දෙමළ ජනයාගේ දේශපාලන ගැටළුවට 'දැනට ලැබී ඇති විසඳුම' වන 13 වැනි ව්‍යවස්ථා සංශෝධනය නව ආණ්ඩුක්‍රම ව්‍යවස්ථාවක් මගින් අහෝසි කිරීමට
සිංහල ආණ්ඩුව වෑයම් කරන බවට තමිල් ඊළාම් ජනතා විමුක්ති සංවිධානය අවධාරණය කර තිබේ.
''දේශපාලන විකල්පයක් නොමැති අවස්ථාවක සම්පුර්ණ නොවුනත් 13 වැනි ව්‍යවස්ථා සංශෝධනය ඉවත් කිරීමට අපට ඉඩ දෙන්න බැහැ. ඒ නිසා තමයි 13 සම්පුර්ණ කර ගැනීමට ටෙලෝ සංවිධානය ඇරඹි සටනට අපි එකතු වුනේ,''යැයි ප්ලොට් නායක, පාර්ලිමේන්තු මන්ත්‍රී ධර්මලිංගම් සිද්ධාර්ථන් පවසයි.
මාධ්‍ය වෙත අදහස් දක්වමින් ප්ලොට් නායකයා කියා සිටියේ කොටි සංවිධානය පළාත් සභාවලට එරෙහි වුවත් එක මුළුමනින්ම ඉවත් කිරීමට පියවර නොගත් බවයි.
''13 යටතේ ලැබුණු පළාත් සභා ක්‍රමය උතුරු නැගෙනහිර කාලයක්ම ක්‍රියාත්මක වුනේ නිලධාරින් හරහායි. කොටි සංවිධානයේ පාලනය තිබුණු ප්‍රදේශවල ඒවා සම්පුර්ණයෙන්ම අහෝසි කරන්න ඔවුන්ට හැකියාව තිබුනත් එහෙම කළේ නැහැ. ප්‍රයෝජනයට ගත්තා මිසක්.''
''සිංහල නායකයන් මිට විසදුමක් ලබා දෙනු ඇතැයි කොටින්ට විශ්වාසයක් තිබුනේ නැහැ.''
1985 භූතානයේ තිම්පු නුවර පැවති සාකච්ජා සඳහා සහභාගිවූ සිද්ධාර්ථන්, ප්ලොට් සංවිධානයේ නායක උමා මහේෂ්වරන්ගේ මරණයත් සමග එහි නායකත්වයට පත්විය.
ඉන්දීය හිතවාදියකු ලෙස සැලකෙන ඔහු රාජපක්‍ෂ ආණ්ඩුව ගෙන ගිය යුද්ධයට සහාය දුන් උතුරේ දේශපාලනඥයෙකි.
''පහුගිය යහපාලන සමයේ දෙමළ ජනයාගේ ප්‍රශ්නයට දේශපාලන විසදුමක් දෙන්න සිංහල නායකයන් යොමු වුනත්, එය සිදු වුනේ නැහැ. ඒ නිසා සිංහල ආණ්ඩු වලින් දෙමළ ජනතාවගේ ගැටළුවලට විසදුම් දෙයි කියා බලාපොරොත්තු වෙන්න බැහැ. ඒ නිසා තියෙන 13 වැනි ව්‍යවස්ථා සංශෝධනය නැති කරගෙන බැහැ,''යි සිද්ධාර්ථන් පවසයි.
''පෙඩරල් විසදුමක් ලැබෙන තුරු 13 අත් නොහැරිය යුතුයි'' ඔහු අවධාරණය කර සිටියි.
