ආර්ථික අර්බුදයෙන් බරපතල ලෙස ඉහල ගොස් ඇති බඩු මිලට සහන ලෙස රජයේ සේවකයන්ට රුපියල් 5000ක් ගෙවද්දී වතු කම්කරුවන්ට ලැබෙන්නේ
තිරිඟු පිටි සොච්චමක් බවට කඳුකරයේ දෙමළ පක්ෂ නායකයෙක් ආණ්ඩුවට චෝදනා එල්ල කර තිබේ.
''ආණ්ඩුව රජයේ සේවකයන්ට, විශ්‍රාමිකයන්ට රුපියල් 5000 ක දීමනාවක් ගෙවනවා. ඒත් වතු කම්කරුවන්ට දෙන්නේ රුපියල් 40 ක් තිරිඟු පිටි සොච්චමක්. මේක වතු කම්කරුවන්ට කරන ලොකු අසාධාරණයක්. ඒක අපේ ජනතාව කොන් කිරීමේ ක්‍රියාවක්,''යැයි කම්කරු ජාතික සංගමයේ සභාපති, නුවරඑළිය දිස්ත්‍රික් පාර්ලිමේන්තු මන්ත්‍රී පලනි දිගම්බරම් පවසයි.
රටේ පවතින තත්වය ගැන වතු කම්කරුවන් දැනුවත් කිරීම සඳහා සති අන්තයේදී පතන සංස්කෘතික ශාලාවේ පැවති ජනහමුවක් අමතමින් පාර්ලිමේන්තු මන්ත්‍රී දිගම්බරම් එබව සඳහන් කළේය.
''රටේ පවතින ආර්ථික අර්බුදය හේතුවෙන් භාණ්ඩ මිල උපරිමයට ඇවිත්. ඒකෙන් වතු කම්කරුවන් දැඩි ලෙස පීඩාවට පත් කර තිබෙනවා,''යි පෙන්වා දෙන කම්කරු ජාතික සංගමයේ සභාපතිවරයා, කඳුකරයේ ප්‍රධානතම වෘත්තීය සමිතිය හා දේශපාලන පක්‍ෂය රාජපක්‍ෂ ආණ්ඩුවේ හවුල්කාර පාර්ශවයක් වන ලංකා කම්කරු කොංග්‍රසය දැඩි ලෙස විවේචනය ලක් කරයි.
ඔහු පවසන පරිදි යහපාලන රජය වතුකරය වෙනුවෙන් “සෑහෙන වැඩ” කර ඇත.
''ඒ අය අවුරුදු 50ක් දේශපාලනය කරනවා. නමුත් යහපාලන ආණ්ඩුවේ අවුරුදු හතරහමාර තුළ තමයි උඩරට වෙනස් වුණේ. ගම් හැදුවා. ඉඩම් ඔප්පු නිකුත් කළා. ඒවගේ සෑහෙන වැඩ කළා. ඔවුන් අපේ ජනතාව රවටා පාවා දෙනවා. අපි වෘත්තීය සමිති ක්‍රියාමාර්ගයක් කරොත් ඔවුන්ගේ කම්කරුවන් වැඩට යවනවා. මෙවැනි පාවාදෙන්නන්ට ඉදිරියේදී ජනතාව පිළිතුරු දෙනු ඇතැයි'' ඔහු පවසයි.
''වෙනසක් ඇති කළ හැක්කේ වතුකරයේ ජනතාවගේ ජීවන රටාව දන්නා කෙනෙකුට පමණි. වතු කම්කරුවන්ට ඉඩම් ලබා දෙමින් වතුකරයේ අයිතිකරුවන් බවට පත් කිරීමේ අපේ අරමුණ අනිවාර්යයෙන්ම ඉටු කරනවා,''යැයි ද මන්ත්‍රීවරයා අපේක්‍ෂාව පළ කරයි.
කෙසේ වෙතත්, වසර වතු කම්කරුවන්ගේ දිනක වැටුප රු.1000 ක් කරන ලෙස වසර ගණනාවක් තිස්සේ අඛණ්ඩව කෙරුණු ඉල්ලීම පලනි දිගම්බරම් විසින් කදුරට නව ගම්මාන, යටිතල පහසුකම් හා ප්‍රජා සංවර්ධන අමාත්‍ය ධුර දරන ලද යහපාලන ආණ්ඩුවෙන්ද ඉටු කර නැත.
ජාතික කම්කරු සංගමයේ උප සභාපති නුවරඑළිය දිස්ත්‍රික් පාර්ලිමේන්තු මන්ත්‍රී එම් උදයකුමාර් ඇතුළු ප්‍රාදේශීය සභා මන්ත්‍රීවරුන්, පක්ෂ නායකයින් සහ තවත් පිරිසක් මෙම ජන හමුවට එක්වුහ.
