1200 x 80 DMirror

 
 

කම්කරුවන්ගේ වැඩ වර්ජන අයිතිය නීත්‍යානුකූලව අහෝසි කළ යුතු බවට අධිකරණ අමාත්‍යවරයා සිදු කළ අධිකාරවාදී ප්‍රකාශය ප්‍රජාතන්ත්‍රවාදයට

තර්ජනයක් ලෙස හෙලා දකින ජාතික කම්කරු උපදේශක සභාව නියෝජනය කරන වෘත්තීය සමිති නායකත්වය ජනතාවගෙන් සමාව ගන්නා ලෙස අධිකරණ අමාත්‍යවරයාගෙන් ඉල්ලා සිටි.

අධිකරණ ඇමැති අලි සබ්රි ජනවාරි  27 වැනි දින, විද්‍යුත් මාධ්‍යයක් සමග කළ සාකච්ඡාවකදී රට ඉදිරියට ගෙන යාමට විසඳුම් වශයෙන් යෝජනා කළේ මූලික සේවක අයිතිවාසිකම් අහෝසි කිරීමට ය.

"ඔහුගේ නිර්ලජ්ජී යෝජනාව වූයේ වරාය, තෙල් සංස්ථාව, විදුලිය, ජල සැපයුම් හා වෛද්‍ය ක්ෂේත්‍රවල වැඩ වර්ජන අයිතිය නීත්‍යානුකූලව අහෝසි කිරීමය. එය ව්‍යවස්ථාව මගින් අහෝසි කිරීම වඩා උචිත යැයි ඔහු කීවේය. පොලීසියට හා හමුදාවට ඒ අයිතිවාසිකම් නොමැති බැව් ඔහු කීවේ, ඔහුගේ යෝජනාවට හේතු වශයෙනි. "

එසේ නොකරන්නේ නම්, ඔහුගේ විකල්පය වුයේ  වර්ජනයක් ඇතිවිට එම අංශවල සේවය කිරීමට හැකි පුහුණුවක් හා නිපුණතාවක් ඇති ක්ෂණික විහිදුම් බලකායක් සූදානම් කර තබා ගැනීම ය.

මිනිසුන් අමාරුවේ දමමින් එළෙස වර්ජනය කිරීම අසාධාරණ යැයි කියූ ඔහු ඒවා පිටුපස කඩාකප්පල්කාරී කුමන්ත්‍රණ තිබිය හැකි යැයි ද සදහන් කළේය.



අමාත්‍යවරයා එසේ කුමන්ත්‍රණ ගැන පවසන ලද්දේ පසුගිය දිනවල වරාය, ඉන්ධන හා විදුලිබල මණ්ඩලය ආශ්‍රිතව ඇති වූ නොසන්සුන්කාරී තත්ත්වය ගැන සිහි තබා ගෙන විය හැකි බව පෙන්වා දෙන වෘත්තිය සමිති නායකයන් තව දුරටත් පවසන්නේ,  ජනතාව මෙවර බලාපොරොත්තු වූයේ වඩා ශක්තිමත් ජනාධිපතිවරයෙකු බවත් වත්මන් ජනාධිපති එනිසා මීට වඩා අධිකාරවාදී විය යුතු යැයිද ඔහු පැවසු බවයි.

පෙබරවාරි 1 වැනි  අගහරුවාදා නිවේදනයක් නිකුත් කරමින් වෘත්තිය සමිති නායකයන් අවධාරණය කර ඇත්තේ ආණ්ඩු පාලනයේ කිසිදු එල්ලයක් නොමැති විට, හරියාකාර සැළසුම් හා ඉලක්ක ඇතිව රාජ්‍ය සේවා පවත්වා ගෙන යාමට නොහැකි වනවිට, මතුවන ජාතික ආර්ථිකය හා ජන ජිවිතයට අදාල ගැටළු සඳහා සාධාරණ නිසි විසඳුම් ඉදිරිපත් කරන්නටද හැකියාවක් නොමැති විට, බලහත්කාර විධායකයක් සමගින් ආණ්ඩු ගැට ගසා ගැනීමට මාන බැලීම, අධිකරණ ඇමතිවරයාගේ අලුත් සොයා ගැනීමක් නොවන බව තමන් දන්නා බවයි.

 

එනමුත් ජනතාවගේ මූලික අයිතිවාසිකම් අහෝසි කරන, ප්‍රජාතන්ත්‍රවාදී සමාජ අවකාශ අහුරා දමන පාලනයක් වෙනුවෙන් නීති හැදීම මේ ආණ්ඩුවේ “සෞභාග්‍යයේ දැක්මට” ඇතුළත් නැති බවත් වෘත්තිය සමිති නායකයන් අධිකරණ ඇමැති සබ්රිට  මතක් කර දී තිබේ.

 

"වැඩ වර්ජනය කිරීමේ අයිතිය හා සාමුහිකව කේවල් කිරීමේ අයිතිය විශ්ව අයිතීන් ය. ඒවා සුරැකීමට  අපගේ ආණ්ඩුක්‍රම ව්‍යවස්ථාවෙන් පමණක් නොව, ජාත්‍යන්තර කම්කරු සංවිධානයේ අංක 87 හා 98 සම්මුතීන්ගෙන් සහ එක්සත් ජාතීන්ගේ මානව හිමිකම් ප්‍රකාශනයෙන්ද අපි රටක් වශයෙන් බැඳී සිටිමු. එවගේම මූලික අයීතීන් සහ ප්‍රජාතන්ත්‍රවාදී සමාජ අවකාශය ආරක්ෂා කිරීමට පියවර නොගැනීම හේතුවෙන් අහිමි කෙරුණු යුරෝපා “ජී.එස්.පී අධි සහන” නැවත 2017 දී අප ලබා ගනු ලැබුවේ ඒ සියල්ල ආරක්ෂාකර ශක්තිමත් කිරීමට යුරෝපා සංගමය හා ගිවිස ගැනීමෙනි."

ජාතික කම්කරු උපදේශක සභාව නියෝජනය කරන වෘත්තීය සමිති 11 ක් වෙනුවෙන් නිවේදනයට අත්සන් තබන නිදහස් වෙළඳ කළාප සහ පොදු සේවා සේවක සංගමයේ සම ලේකම් ඇන්ටන් මාකස් තව දුරටත් අවධාරණය කර ඇත්තේ අධිකරණ ඇමැතිවරයාගේ මෙම ප්‍රජාතන්ත්‍ර විරෝධී යෝජනා හුදෙක් රාජ්‍ය සේවාවන් පමණක් ඉලක්ක කෙරුණු යෝජනාවන් නොවන බවයි.

"රටේ ජනතාවගේ ජීවන ප්‍රශ්න විසඳීමේ හැකියාවක්, සැළසුමක් නොමැති විට සේවක අයිතිවාසිකම් අහෝසි කිරීම ආරම්භ කෙරෙන්නේ ඒවාට අදාල වන රාජ්‍ය සේවාවන්ට අදාලව ය. ඇමතිවරයා නම් කළ සේවා ක්ෂේත්‍ර ගත් විට එය ඉතාම හොඳින් පැහැදිලි වන්නකි. පෞද්ගලික අංශයේ සේවක සේවිකාවන්ට හා ජනතාවට ජීවත්වීමේ තම මූලික අයිතිය වෙනුවෙන් විසඳුම් ඉල්ලීමට බලකෙරෙන විට, සංවිධානයවීමේ හා ඉල්ලීම් ඉදිරිපත් කිරීමේ සාමුහික අයිතීන් අහෝසි කිරීමට ආණ්ඩුව පියවර ගැනීමේ මෙය ආරම්භයක් පමණක් වනු ඇත."

 

ඡන්දයෙන් පත් නොවුනු මන්ත්‍රීවරයෙකු ලෙස ජනතාවට වග නොකීවාට, ආණ්ඩුව පත්කරනු ලැබු පසු ආණ්ඩුවේ මුලික හා ප්‍රධාන වගකීම වන්නේ 69 ලක්ෂයක් වෙනුවෙන් තීන්දු ගැනීම නොව, මේ රටේ මිලියන 22 ක ජනතාවගේ ජීවත්වීමේ ගැටළු විසඳීමට  බව වැඩ කරන ජනතාවගේ වෘත්තිය සමිති නායකත්වය  ඇමැතිවරයාට මතක් කර සිටී.

 

"එනිසා දිනපතා පැයෙන් පැය බිඳ වැටෙන රටේ ආර්ථික හා සමාජීය පැවැත්ම වෙනුවෙන් වහා ජාතික සැළසුමක් ඉදිරිපත් නොකර, ඒ වෙනුවට ප්‍රජාන්ත්‍රවාදී සමාජයක සේවක අයිතිවාසිකම් අහෝසි කිරීමේ යෝජනා ඉදිරිපත් කිරීම වෙනුවෙන් ආත්ම ගරුත්වයක් තිබේ නම් ජනතාවගෙන් සමාව ගන්නා මෙන් අපි ඇමතිවරයාට කියමු."  

එමෙන්ම  ඇමැතිවරයාගේ නිර්ලජ්ජී යෝජනා වහා ඉල්ලා අස්කර ගන්නා මෙන් බල කිරීමේ එක්සත් ඉල්ලීමක් කිරීමට රාජ්‍ය හා පෞද්ගලික අංශයන්හි සියලු වෘත්තීය සමිති පොදු විරෝධයකට එකතු විය යුතු යැයි ද වෘත්තිය සමිති නායකයන් ඉල්ලා සිටි.

පහත සදහන් වෘත්තිය සමිති 11 ජාතික කම්කරු උපදේශක සභාව නියෝජනය කරයි.

ශ්‍රී ලංකා නිදහස් සේවක සංගමය, අන්තර් සමාගම් සේවක සංගමය, ලංකා වෙළඳ කාර්මික හා පොදු කම්කරු සංගමය, ලංකා වෘත්තීය සමිති සම්මේලනය, නැෂනල් යුනියන් ඔෆ් සී ෆෙයාරස් ශ්‍රී ලංකා, ලංකා වතු සේවා සංගමය, එක්සත් කම්කරු සම්මේලනය, ලංකා බැංකු සේවක සංගමය, ජාතික සේවක සංගමය, ලංකා ජාතික වතු කම්කරු සංගමය, නිදහස් වෙළඳ කළාප සහ පොදු සේවා සේවක සංගමය.

 Leader Whats app 

 

subscribeYT

subscribeYT

subscribeYT

WhatsApp Image 2021 09 13 at 13.49.58

නවතම පුවත්