සංචාරකයින් ලක්ෂ 25 ක් 2025 වසර වන විට ශ්‍රී ලංකාවට ගෙන්වා ගැනීමට
බලාපොරොත්තු වන අතර එයින් ඩොලර් බිලියන 3.5 ක ආදායමක් අපේක්ෂා කරන බව අග්‍රාමාත්‍ය රනිල් වික්‍රමසිංහ පැවසීය.
අදාල ඉලක්කය සම්පූර්ණ කර ගැනීම සඳහා ඉහළ වියදම් සහිත සංචාරකයන් ලක්ෂ 15ක් ආකර්ෂණය කර ගැනීමට දිගුකාලීන සැලසුම් සකස් කරන ලෙස ද ඒ සඳහා රැස්වීම්, ප්‍රවර්ධන, සම්මන්ත්‍රණ සහ ප්‍රදර්ශන (MICE) අංශ ඇතුළත් කරන්නැයි ද අග්‍රාමාත්‍යවරයා ශ්‍රී ලංකා සංචාරක සංවර්ධන අධිකාරියේ නිලධාරීන්ට උපදෙස් දුන්නේය.
අග්‍රාමාත්‍ය රනිල් වික්‍රමසිංහ සංචාරක ක්ෂේත්රයේ පාර්ශවකරුවන් සමඟ අද (14) කොළඹ අග්‍රාමාත්‍ය කාර්යාලයේදී සාකච්ඡාවක් පැවැත්වූ අතර ඊට ශ්‍රී ලංකා සංචාරක සංවර්ධන අධිකාරිය (SLTDA) නියෝජනය කරමින් සහභාගී වූ නිලධාරීන් පැවසුයේ, වසරේ ඉතිරි කාලය සඳහා සංචාරකයින් ලක්ෂ 8 ක් පමණ ගෙන්වා ගැනීමට අපේක්ෂා කරන බවත් එයින් ඇස්තමේන්තු ගත ආදායම ඩොලර් මිලියන 800ක් බවත්ය.
ඉදිරි මාස 6 සඳහා ඉන්දියාවෙන් සංචාරකයින් ගෙන්වා ගැනීම සඳහා සැලැස්මක් සකස් කරන ලෙස නිලධාරීන්ට උපදෙස් දුන් අග්‍රාමාත්‍යවරයා, පලාලි ගුවන් තොටුපලේ මෙහෙයුම් කටයුතු යළි ආරම්භ කිරීමට අවශ්‍ය කටයුතු සම්පාදනය කරන ලෙස අදාළ බලධාරීන්ගෙන් ඉල්ලා සිටියේය.
ආගන්තුක සත්කාර ක්ෂේත්රයේ බොහෝ සේවකයන් මේ වන විටත් වෙනත් ස්ථාන සඳහා පිටත්ව ගොස් ඇති බවත්, මෙරට හෝටල් පාසල්වලට අලුතින් බඳවා ගැනීම් විශාල ලෙස අඩුවීමත් සමඟ තරුණ තරුණියන් දැනුවත් කිරීමේ වැඩසටහන් ඇති කරන ලෙසට අගමැතිවරයා අදාළ පාර්ශවකරුවන්ට උපදෙස් දුන්නේය.
කර්මාන්තයට ඇතුළු වී නව රැකියා අවස්ථා ලබා දීම දේශීය සංස්කෘතීන්හි ගිල්වීමට උනන්දුවක් දක්වන සංචාරකයින්ට සුවිශේෂී අවස්ථාවක් සලසන සංස්කෘතික උත්සව සංවිධානය කරන ලෙස අග්‍රාමාත්‍යවරයා නිලධාරීන්ට වැඩිදුරටත් උපදෙස් දුන්නේය.
ලොව පුරා කතුවරුන් සහ සාහිත්‍ය ලෝලීන් වැඩි වැඩියෙන් ආකර්ෂණය කර ගැනීම සඳහා ගාලු සාහිත්‍ය උළෙල වැඩිදියුණු කිරීමට කටයුතු කරන ලෙස ඔහු රාජ්‍ය අංශයේ සංචාරක නිලධාරීන්ගෙන් ඉල්ලා සිටියේය.
මේ අතර සංචාරක අමාත්‍ය හරීන් ප්‍රනාන්දු පැවසුවේ ශ්‍රී ලංකාවට දැනට පනවා ඇති සංචාරක සීමා ඉවත් කරන ලෙස අදාළ රටවලට බල කිරීම සඳහා තමන් දැනටමත් රාජ්‍යතාන්ත්‍රික ප්‍රජාව සමඟ සාකච්ඡා කර ඇති බවයි. ඉන්දීය සංචාරකයින් කෙරෙහි අවධානය යොමු කරමින් විදේශීය සංචාරකයින් ආකර්ෂණය කර ගැනීම සඳහා දේශීය හා ජාත්‍යන්තර ප්‍රසිද්ධ පුද්ගලයින් සමඟ ප්‍රවර්ධන සංදර්ශන පැවැත්වීමට සැලසුම් කරන බව ඔහු වැඩිදුරටත් පැවසීය.
සංචාරක අමාත්‍යාංශයේ නියෝජිතයින්, ශ්‍රී ලංකා සංචාරක සංවර්ධන අධිකාරිය, ශ්‍රී ලංකා සංචාරක ප්‍රවර්ධන මණ්ඩලය, ශ්‍රී ලංකා හෝටල් කළමනාකරණ හා සංචාරක ආයතනය, ශ්‍රී ලංකා හෝටල් සංගමය, ශ්‍රී ලංකා අභ්‍යන්තර සංචාරක ක්‍රියාකරුවන්ගේ සංගමය, ලංකා හෝටල් පාසල් උපාධිධාරී සංගමය, ශ්‍රී ලංකා වෘත්තීය සම්මන්ත්‍රණ, ප්‍රදර්ශන සහ උත්සව සංවිධායකයින්ගේ සංගමය සහ කුඩා හා මධ්‍ය පරිමාණ ව්‍යවසායක අංශය මෙම සාකච්ඡාවට සහභාගී විය.
