දන්නේ නැත.
ඒ වගත් මෙසේය.
දිනක් දුරකථන ඇමතුමක් පැමිණියේය.
" මිස්ටර් රොබට් ප්ලීස් ..." යනුවෙන් එහා කෙළවරින් තොදොල් වොයිස් එකක් ගලා ආවේය.
" යර්ස් ස්පීකිං..." කියා මෙහා පැත්තේ සිට උත්තර බැන්දේ ටෝනි රොබට්ස් ය.
ඇමතුමින් කියවුණේ මිස්ටර් රොබට්ස්ට පසුවදා සවස 4.00 ට මයින්ඩ්ස් ආයතනයට පැමිණ කන්දප්පා මහතාව හමුවන ලෙසටයි.
පසුවදාට උදා විය.
දවල් 11 හේ සිට ටෝනි රොබට්ස් ලක ලැහැස්ති වේ.
කොණ්ඩය පීරයි.
ටයි පටිය තද කරයි.
බෙල්ට් එක සකස් කරයි.
ඊට අමතරව හමුවන සැමට හවස 4.00 කන්දප්පා මහතා තමාට පැමිණෙන ලෙස දැන්වූ පුවත සැල කරයි.
4.00 වැඩේට 3.15 ට විතර ටෝනි රොබට්ස් පිටත් විය.
එහෙත් 4.00 කලින් ඔහු ආපසු කාර්යාලයට පැමිණියේය.
ඇයි දැයි විමසූ විට " දැට් බාස්ටර්ඩ්...." යනුවෙන් රොබට් බාස්ට ලව දෙවක් නැතුව බනින්නට විය.
පසුව සොයා බැලූවිට හෙළි වූයේ කන්දප්පා මහතා එන්න කියා තිබුනේ ටෝනි රොබට්ස්ට නොව රොබට් බාස්ට බවයි.
එදා සිට ටෝනි රොබට්ස් මියයනතුරුම ඔහුට රොබට් බාස් පෙන්නන්න බැරි විය.
(ඇඩ්ඩා විසින් ලියන ලදි)
ඇඩ්වර්ටයිසිං ලෝකය වෙනත් ලිපි :
ඇඩ්වර්ටයිසිං ලෝකය (2) : ලබු ගුණේ
ඇඩ්වර්ටයිසිං ලෝකය (1) : කන්දප්පාට කුණුහරුප වරුසාවක්!