ලංකා තේ මිලදී ගෙන වෙනත් ඇසුරුම් වල බහා නැවත අළෙවි කිරීමේ ජාත්‍යන්තර 'මාෆියාව'

සම්පුර්ණයෙන්ම නවතා දැමීමට පියවර ගත යුතු බවට යෝජනාවක් ඉදිරිපත්ව තිබේ.

''ලෝකයේ රටවල් 200 කට වඩා තේ පානය කරනවා. ඒ හැම රටක්ම ලෝකයේ හොඳම තේ හැටියට මිලදී ගන්නේ `සිලෝන් ටී`. එහෙත් ඇතැම් රටවල් අපෙන් තේ සල්ලි දීලා අරගෙන නැවත පැකට් කරලා විකුණලා ලොකු ලාභයක් ගන්නවා,'' යැයි ආණ්ඩු පක්‍ෂය නියෝජනය කරන බදුල්ල දිස්ත්‍රික් පාර්ලිමේන්තු මන්ත්‍රී ඒ. අරවින්ද කුමාර් පෙන්වා දෙයි.

ආණ්ඩුව වැටී සිටින අර්බුදයෙන් ගොඩ ඒම සඳහා සෙසු පක්‍ෂ වල අදහස් හා යෝජනා ලබා ගැනීමට ජනාධිපති ගෝඨාභය රාජපක්‍ෂ විසින් කැඳවා තිබු සර්ව පාක්ෂික සමුළුවට අදහස් ඉදිරිපත් කරමින් මන්ත්‍රීවරයා මේ බව සඳහන් කර තිබේ.



ඔහු පවසන්නේ මෙම 'මාෆියාව' සම්පුර්ණයෙන්ම අහෝසි කර දමා ලංකා තේ නිෂ්පාදන ලෝක වෙළඳ පොලට සෘජුවම අපනයනය කිරීම මගින් සැලකිය යුතු විදේශ විනිමයක් රටට ලබා ගත හැකි බවයි.



දෙමළ ප්‍රගතිශීලි පෙරමුණේ හවුල්කරුවකු වූ කඳුරට ජනතා පෙරමුණේ භාණ්ඩාගාරික ලෙස කටයුතු කරමින් සිටිය දී සමගි බලවේගය යටතේ පසුගිය මහ මැතිවරණයට බදුල්ල දිස්ත්‍රික්කයෙන් ඉදිරිපත්ව පාර්ලිමේන්තුවට තේරී පත්වූ අරවින්ද කුමාර් 20 වැනි ආණ්ඩු ක්‍රම ව්‍යවස්ථා සංශෝධනයට රාජපක්ෂ  ආණ්ඩුවට සහාය ලබා දීම නිසා ඔහු නියෝජනය කළ පක්‍ෂ වලින් නෙරපා හැරිණි.

ආණ්ඩුවේ හවුල්කාර පාර්ශවයක් වන ලංකා කම්කරු කොංග්‍රසය ඇතුළු කඳුකර දෙමළ ජනයා නියෝජනය කරන කිසිදු පක්‍ෂයක් ජනාධිපතිවරයා කැඳවූ සර්ව පාක්ෂික සමුළුවට සහභාගී නොවිණි.

කඳුකර දෙමළ නියෝජනයක් පෙන්නුම් කිරීමේ අරමුණින් ඊට එක්ව සිටී ආණ්ඩුවේ මන්ත්‍රී අරවින්ද කුමාර් ත්‍රස්තවාදය වැළක්වීමේ පනත යටතේ අත් අඩංගුවේ සිටින තරුණයන් පොදු සමාවක් යටතේ නිදහස් කිරීමට ආණ්ඩුවට යෝජනා කරයි.



''දීර්ඝ කාලයක් තිස්සේ ත්‍රස්ත පනත නිසා දෙමළ තරුණයන් හිර ගෙවල් වල දුක් විඳිනවා. මෙතන කොටස් දෙකක් ඉන්නවා. කට්ටියක් දේශපාලනය නිසා හිරකරලා ඉන්න දේශපාලන සිරකරුවන්. අනෙක් අය `ත්‍රස්තවාදී` ක්‍රියා වලට සැකකරලා හිර කරලා ඉන්නවා. ඔවුන් හැම දෙනාම අවුරුදු ගණන් හිරගෙවල් වල ලත වෙනවා. මේ අයට පොදු සමාවක් දීලා නිදහස් කරන්න ඕනෑ.''

 


රැකියා විරහිත තරුණ තරුණියන්ට ස්වයං රැකියා අවස්ථා උදා කර ගැනීමට සෑම පළාතකම වෘත්තීය පුහුණු මධ්‍යස්ථානයක් ඉදි කිරීමට ද ඔහු සර්ව පාක්ෂික සමුළුවට යෝජනා කරයි.

''වතු ප්‍රදේශ වල තේ කර්මාන්ත ශාලා ගොඩක් වැහිලා ගිහින් තියෙන්නේ.ඒවා පාවිච්චි කරලා පුද්ගලික අංශය හරහා වෘත්තීය පුහුණු මධ්‍යස්ථාන,තවත් කර්මාන්ත එහෙම ආරම්භ කරලා රැකියා අවස්ථා සළසන්න පුළුවන්.''

''කිරිපිටි ආනයනය කිරීම නවතලා, රටේ කිරි නිෂ්පාදනය වැඩි කරන්නත් වතු ආශ්‍රිතව වැඩ පිළිවෙලක් ක්‍රියාත්මක කරන්න පුළුවන්,''

 


The Leader TV අද වීඩියෝ
 
 
 
 
 
 
 
 
 
 

 

subscribeYT

WhatsApp Image 2021 09 13 at 13.49.58

නවතම පුවත්

ඇට මැස්සා