1200 x 80 DMirror

 
 

විරුද්ධ පාක්ෂිකයන් දඩයම් කිරීම ඉලක්ක කරගෙන ආණ්ඩුව විසින්ම තම සභාගයේ දේශපාලකයන්ට ප්‍රහාර එල්ල කිරීමේ සුදානමක් පවතින්නේදැයි

ජනතා විමුක්ති පෙරමුනේ නායකයා සැක මතුකර තිබේ.

''ආණ්ඩුව මෙවැනි ප්‍රවෘත්තියක් නිර්මාණය කරලා සමහරවිට ආණ්ඩුව ඇතුලේම සැලසුමක් තියෙන්න පුළුවන් මෙවැනි සමාජ තත්වයක් මෙවැනි ක්‍රියාකාරකම් ඇති කරන්න. ''

ජනතා විමුක්ති පෙරමුනේ නායක පාර්ලිමේන්තු මන්ත්‍රී අනුර කුමාර දිසානායක ජුලි 4 වැනි සදුදා මාධ්‍ය හමුවක් පවත්වමින් එම සැකය මතු කළේ පොලිස්පති  විසින් ආරක්ෂක ලේකම් වෙත යොමු කර තිබෙන ලිපියක අන්තර්ගත කරුණු සම්බන්ධයෙන් ප්‍රශ්න කරමිනි.

පොලිස්පති සී.ඩී වික්‍රමරත්න විසින් ජුනි මස 27 වැනිදා ආරක්ෂක ලේකම් ජෙනරාල් කමල් ගුණරත්න වෙත ලිපියක් යොමු කරමින් ඉදිරියේදී රට තුල ලේ වැගිරීමේ  සහ දේපල විනාශ කිරීමේ සැලසුම් දෙකක් පිළිබදව තොරතුරු යොමු කර තිබුණේ විරුද්ධ පක්ෂය සහ සිවිල් සංවිධාන දැවැන්ත ආණ්ඩු විරෝධී උද්ඝෝෂණයක් සැලසුම් කර තිබියදීය.

ලිපියේ මුලින්ම සදහන්ව තිබුනේ උතුර නැගෙනහිර හෝ දකුණු පළාත ඉලක්ක කරගෙන බෝම්බ ප්‍රහාරයක් එල්ල වීමේ හැකියාව සම්බන්ධයෙනි.

"2022/07/05  සහ /06 යන දිනවල යෙදෙන කළු කොටි සැමරුම් සතිය තුළ උතුර නැගෙනහිර හෝ දකුණු පළාත ඉලක්ක කරගෙන බෝම්බ ප්‍රහාරයක් හෝ යම් කඩාකප්පල්කාරී ක්‍රියාවක් විදේශීය ඔත්තු සේවාවක් මගින් සිදුකර එය එල්ටීටීඊ සංවිධානය මගින් සිදුකරන ලද්දක් බවට ඒත්තු ගැන්වීමට සූදානමක් ඇති බවත්, දැනටමත් යාපනය ප්‍රදේශයේ විදේශීය ආයතන වල වැඩ කරන පිරිස් හා ප්‍රභූවරුන් හට 2022/07/05 සහ 06 යන දිනවල කිසිදු උත්සවයකට සහභාගී නොවන ලෙසට දැනුම් දී ඇති බවට ත්‍රස්ත මර්ධන සහ ත්‍රස්ත කොට්ටාශයේ බුද්ධි අංශයට අනුයුක්තව රාජකාරි කරනු ලබන පොලිස් සැරයන් 64975 දාස් ගුප්ත නිලධාරියාගේ පුද්ගලික ඔත්තුකරුවකු විසින් තොරතුර ලබා දී ඇති බවට වාර්තා කර ඇත. ''

 

එම ලිපියේ දෙවනුව වැඩි දුරටත් සදහන් කර තිබුනේ දේශපාලනඥයන් ඉලක්ක කරගනිමින් විපක්ෂයේ කණ්ඩායම් විසින් එල්ල කළ හැකි ප්‍රහාරයක් සම්බන්ධයෙනි.

 

'' ඉදිරියේදී ප්‍රාදේශීය සභා මන්ත්‍රීන් ඇතුළු දේශපාලනඥයන් ඉලක්ක කර ඔවුන්ට සහ නිවාස වලට යම් ප්‍රහාරයක් එල්ල කර ඔවුන් මගින් රජයට බලපෑම් කර රජය අපහසුතාවයට පත් කිරීම සදහා ජනතා විමුක්ති පෙරමුණ සහ පෙරටුගාමී පක්ෂ වලින් සහ විපක්ෂ කණ්ඩායම් මගින් සැලසුම් කර ඇති බවට මා වෙත වාර්තා කර ඇත.  ''

සිය පක්ෂයට එල්ල කර තිබෙන චෝදනාව ප්‍රතික්ෂේප කළ ජනතා විමුක්ති පෙරමුනේ නායක නායක අනුර දිසානායක එයට ප්‍රතිචාර දැක්වුයේ පොලිස්පතිගේ ලිපිය  "විහිළුසහගත ඉතාමත් විකට ලිපියක්" බව පවසමිනි.

පොලිස්පති විසින් යොමු කර තිබු ලිපියේ පෙරටුගාමී පක්ෂයේ නම ලිඛිතවම සදහන්ව තිබුනත් තමන්ගෙන් බිඳී ගිය එම පක්ෂයේ නම මාධ්‍ය හමුවේ කියවීමෙන් වැලකී සිටි ජනතා විමුක්ති පෙරමුණේ නායකයා එය ඉදිරිපත් කළේ  “ඉදිරියේදී ප්‍රාදේශීය සභා මන්ත්‍රීවරුන් ඇතුළු දේශපාලනඥයන් ඉලක්ක කරගෙන ප්‍රහාර එල්ල කිරීම සඳහා, ජනතා විමුක්ති පෙරමුණත්, විරුද්ධ පක්ෂය නියෝජනය කරන තව දේශපාලන කණ්ඩායම්ද කටයුතු කරන බවට තොරතුරු ඇතැයි සඳහන් කරනවා" යනුවෙනි.

 

අනුර කුමාර දිසානායක මාධ්‍ය හමුවේදී තව දුරටත් පවසා සිටියේ ආණ්ඩුවට විරුද්ධව පැන නැගී තිබෙන උද්ඝෝෂණ මාලාව ජාතික මට්ටමෙන් සහ ග්‍රාමීය නගර මට්ටමින් දේශපාලන ව්‍යාපාරයක් හැටියට ජනතා විමුක්ති පෙරමුණ මැදිහත් වී සිදුකරමින් යන අතර ජනතාව සංවිධානය කරන්නත් ඊට මැදිහත් කරවන්නත් නිශ්චිත වැඩපිළිවෙළක් ක්‍රියාත්මක කරන බවයි.

 

එයට විරුද්ධව ආණ්ඩුව මෙවැනි විවිධ ප්‍රචාරයන් විහිළුසහගත ආකාරයෙන් නිර්මාණය කර බෙදාහරින බව ඔහු වැඩි දුරටත් පවසා තිබුනි.

"කිසිම තර්කානුකූල ආකාරයක් නොවෙන, වගකීමක් නැති ප්‍රවෘත්ති නිර්මාණය කරමින් යනවා. අප සහ අනෙකුත් විරුද්ධ පක්ෂයේ දේශපාලන පක්ෂ සම්බන්ධ කර තිබෙන මෙම ලිපිය අපේ පාර්ශ්වයෙන් බැහැර කරනවා. ආණ්ඩුවේ මේ විගඩම්වලට හසුවෙන්න එපා කියලා ජනතාවට අවධාරණය කරනවා. ජනාධිපතිවරයාත්, පොලිස්පතිවරයාත් අනුගමනය කරන මෙවැනි බොළඳ ක්‍රියාමාර්ගවලින් ජනතා විරෝධය යටපත් කළ නොහැකි බව අවධාරණය කරනවා."


පෙරටුගාමී සමාජවාදී පක්ෂයේ දුමින්ද නාගමුව ද මාධ්‍ය වෙත ප්‍රකාශ කර තිබුනේ පොලිස්පතිවරයාගේ ලිපියේ සඳහන් ප්‍රහාර රජය විසින් දියත් කිරීමට යන බවකි.

විරුද්ධ පක්ෂය විසින් කරන ලද හෙලා දැකීම හමුවේ පසුබැස ගිය  ආරක්‍ෂක අමාත්‍යාංශය පවසා තිබුනේ මෙම තොරතුර බුද්ධි අංශ තහවුරු නොකළ තොරතුරක් වන බවයි.
 
 
කළු කොටි සැමරුම් සතිය තුළ ප්‍රහාරයක් එල්ල වන බවක් පොලිස්පතිවරයාගේ ලිපියේ සඳහන් වුවත්  ආරක්ෂක  අමාත්‍යාංශයේ මාධ්‍ය ප්‍රකාශක කර්නල් නලින් හේරත් විසින් නිකුත් කළ නිවේදනයේ සඳහන් වී තිබුනේ 'කළු ජූලිය' ඉස්මතු කරමින් ත්‍රස්තවාදී ප්‍රහාරයක් සිදුවීමට ඇති ඉඩකඩ පිළිබඳව භූමී තොරතුරු ලැබී නැත' යනුවෙනි.
 
 
කළු කොටි සැමරුමක් අරමුණු කොටගෙන එල්ල කෙරෙන ප්‍රහාරයක් හෝ ආණ්ඩු පක්ෂයේ දේශපාලකයන් ඉලක්ක කොටගත් ප්‍රහාරයක් පිළිබඳ පොලිස්පතිගේ අනතුරු ඇඟවීම සම්බන්ධයෙන් එහි කිසිත් සඳහන් වී නැත.

"මෙම බුද්ධි තොරතුරු පිළිබඳව ඉදිරි පරීක්‍ෂණ මේ වනවිට සිදු කරනු ලබන" බව ආරක්ෂක අමාත්‍යංශ ලිපියේ වැඩි දුරටත් සඳහන් වේ.

පොලිස්පති සී.ඩී වික්‍රමරත්න විසින් ජුනි 27 වැනිදා ආරක්ෂක ලේකම් ජෙනරාල් කමල් ගුණරත්න වෙත යොමු කර තිබු ලිපිය පහතින්;

xdtrt


කාටත් කලින් අභ්‍යන්තර දේශපාලන පුවත් බලන්න,  
The LEADER Whatsapp Group එකට එකතුවෙන්න.

Screenshot 2022 06 23 at 11.50.54 AM

 

subscribeYT

subscribeYT

WhatsApp Image 2021 09 13 at 13.49.58

ඇට මැස්සා