1200 x 80 DMirror

 
 

පවතින ආර්ථික හා දේශපාලන අර්බුද හමුවේ දිනෙන් දින පීඩාවට පත්වන වන්නියේ ගොවීන්ට හා ධීවරයන්ට සහන ලබාදෙන ලෙස ඉල්ලා දෙමළ

පාර්ලිමේන්තු මන්ත්‍රීවරු දෙපලක්  ඉන්දියාවෙන් ඉල්ලීමක් කර තිබේ.

මෙරට සිටින ඉන්දීය නියෝජ්‍ය මහ කොමසාරිස් රාකේෂ් නටරාජ් වෙත වෙන වෙනම ලිපි යොමු කරන දෙමළ ජාතික සන්ධානය නියෝජනය කරන සෙල්වම් අඩෙයික්කලනාදන් හා සිවඥානම් ශ්‍රීධරන් ඉල්ලා සිටින්නේ ගොවීන්ට පොහොරත්, ධීවරයන්ගේ බෝට්ටු සඳහා ඉන්ධනත් ලබා දෙන ලෙසයි.

''මන්නාරමේ සහ මුලතිව් දිස්ත්‍රික්වල ධීවරයන්ට ඉන්ධන ලැබිලා නැහැ, ඒ නිසා ඔවුන් දැඩි ලෙස පීඩාවට පත්වෙලා ඉන්නේ,'' යැයි සෙල්වම් අඩෙයික්කලනාදන් පවසයි.

රාජපක්‍ෂ ආණ්ඩුව නිකුත් කළ දත්ත උපුටා දක්වමින් පාර්ලිමේන්තු මන්ත්‍රී අඩෙයික්කලනාදන් යොමු කළ ලිපියේ දැක්වෙන්නේ මන්නාරම් දිස්ත්‍රික් ධීවරයන් සදහා දිනෙකට ඉන්ධන ලීටර් 78 000ක් ද, මුලතිව් දිස්ත්‍රික් ධීවරයන් සඳහා දිනකට ඉන්ධන ලීටර් 31,180 ක් අවශ්‍ය බවයි.

නිසි අයුරින් ධීවර කර්මාන්තය පවත්වා ගෙන යාමට  ඉන්ධන ප්‍රශ්නයට විසදුම් ලබා දෙන ලෙස ඔහු ඉන්දියාවෙන් ඉල්ලා තිබේ.

 

උතුරු පළාතේ කිලිනොච්චිය, මුලතිව්, යාපනය, වවුනියාව සහ මන්නාරම යන දිස්ත්‍රික්කවල රාජ්‍ය හා පෞද්ගලික අංශ රැකියා, කර්මාන්ත පහසුකම්, කාර්මික නිෂ්පාදන වැනි අංශවල වැඩි වර්ධනයක් දක්නට නොලැබුණු ජනතාව, විශේෂයෙන් යුද කාලයේ පවා තම මූලික ආර්ථිකය සරි කරගත්තේ මුළුමනින්ම කෘෂිකර්මාන්තය මතයි.

 

ඉකුත් වසරේ සිට ක්‍රියාත්මක වූ රසායනික පොහොර සහ පළිබෝධනාශක ආනයන තහනම හා වෙළඳ පොලේ ඉන්ධන හිඟ වීම කෘෂි කර්මාන්තය පවත්වා ගෙන යාමට දුෂ්කර වී තිබේ.

''ශ්‍රී ලංකාවේ දැනට පවතින අත්‍යාවශ්‍ය භාණ්ඩ මිල ඉහළ යාම, ආනයන සීමා කිරීම්, ඉන්ධන හිඟය නිසා සෑම අංශයකටම බලපෑම් එල්ල වී තියෙනවා. ඉන් වැඩිම බලපෑමක් එල්ල වී ඇත්තේ ගොවි ජනතාවයි. තියෙන ආරංචි අනුව ඉදිරි මාස එක හෝ දෙක තුළ රට උග්‍ර ආහාර හිඟයකට මුහුණ පෑමට ඉඩ ඇති බව,'' පාර්ලිමේන්තු මන්ත්‍රී සිවඥනම් ශ්‍රීධරන් පවසයි.

නියෝජ්‍ය ඉන්දීය මහ කොමසාරිස් වෙත ඔහු යොමු කළ ලිපිය මගින් පෙන්වා දෙන්නේ උතුරු පළාතේ දිස්ත්‍රික්ක පහේ කුඩා පරිමාණ වී වගාව යටතේ අක්කර 81, 205.60ක ඉඩම් ප්‍රමාණයක් තිබුණද, ඒ සඳහා පොහොර සහ රසායනික ද්‍රව්‍ය කපා හැරීම හේතුවෙන්  පළාතේ සමස්ත ගොවි ජනතාවටම මූලික ජීවනෝපාය අහිමි වී ඇති බවයි.

උතුරු පළාතේ දිස්ත්‍රික්ක පහක සුළු පරිමාණ බඩඉරිඟු වගා කරන ඉඩම් අක්කර 81,205 කට සිදුව තිබෙන්නේ ද වී වගාවට අත්වූ ඉරණම බව මන්ත්‍රීවරයා පෙන්වා දී තිබේ.

උතුරේ ගොවි ජනයාගේ යහපත වෙනුවෙන් අවම වශයෙන් යූරියා පොහොර මෙට්‍රික් ටොන් 8121 ක හදිසි ආධාරයක්  කිරීමට මැදිහත් වන ලෙස ද එම ලිපිය මගින් ඉන්දියාවේ අවධානය යොමු කර ඇත.  

 


Leader Whats app

 

 

 

subscribeYT

subscribeYT

WhatsApp Image 2021 09 13 at 13.49.58