දිනෙන් දින බිඳ වැටෙන ආර්ථිකය හමුවේ ඉහල යන අත්‍යාවශ්‍ය භාණ්ඩ මිල පහත දමමින් ජනතාව මුහුණ පා සිටින ගැටලුවලට නිසි විසදුම් ලබා දෙන ලෙස
ආණ්ඩුවට බල කරමින් කඳුකර ජනතාව වීදි බැස තිබේ.
දෙමළ ප්‍රගතිශීලී පෙරමුණේ ඇරයුමෙන් හැටන් නගරයට ඊයේ [06] පස්වරුවේ රැස්වූ දහස් ගණන් කඳුකර දෙමළ ජනයා උද්ඝෝෂණය කරමින් ආණ්ඩුවට බලපෑම් කළේ ඉන්ධන හිඟය, අඛණ්ඩ විදුලිය ඇනහිටීම් සහ අත්‍යාවශ්‍ය භාණ්ඩ මිල ඉහළ යාම හා ආහාර හිඟය හේතුවෙන් තමන් බලවත් පිඩාවට පත්ව ඇති බැවින් ඊට කඩිනමින් විසදුම් ලබා දෙන ලෙසයි.
''වතු කම්කරුවන්ගේ දෛනික වැටුප රුපියල් දහස දක්වා වැඩි කරත් ඒක දෙන්නේ වතු සමාගම් කීපයක් විතරයි. දැන් බඩු වල ගණන් හැටියට රුපියල් දාහ නොවේ දෙදහාක් වත් ප්‍රමාණවත් නැහැ. රටේ ආර්ථිකයට විශාල සහායක් දෙන වතු කම්කරු ජනතාව අද ප්‍රශ්න රැසකට මැදිවෙලා ඔවුන්ගේ ළමුන්ට බොන්න කිරිපිටි ටිකක් දෙන්න විදිහක් නැහැ,''යි දෙමළ ජාතික සන්ධානයේ පාර්ලිමේන්තු මන්ත්‍රී ශානක්කියන් රාසමානික්කම් පවසයි.
ත්‍රස්ත පනත අහෝසි කරන ලෙස රාජපක්ෂ ආණ්ඩුවට බලකෙරෙන මහජන පෙත්සමට අත්සන් ලබා ගැනීමේ නුවරඑලිය නගරයේ පැවති අවස්ථාවට එක් වූ ශානක්කියන් හා එම් ඒ සුමන්තිරන් මන්ත්‍රීවරුන් ද හැටන් උද්ඝෝෂණයට පැමිණ සිටියා.
පරාජයට පත්ව ඇති රාජපක්ෂ ආණ්ඩුව දිනෙන් දින ජනතාවට අප්‍රසන්න වෙමින් ඇතැයි පවසන ශානක්කියන් මන්ත්‍රීවරයා අවධාරණය කළේ දෙමළ ජනයා විසින් ගෙදර යවන්නට කලින් ඔවුන්ට ජන්දය දුන් අයම මේ ආණ්ඩුව ගෙදර යවන බවයි.
''ඩීසල් තියෙනවාද පෙට්‍රෝල් තියෙනවද කිරිපිටි තියෙනවද දැන් සැපද''` අගමැති මහින්ද රාජපක්ෂ විපක්ෂයේ සිටියදී ප්‍රශ්න කළ අයුරු උපහාසයට ලක් කරමින් ශානක්කයන් මන්ත්‍රීවරයාද මෙහිදී ප්‍රශ්න කළේය.
කඳුකරයට ත්‍රස්ත පනත
''රැකියාවක් සොයාගෙන කොළඹට ගොස් උතුරු නැඟෙනහිර ජනයා සමඟ යාළුකම් ඇති කරගත් කඳුකර තරුණයන්ට එරෙහිව ත්‍රස්තවාදය වැළක්වීමේ පනත ක්‍රියාත්මක වුණා. ඒ නිසා බොහෝ දෙනෙකුගේ ජීවිත විනාශ වුණා,''යි නුවරඑළිය නගරයේ පැවති ත්‍රස්ත පනත අහෝසි කිරීමේ මහජන පෙත්සමට අත්සන් ලබා ගැනීමේ ව්‍යාපාරයට එක්වූ කම්කරු ජාතික සංගමයේ නියෝජ්‍ය නායක, පාර්ලිමේන්තු මන්ත්‍රී මයිල්වාගනම් උදයකුමාර් පවසයි.
එක්සත් ජාතීන්ගේ මානව හිමිකම් කවුන්සලය පවා ඉවත් කරන ලෙස නිර්දේශ කර ඇති රටට ශාපයක් වන මෙම ත්‍රස්ත පනත අහෝසි කලයුතු යැයි පවසන උදයකුමාර් පෙන්වා දුන්නේ මේ පනත යටතේ හුදු සැකයෙන් අත්අඩංගුවට ගත් අය පවා තවමත් නඩු විභාගයක් නොමැතිව වසර ගණනාවක් සිරගෙවල්වල කල් ගෙවන බවයි.
ත්‍රස්ත පනත අහෝසි කරන ලෙස ආණ්ඩුවට බලකරමින් මහජන පෙත්සමට අත්සන් ලබා ගැනීමේ ව්‍යාපාරය ඉකුත් පෙබරවාරියේ දී මුලතිව් මාධ්‍ය සමාජයෙන් ඇරඹිණි. යාපනය, කිලිනොච්චි, මන්නාරම, කොළඹ -කොටුව, මිගමුව, වවුනියාව, ත්‍රිකුණාමලය ඇතුළු ස්ථානයන්හි විශාල ජන සහභාගිත්වයක් ඇතිව පැවති අතර මෙම සති අන්තයේදී නුවරඑලියට අමතරව බණ්ඩාරවෙල, මාතලේ සහ මහනුවර ද පැවැත්විණි.
'අවුරුදු 40 ක් තිස්සේ දෙමළ ජනතාවට එරෙහිවත්, සමහර කාලවල දී සිංහල තරුණයන්ට එරෙහිවත් අද වන විට මුස්ලිම් ජනයාට එරෙහිවත් භාවිත කරන ත්‍රස්ත පනත අහෝසි කරන ලෙස ජාත්‍යන්තරවත්,රටේ ජනතාවගේත් ඉල්ලීම වී තිබෙනවා.'' යි මෙහිදී දෙමළ ජාතික සන්ධානයේ මාධ්‍ය ප්‍රකාශක, පාර්ලිමේන්තු මන්ත්‍රී එම්.ඒ.සුමන්තිරන් සඳහන් කළේය.
''රටේ ආර්ථික ප්‍රශ්න උත්සන්න වෙලා. ඊට විසදුම් නොමැති ආණ්ඩුව ජනතා උද්ඝෝෂණ මර්දනය කරන්න ලැහැස්ති වෙනවා.''
