බඩු මිළ ඉහළ යාමෙන් 'අප්පච්චියේ අපට වෙච්ච දේ'

මාසික ආදායම රුපියල් හැත්තෑපන්දහසට අඩු පවුල් සදහා 2020 වසර මුලදී පැවැති මිලට අත්‍යවශ්‍ය ද්‍රව්‍ය ලබා දීමේ වැඩ පිළිවෙලක් සකස් කරන ලෙස වැඩ

කරන පංතිය නියෝජනය කරන වෘත්තිය සමිතියක් ජනාධිපතිවරයාගෙන් ඉල්ලා තිබේ.

මාර්තු 15 වැනිදා ජනාධිපති ගෝඨාභය රාජපක්ෂ වෙත ලිපියක් යොමු කරමින් 'නිදහස් වෙළෙඳ කලාප සහ පොදු සේවා සේවක සංගමය' පෙන්වා දී ඇත්තේ අත්‍යවශ්‍ය භාණ්ඩ මිල දරා ගත නොහැකි ලෙස ඉහළ යෑමෙන් පොදු ජනතාව දැඩි පීඩාවන්ට ලක්ව සිටින බවයි.

ජනාධිපති වෙත ලිඛිතව යොමු කළ ලිපියේ අඩංගු සාරංශගත කරුණු කිහිපයක් ඇතුලත් කරමින් "අප්පච්චියේ අපට වෙච්ච දේ " මැයෙන්  අත්පත්‍රිකාවක් මුද්‍රණය කර බෙදා හැරීමට කටයුතු කර තිබෙන වෘත්තිය සමිති නායක ඇන්ටන් මාකස් සම ලේකම් ධුරය  දරන නිදහස් වෙළඳ කලාප සහ පොදු සේවා සේවක සංගමය  එමගින් පෙන්වා දෙන්නේ, ඉන්ධන මිල  ඉහල යාම නිසා  ප්‍රවාහන ගාස්තු සමග සියලූ භාණ්ඩවල මිල සියයට 40 කින් හෝ ඊට වැඩි ප්‍රතිශතයකින් ඉහළ යා හැකි බවයි.

'' විදේශ විනිමය අහේනිය සමගවන මේ දරුණු ආර්ථික කඩා වැටීම පාලනයකර ගැනීමට ආණ්ඩුවට පැහැදිලි ප්‍රායෝගික සැළසුමක් තියෙන බවක් පේන්න නැහැ. ඒ නිසා ඉදිරියේදී ආහාර සහ ප්‍රධාන භාණ්ඩ මිල තවත් ඉහළ යයි. මේවායින් බරපතලම අසීරුතාවකට පත්ව ඉන්නේ පෞද්ගලික අංශයේ අපනයන නිෂ්පාදන හා වැවිලිකරයේ සේවක සේවිකාවන් සමග අවිධිමත් ආර්ථික ක්ෂේත‍්‍රයේ සහ ග්‍රාමීය සමාජයේ කෘෂි කම්කරුවන් සහ දෛනික ආදායම්ලාභී පිරිස්."


ප්‍රධාන යෝජනා තුනක්


එම තත්වයට මුහුණ දීම සදහා නිදහස් වෙළඳ කලාප සහ පොදු සේවා සේවක සංගමය ප්‍රධාන යෝජනා තුනක් ජනාධිපති වෙත ඉදිරිපත් කර තිබේ.

01. මේ වසර අවසන් වන තෙක් විදේශ විනිමය අර්බූදය තාවකාලිකව සමනය කර ගැනීමට සහ දීර්ඝ කාලීන වශයෙන් ඊට යෝජනා කෙරෙන ස්ථාවර විසඳුම් සවිස්තරාත්මකව රට හමුවේ තබන්න,

02. පෞද්ගලික අංශයේ වෘත්තීය සමිති විසින් ඉල්ලා සිටින වැටුප් වැඩිවීම් වලට අමතරව, පවුලේ මාසික ආදායම රුපියල් 75,000 ට අඩු සියලූ ගෘහයන්ට 2020 ජනවාරියේ පැවති මිලට ඉන්ධන, භූමිතෙල්, එල්.පී ගෑස්, පාන්, තිරිගු පිටි, සහල්, සීනි, පරිප්පු ප්‍රමාණවත් අයුරින් දෙසතියක් ඇතුළත සළාක ක්‍රමයකට අවම අවුරුද්දක කාලයකට ලබා දෙන්න,

03. ධීවර කාර්මිකයන්ට ධීවර බෝට්ටු සඳහා අවශ්‍ය ඉන්ධන ධීවර සමුපාකාර සමිති හරහා සහන මිලට ලබා දෙන්න,

දේශපාලනය කඩා පැනීමකින් තොරව එය ක්‍රියාත්මක කිරීම වෙනුවෙන් ද නිදහස් වෙළඳ කලාප සහ පොදු සේවා සේවක සංගමය ජනාධිපතිවරයාට සැලසුමක් ඉදිරිපත් කර තිබේ.

1. සෑම ග්‍රාම සේවා වසමකම රු.75,000 ට අඩු මාසික ආදායම්ලාභී පවුල් දෙසතියක් ඇතුළත හඳුනා ගැනීමට පියවර ගන්න,

2. මේ සුභසාධනයට ඇතුළුවන රජයේ හා පෞද්ගලික අංශයේ සේවක සේවිකාවන්ගෙන් ඔවුන්ගේ පෙබරවාරි මස වැටුප් ලේඛනයේ සහතික පිටපතක් ලබා ගන්න,

3. එම ප්‍රතිලාභි නාම ලේඛනය වහාම ග්‍රාම සේවා වසමෙහි ප්‍රසිද්ධ කරන්න,

4. එකී ගෘහිකයන්ට ඔවුන්ට පහසුවෙන් සළාකය ලබා ගත හැති ප්‍රාදේශීය ලේකම් කොට්ඨාශයේ සමූපාකාරයක්, සතොස හා ඉන්ධන හලක් නම්කර ඉල්ලා ගන්න,

5. ඔවුන්ට හඳුනා ගැනීමේ පත්‍රයක් නිකුත් කරන්න.

ජනතාවගේ දෛනික අවශ්‍යතා වෙනුවෙන් එලෙස සහනදායි මිලකට භාණ්ඩ සැපයීම පිළිබදව සවිස්තරාත්මක සැලසුමක් ඉදිරිපත් කිරීමට සුදානම් අතර ඒ පිළිබදව සාකච්ඡා කිරීමට නොපමාව අවස්ථාව ලබා  දෙන ලෙසත් ජ්‍යෙෂ්ඨ වෘත්තිය සමිති නායක ඇන්ටන් මාර්කස් ජනාධිපතිවරයාගෙන් ඉල්ලා තිබේ.