දැනට පුරප්පාඩුව පවතින නියෝජ්‍ය කථානායක ධුරය සඳහා පාර්ලිමේන්තු මන්ත්‍රීනි රෝහිණි කවිරත්නගේ නම යෝජනා කිරීමට සමගි ජන බලවේගය

තීරණය කර ඇත.

ට්විටර් පණිවිඩයක් නිකුත් කරමින් විපක්ෂ නායක සජිත් ප්‍රේමදාස සඳහන් කර ඇත්තේ, ළමා හා කාන්තා ක්‍රියාකාරිනියක වන ඇය එම තනතුරට යෝජනා කරන බවයි.

මේ අතර මන්ත්‍රී අජිත් රාජපක්ෂගේ නම නියෝජ්‍ය කථානායක ධුරය සඳහා යෝජනා කිරීමට ශ්‍රී ලංකා පොදුජන පෙරමුණ තීරණය කර ඇත.

නියෝජ්‍ය කථානායකවරයෙකු තෝරා ගැනීමේ ඡන්ද විමසීම ලබන අගහරුවාදා පාර්ලිමේන්තුවේදී පැවැත්වීමට නියමිතයි.


''අග්‍රාමාත්‍ය රනිල් කර ඇති යෝජනාව කාලෝචිත එකක් '' - කැෆේ


මේ අතර 'කැෆේ' සංවිධානය පවසන්නේ, නියෝජ්‍ය කථානායක ධුරයට කාන්තාවක් පත් කිරීම පත් කිරීම කාලෝචිත ක්‍රියාවක් බවයි.

නියෝජ්‍ය කථානායක ධුරය සඳහා කාන්තාවක් පත්කර ගැනීම සුදුසු බවට අග්‍රාමාත්‍ය රනිල් වික්‍රමසිංහ කර ඇති යෝජනාව කාලෝචිත එකක් බව කැෆේ සංවිධානය පවසයි.

එම සංවිධානයේ අධ්‍යක්ෂිකා සුරංගි ආරියවංශ පෙන්වා දෙන්නේ පාර්ලිමේන්තුවේ කාන්තා නියෝජනය වඩා බලවත් කිරීමට එය හේතුවක් වනු ඇති බවයි.

හත්වන පාර්ලිමේන්තුවේ මන්ත්‍රී සංයුතියට සමගාමීව මන්ත්‍රීවරියන් සිටින්නේ 6% කට වඩා අඩු ප්‍රමාණයක් බව ආරියවංශ පෙන්වා දෙයි.

 

මැතිවරණය සඳහා නාමයෝජනා කැඳවීමේ දී සහ ජාතික ලැයිස්තු මන්ත්‍රී ධුර පිරිනැමීමේදී බොහෝ පක්ෂවල නායකයින් කාන්තා නියෝජනය පිළිබඳව සැලකිල්ලක් නොදැක්වීම නිසා මෙවර පාර්ලිමේන්තුවේ නියෝජිතවරියන් සංඛ්‍යාව දහතුන් දෙනෙකුට සීමා වී ඇත.

 

පළාත් පාලන ආයතන සඳහා නාම යෝජනා සැකසීමේදී  කාන්තාවන් ඇතුළත් විය යුතු බවට නීතියක් පැවති හෙයින් මේ වන විට පළාත් පාලන ආයතනවල 23% පමණ කාන්තා නියෝජනයක් දක්නට ලැබෙන බව සුරංගි ආරියවංශගේ අදහසයි. නමුත් මෙම තත්ත්වය  පළාත් සභා සහ පාර්ලිමේන්තුව පිළිබඳව සලකා බැලීමේදී ඉතා කනගාටුදායක බව සුරංගි ආරියවංශ අවධාරණය  කරයි.

මේ නිසා මෙරට නීති සම්පාදනය කිරීමේ කාර්යයසඳහා සැලකිය යුතු දායකත්වයක් දැක්වීමට කාන්තාවකට අවස්ථාව ලබාදීමට සෙසු පක්ෂ කටයුතු කළ යුතු බව කැෆේ සංවිධානයේ අධ්‍යක්ෂවරිය වැඩිදුරටත් පෙන්වා දෙයි.

මේ සඳහා මෑත කාලීනව ගත හැකි සාධනීයම පියවර වන්නේ නියෝජ්‍ය කථානායක ධුරය සඳහා සුදුසු මන්ත්‍රීවරියක් පත්කිරීම බව සුරංගි ආරියවංශ වැඩිදුරටත් කියා සිටියි. 

 
 

Leader Whats app

  

 

 

subscribeYT

WhatsApp Image 2021 09 13 at 13.49.58

නවතම පුවත්

ඇට මැස්සා