දෙමළ ජාතික සන්ධානය සහ ජනාධිපතිවරයා අතර අද පැවැත්වීමට දින යොදාගෙන තිබුණු ඉහල පෙලේ හමුව තුන් වැනි වතාවටත් කල් දමා‌ තිබේ.



ජනාධිපතිවරයා සමග මාර්තු 15 වැනි අඟහරුවාදා පැවැත්විමට නියමිතව තිබු සාකච්ඡාව මාර්තු 25 වැනිදාට කල් තැබූ බව දෙමළ ජාතික සන්ධානයේ පාර්ලිමේන්තු මන්ත්‍රී ජනාධිපති නීතීඥ එම්.ඒ. සුමන්තිරන් ප්‍රකාශ කරයි.

නියමිත සාකච්ඡාව අවලංගු කිරීමට හේතු ජනාධිඅති කාර්යාංශයෙන් ප්‍රකාශයට පත් කර නැත.

ජනාධිපති ගෝඨාභය රාජපක්‍ෂ ජනාධිපති ධුරයට පත් වීමෙන් පසු අද වනතුරු නිල වශයෙන් මුණ ගැසී නැති දෙමළ ජාතික සන්ධානය සමඟ සාකච්ජා සඳහා මීට පෙර දෙවතාවක්ම කාල වේලාව වෙන්කර තිබුනද අවසන් මොහොතේ එම සාකච්ජා අවලංගු කෙරිණි.

''මාර්තු 15 වැනිදා ආර්.සම්බන්ධන් ප්‍රමුඛ දෙමළ ජාතික සන්ධානයේ මන්ත්‍රීවරුන් සමඟ සාකච්ජා කිරීමට ජනාධිපතිවරයා එකඟ වී තිබෙනවා. මේ සාකච්ජා ජනාධිපති ලේකම් කාර්යාලයේදී පැවැත්වෙන බවට දැනුම් දුන්නා,'' යැයි දෙමළ ජාතික සන්ධානයේ මාධ්‍ය ප්‍රකාශක, පාර්ලිමේන්තු මන්ත්‍රී එම්.ඒ.සුමන්තිරන් පසුගියදා සඳහන් කර තිබුනි.

 

මන්ත්‍රීවරයා පවසන ආකාරයට දෙවතාවක්ම අවසන් මොහොතේ අවලංගු කෙරුණු සාකච්ජා සඳහා ජනාධිපතිවරයා විසින් තුන් වැනි වතාවට දින නියම කර තිබුනේ දෙමළ ජාතික පාර්ලිමේන්තු මන්ත්‍රීවරුන් විසින් ජනාධිපති ලේකම් කාර්යාලය ඉදිරිපිට කළ උද්ඝෝෂණයෙන් අනතුරුවයි. 

 

ජාතික ප්‍රශ්නයට දේශපාලන විසදුමක් ලබා දීම, ආණ්ඩුව සම්පාදනය කරමින් සිටින නව ආණ්ඩුක්‍රම ව්‍යවස්ථාව හා උතුරු නැගෙනහිර පළාත් වලට අදාළ සංවර්ධන කටයුතු ගැන ජනාධිපතිවරයා සමග අද දිනයේ සාකච්ඡා කිරීමට දෙමළ ජාතික සන්ධානය බලාපොරොත්තු වී තිබුනි.


යුද පීඩිත දෙමළ ජනතාව සත්‍යය සහ යුක්තිය :


මෙම හමුව කල් දමා ඇත්තේ යුද පීඩිත දෙමළ ජනතාව සත්‍යය සහ යුක්තිය වෙනුවෙන් අඛණ්ඩව සිදු කරන ඉල්ලීමක් ප්‍රතික්ෂේප කිරීමට ආණ්ඩුව ගත් තීරණය කිරීමත් සමගය.

බලහත්කාරයෙන් අතුරුදහන් කරනු ලැබු තම නෑසියන්ට අත්වූ ඉරණම හෙළිකරන ලෙස දෙමළ මවුවරුන් දිගින් දිගටම කරන ඉල්ලීම නොතකා හරිමින් ඔවුන්ට රුපියල් ලක්ෂය බැගින් ගෙවා දැමීමට කැබිනට්ටුව තීරණය කළ බව ප්‍රකාශයට පත් කෙරුනේත් අද දිනය.

''අතුරුදහන් වූ තැනැත්තන් පිළිබඳ කාර්යාලය විසින් අනාවරණය කරගනු ලබන කරුණු මත රෙජිස්ට්‍රාර් ජනරාල් විසින් නිකුත් කරනු ලබන දක්නට නොමැති බවට වූ සහතිකයක් හිමි අතුරුදහන් වූවන්ගේ ළඟම ඥාතියාට පවුලේ පුනර්ජීවනය වෙනුවෙන් එක්වරක් පමණක් ගෙවනු ලබන රුපියල් 100,000 ක දීමනාවක් ගෙවනු පිණිස අධිකරාන අමාත්‍යතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී,'' යි කැබිනට් තීන්දු ප්‍රකාශයට පත් කරමින් ආණ්ඩුව පවසා තිබේ.

 

දෙමළ ජනයා බහුතරය වෙසෙන උතුරු නැගෙනහිර පළාත් වල ජනතාව සතු ඉඩම් ආණ්ඩුව විසින් බලහත්කාරයෙන් අත්පත් කර ගැනීම නතර කරන ලෙස දෙමළ ජාතික සන්ධාන නායක ආර්.සම්බන්ධන් ජනාධිපතිවරයාට ලියු ලිපියට වසර දෙකක් ගත වුවද තවත් එයට  පිළිතුරු ලැබී නැත.

 

උතුරු, නැගෙනහිර හා කොළඹ දෙමළ ජනතාවගේ පාර්ලිමේන්තු නියෝජිතයන් 15 දෙනකුට ආසන්න පිරිසක් ජනාධිපතිවරයා හමුවීමට පෙබරවාරි  24 වැනි බ්‍රහස්පතින්දා ගත් උත්සාහය අසාර්ථක වීමෙන් අනතුරුව ඔවුහු ජනාධිපති කාර්යාංශය ඉදිරිපිට විරෝධතාවක් ද  දියත් කර තිබුනි.

දෙමළ ජනතාවගේ දැවෙන ප්‍රශ්න පිළිබදව ඔවුන්ගේ නිල නියෝජිතයන් සමග සාකච්ඡා කිරීම මග හැර සිටීමෙන් ශ්‍රී ලංකාවේ රාජ්‍ය නායකයාට එදින  “සිංහල ‌බෞද්ධ ජනතාවගේ පමණක් ජනාධිපතිවරයා” ලෙස චෝදනා එල්ල විය.


''සිංහල, බෞද්ධ ජනතාවගේ විතරක් ජනාධිපති''


"පැහැදිලිවම ජනාධිපතිවරයා අද රටේ, ශ්‍රී ලංකාවේ සිංහල, බෞද්ධ ජනතාවගේ විතරක් ජනාධිපති මම කියන එක පැහැදිලිවම නැවත වරක් කියන්න උත්සාහ කරලා තියනවා," යි ඉලංකෙයි තමිල් අරසු කච්චි (ITAK) මඩකලපු දිස්ත්‍රික් පාර්ලිමේන්තු මන්ත්‍රී ෂානක්කියන් රාජපුත්තිරන් රාසමාණික්කම් එදින අගනගරයේ  මාධ්‍ය වේදීන් හා කියා තිබුනි.

මන්ත්‍රීවරුන් පිරිස “ජනාධිපතිවරයා කාර්යාලයේ නොමැති අවස්ථාවක” දෙමළ ජනතාවගේ ප්‍රශ්න ඉදිරිපත් කිරීමට පැමිණීම “කුමන්ත්‍රණයක්” ලෙසින් ජනාධිපති මාධ්‍ය ඒකකය විසින් හෙලා දැක තිබුණි.



සබැඳි පුවත් :


ආණ්ඩුවේ 'ඉත්තන් වීමට' ජනපති හමු නොවන ලෙස TNA ට ඉල්ලීමක්

මෝඩි එන්න ලං වෙද්දී ජනපතිට දෙමළ පක්ෂ සමග කතාවට සැරසෙයි

දෙමළ මන්ත්‍රීවරුන් මගහැරියේ 'සිංහල බෞද්ධ ජනතාවගේ පමණක් ජනාධිපති'


 

subscribeYT

WhatsApp Image 2021 09 13 at 13.49.58

නවතම පුවත්

ඇට මැස්සා