1200 x 80 DMirror

 
 

යුද පීඩිත දෙමළ ජනයාගේ පාරම්පරික ඉඩම් අත්පත්කරගැනීමට ආණ්ඩුව ගන්නා අලුත්ම උපාය මාර්ගයට එරෙහිව  මුලතිව් වැසියන් විදි බැස තිබේ.



 මුලතිව් දිස්ත්‍රික්කයේ මුහුදුබඩපත්තුව ප්‍රාදේශීය ලේකම් කොට්ඨාශයට අයත් කෝකිලායි  වැසියන් පෙබරවාරි 12 වැනි සෙනසුරාදා විරෝධතා පවත්වමින් චෝදනා කළේ ඛනිජ වැලි ගොඩ දැමීමේ මුවාවෙන් ආණ්ඩුව තමන්ගේ පාරම්පරික ඉඩම් කොල්ලයකට සුදානම් වන බවයි.

පාරම්පරික දෙමළ වාසභූමි බලහත්කාරයෙන් අල්ලා ගන්නා පිණිස කටයුතු කරන බවට මේතාක් කල් හෙළිවී ඇති ආරක්ෂක හමුදා, වනජීවී දෙපාර්තමේන්තුව, වන සංරක්ෂණ දෙපාර්තමේන්තුව සහ පුරාවිද්‍යා දෙපාර්තමේන්තුව ආදී රාජයේ ආයතනවලට අලුතින්ම එක්ව සිටින්නේ විමල් වීරවංස අමාත්‍යවරයා යටතේ ඇති කර්මාන්ත අමාත්‍යාංශයයි.

කෝකිලායි රජයේ දෙමළ මිශ්‍ර පාසල ඉදිරිපිටින් විරෝධතා පෙළපාලිය  ආරම්භ කළ ඉඩම් අහිමිවිමේ අනතුරට මුහුණ පා සිටින ගම් වැසියන් මේ වන විටත් ඉඩම් අක්කර 44 ක් අත්පත් කර ගනිමින් ආණ්ඩුව  ඛනිජ වැලි ගොඩ ගසා තිබෙන මුහත්තුවාරම් දක්වා පැමිණ එහිදී ද විරෝධතාවය දක්වා තිබුනි.

 ''කර්මාන්ත අමාත්‍යාංශය. ලංකා මිනරල් සෑන්ඩ්ස් ලිමිටඩ්. කෝකිලායි '' යනුවෙන් සදහන් පුවරුවක් එම ස්ථානයට පිටු පසින් සවිකර තිබෙන අයුරු මාධ්‍යවේදීන්ගේ කැමරා කාචයට හසුව තිබේ.

 

විරෝධතාකරුවන් රජයේ බලධාරීන්ගෙන් ඉල්ලා සිටියේ මුලතිව් දිස්ත්‍රික්කයේ මුහුදුබඩපත්තුව ප්‍රාදේශීය ලේකම් කොට්ඨාශයට අයත් කෝකිලායි සිට නයාරු දක්වා වූ ගම්මානවල කිලෝමීටර් 12ක් දිග මුහුදු තීරයේ දෙමළ ජනයාට අයත් පාරම්පරික ඉඩම් අක්කර 1000ක් පමණ ඛනිජ වැලි කැණීම් නාමයෙන් පවරා ගැනීමට දරන උත්සාහය වහාම නතර කරන ලෙසයි.

 

කිසිදු දැනුම් දීමකින් තොරව මීට පෙර නැගෙනහිර කෝකිලායි ප්‍රදේශයේ පුද්ගලයන් 16 දෙනකුට අයත් පාරම්පරික භුක්ති විඳි ඉඩම් අක්කර 44 ක් පවරා ගෙන තිබුනේද ඉල්මනයිට් හෑරීමටයි.

 ප්‍රදේශවාසීන් පෙන්වා දෙන ආකරයට කෝකිලායි වරාය ආසන්නයේ දෙමළ ජනතාව පාරම්පරිකව විසු ඉඩම් හා වගා බිම් මිනින්දෝරු දෙපාර්තමේන්තුව මගින් මිණුම් කටයුතු සිදු කර ඇත්තේ පෙර දැනුම් දීමකින් තොරවයි.

''කෝකිලායි නැගෙනහිර තියෙන කුඹුරු වල අස්වනු නෙලන අතරේ කිසිම දැනුම් දීමක් නැතිව අක්කර 60 කට වැඩි ප්‍රමාණයක් මනිමින් ඉන්නවා. මේවාට අපිට අවශ්‍ය ලියකියවිලි තියෙනවා. දැන් ඛනිජ වැලි සංස්ථාව ඉල්මනයිට් හාරන්න මේ ඉඩම් පවරා ගන්නයි හදන්නේ,'' යැයි පාරම්පරික ඉඩම් හිමිකරුවෝ චෝදනා කරති.

 

තම ඉඩම් අහිමි වේ යැයි බියට පත් හිමිකරුවන් විසින් ඉඩම් මැනුම් කටයුතු ගැන  මිනින්දෝරුවන්ගෙන් විමසීමේදී ඔවුන් කියා ඇත්තේ ''ඉහලින් ආපු නියෝගයක්''බවත්, ''ඉඩම් ඔප්පු ඇත්නම්'' උසාවි යන ලෙසයි.

 

මෙම ඉඩම් අත්පත් කර ගැනීම යටතේ  කොක්කිලායි, මුහත්තුවාරම් මුහුදු වෙරළේ සිට මීටර් 500 කට වැඩි  දුරක් ගම් ඇතුලට මැනුම් කටයුතු කෙරේ.

 කෝකිලායි සිට කොක්කුතුඩුවායි, කර්නාට්ටිකේනි, නායාරු සහ නැගෙනහිර චෙන්මලේ දක්වා වෙරළ තීරය කිලෝ මීටර් 12 කට වැඩි දුරක් ඉදිරි දින කිහිපයේදී මැනුම් කටයුතු අවසන් කර පවරා ගැනීමට ඛණිජ වැලි සංස්ථාව අපේක්‍ෂා කරයි.

 මීට පෙර කෝකිලායි ප්‍රදේශයේ ඉඩම් මහවැලි එල් කලාපය යටතේ සිංහල ධීවරයන් පදිංචි කිරීමටත්, බෞද්ධ විහාර ඉදිකිරීමටත් වනජීවි, වන සංරක්ෂණ දෙපාර්තමේන්තු අනුග්‍රහයෙන් රජයේ හමුදාවන් විසින් බලහත්කාරයෙන් අත්පත් කර ගත් බව පවසන ප්‍රදේශවාසී ඉඩම් හිමිකරුවෝ මෙවර තමන් පාරම්පරිකව බුක්ති විඳි ඉඩම් ඛනිජ වැලි සංස්ථාව මගින් අත්පත් කර ගනීවි යැයි බියෙන් පසුවෙති.

 තම පාරම්පරික ඉඩම් ආරක්ෂා කරගැනීම වෙනුවෙන් දෙමළ ජනතාව පැවැත්වු විරෝධතාවය සදහා ආගමික නායකයන්ගේ මෙන්ම  ප්‍රදේශයේ දේශපාලනඥයන්ගේ සහායද ලැබී තිබේ.

සිවිල් ඇදුමින් සැරසී සිටි රජයේ ආරක්ෂක අංශ නිලධාරීන් විසින් විරෝධතා කරුවන්ගේ ඡායාරූප ද ලබා ගත් බව පළාත් බද මාධ්‍යවේදීහු වැඩි දුරටත් සදහන් කරති.




IMG 5978IMG 5996IMG 5985 


 

Leader Whats app

 

 

 

subscribeYT

subscribeYT

WhatsApp Image 2021 09 13 at 13.49.58