ආණ්ඩු පක්ෂයේ මන්ත්‍රීවරයකුගේ තර්ජනයට බිය වී නැගෙනහිර පළාතේ මාධ්‍යවේදීන් දෙදෙනකුට
සැඟවී ඉන්නට සිදුවී තිබීම සම්බන්ධයෙන් පාර්ලිමේන්තුවේදී පැමිණිල්ලක් ඉදිරිපත් වී තිබේ.
දෙමළ ජාතික සන්ධානයේ පාර්ලිමේන්තු මන්ත්‍රී ශානක්‍යන් රාසමානික්කම් අද දින ආරක්ෂක අමාත්‍යවරයාට දැනුම් දී සිටියේ පිල්ලෙයාන් නමින් ප්‍රකට සිවනේසතුරෙයි චන්ද්‍රකාන්තන් ඇතුළු කණ්ඩායමක් දිගින් දිගටම තර්ජන එල්ල කිරීම නිසා මඩකලපු දිස්ත්‍රික්කයේ දෙමළ මාධ්‍යවේදීන්ගේ සංගමයේ ලේකම් සෙල්වකුමාර් නිලාන්දන් සහ භාණ්ඩාගාරික පුන්‍යමුර්ති සසිකරන් දෙදෙනා පලාතෙන් පිටව ගොස් ඇති බවයි.
නැගෙනහිර පමණක් නොව දිවයින පුරා සිදුවන මාධ්‍ය මර්දක ක්‍රියාකාරකම් වලට එරෙහිව නැගී සිටින මඩකලපුව දෙමළ මාධ්‍යවේදීන්ගේ සංවිධානය මෑතදී සංවිධානය කළ උද්ඝෝෂණයක් වීඩියෝ ගතකරන සිවිල් ඇඳුමින් යුත් පොලිස් කැමරාකරුවන් ශානක්‍යන් රාසමානික්කම් මන්ත්‍රීවරයාගේ දැඩි දෝෂ දර්ශනයට ලක්ව තිබුණි.
එම සංගමය විසින් දින දෙකකට ඉහතදී මඩකලපුව ජ්‍යෙෂ්ට පොලිස් අධිකාරී වෙත ලියා ඇති ලිපියකින් ඉල්ලා තිබුනේ මාධ්‍යවේදීන් දෙදෙනා සහ ඔවුන්ගේ පවුලේ සාමාජිකයන් ඉලක්ක කොට සමාජ මාධ්‍ය ඔස්සේ අපහාසාත්මක සහ අසත්‍ය තොරතුරු පල කරන ශ්‍යාම් සිවා සහ දයාසිංහම් පාක්‍යරාජා යන දෙදෙනා සම්බන්ධයෙන් වහාම පරීක්ෂණ පවත්වන ලෙසයි.
"මඩකලපුවේ මාධ්‍යවේදීන්ගේ ගෞරවය කෙලෙසන සහ ඔවුන්ගේ සේවයට හානිකර මෙය ජනමාධ්‍ය නිදහසට එරෙහි නරකම ප්‍රහාරයක් ලෙස අපි හෙලා දකිමු," යි සභාපති වී ක්‍රිෂ්ණකුමාර් විසින් ලියා යවා ඇති ලිපියේ දැක්වේ.
"ඒගොල්ලන්ගේ ඥාතීන්ගේ පොටෝ පවා ෆේස් බුක් එකේ දාලා ඉතාමත් පහත් විදියට අපහාස කරනවා," යි ශානක්‍යන් මන්ත්‍රීවරයා ආරක්ෂක අමාත්‍යවරයාට දැනුම් දුන්නේය.
