ශ්‍රී ලංකාවට ලෝක බැංකුව විසින් මුල්‍යාධාර දීමේ පොරොන්දුවක් දුන් බවට
රනිල් වික්‍රමසිංහ අගමැති වී දින කීපයක් යත්ම ආණ්ඩුව විසින් කරන ලද ප්‍රචාරය මුළුමනින්ම අසත්‍යයක් බව පැය විසිහතරක් ගතව යාමටත් මත්තෙන් හෙළිදරව් වී තිබේ.
කොළඹ සිටින ලෝක බැංකුවේ මෙරට කළමනාකාරවරිය වන චියෝ කන්ඩා 2022 මැයි 27 වැනි දින විදේශ කටයුතු අමාත්‍ය මහාචාර්ය ජී.එල්. පීරිස් හමුවූ බව දක්වන ඡායාරූපද සහිතව විදේශ කටයුතු අමාත්‍යාංශය විසින් ප්‍රකාශ කර තිබුනේ "ඉදිරි මාස කිහිපය තුළ ලෝක බැංකුව ශ්‍රී ලංකාවට ඩොලර් මිලියන 700 ක පමණ මුදලක් ලබා දෙන බවද එතුමිය ප්‍රකාශ කළ" බවයි.
මැයි 30 වැනිදා පලකරන ලද එම ප්‍රකාශය ලෝක බැංකුව විසින් එදිනම නිකුත් කළ නිවේදනයකින් බොරු කර තිබුණි.
ලෝක බැංකුවේ ශ්‍රී ලංකාවේ ප්‍රධානියා විසින් නිකුත් කළ ට්විටර් නිවේදනයකින් කියා තිබුනේ "යෝග්‍ය සාර්ව ආර්ථික ප්‍රතිපත්ති රාමුවක් සකසාගන්නා තුරු ශ්‍රී ලංකාවට අලුතින් මුදල් දීමේ සැලසුමක් නැති බවයි"'
''අත්‍යවශ්‍ය ඇතැම් ඖෂධ, දුප්පත් සහ අවදානමට ලක්වී සිටින පවුල්වලට තාවකාලික මුදල් සැපයුම, අවදානමට ලක්වී සිටින පවුල්වල දරුවන්ට පාසල් ආහාර සහ ගොවීන්ටත්, කුඩා පරිමාන ව්‍යාපාරිකයන්ට උදව් කිරීමටත් ආණ්ඩුවට සහාය වනු පිණිස මීට ඉහතදී අනුමත කරන ලද ව්‍යාපෘති සඳහා වෙන් කරන ලද සම්පත් නැවත යෙදවීමක් සිදුකරමින් සිටින්නෙමු,'' යි ලෝක බැංකුවේ ශ්‍රී ලංකාව භාර අධ්‍යක්ෂ ෆාරිස් එච්. හදාද්-සර්වෝස්ගේ ට්විටර් පණිවුඩය මගින් පවසා තිබුණි .
