වික්‍රමසිංහ-ගුණවර්ධන ආණ්ඩුවේ හොඳහිත ප්‍රදර්ශනය කිරීම සඳහා ත්‍රස්ත පනත යටතේ
සිරගත කර සිටින දෙමළ දේශපාලන සිරකරුවන් නිදහස් කරන ලෙසට දෙමළ ජාතික සන්ධානය ජනාධිපතිවරයාගෙන් ඉල්ලීමක් කර තිබේ.
රටේ ආර්ථික හා සමාජ ස්ථාවරත්වය ගොඩනැගීම සඳහා වන සර්ව පාක්ෂික ආණ්ඩු වැඩසටහනට සහයෝගය පළ කිරීමට සිය පාර්ලිමේන්තු මන්ත්‍රී කණ්ඩායම ජනාධිපති රනිල් වික්‍රමසිංහ ඊයේ [3] හමුවූ විට මෙම ඉල්ලීම ඉදිරිපත් කළ බව දෙමළ ජාතික සන්ධානයේ මාධ්‍ය ප්‍රකාශක එම් ඒ. සුමන්තිරන් පවසයි.
''දෙමළ දේශපාලන සිරකරුවන් නිදහස් කිරීම, අතුරුදහන් කළවුන් ගැන විමර්ශන ඇරඹීම, බලහත්කාරයෙන් අත්පත් කරගෙන තිබෙන ඉඩම් මුදාහැරිම, පුරාවිද්‍යා සහ වනජීවි හා වනසංරක්ෂණ දෙපාර්තමේන්තුව විසින් උතුරු නැගෙනහිර පළාත් වල ඉඩම් අත්පත් කර ගැනීම නැවැත්වීම හා දැනට අත්පත් කරගෙන තිබෙන ඉඩම් නිදහස් කිරීම ඇතුළු ගැටළු අදාළ නිලධාරින් සමග කතා කරලා විසදුම් ලබා දෙන්න ජනාධිපති එකඟ වුණා.''
22 වැනි ව්‍යවස්ථා සංශෝධනය, සම්පාදනය කිරීමට නියමිත නව ආණ්ඩු ක්‍රම ව්‍යවස්ථාව හා දෙමළ ජනතාවට අවශ්‍ය කෙරෙන දේශපාලන විසදුම ගැන ද මෙහිදී සාකච්ජා කෙරුණු බව සුමන්තිරන් මන්ත්‍රීවරයා පවසයි.
පැයකුත් අඩ හෝරාවක් පුරා ජනාධිපති ලේකම් කාර්යාලයේ පැවති මෙම කතා බහට අගමැති දිනේෂ් ගුණවර්ධන ද එක්ව සිටි අතර රෝගීව සිටින දෙමළ ජාතික සන්ධානයේ නායක ආර්.සම්බන්ධන් හා පාර්ලිමේන්තු මන්ත්‍රී තවරාසා කලෙයිඅරසන් හැර සෙසු මන්ත්‍රීහු එක්වුහ.
දෙමළ ජාතික ජනතා පෙරමුණේ ස්ථාවරය !
මේ අතර ජනාධිපතිවරයා විසින් අගෝස්තු 10 දා ජනාධිපති ලේකම් කාර්යාලයේදී සාකච්ජාවකට කළ ඇරයුම ප්‍රතික්ෂේප කරන දෙමළ ජාතික පෙරමුණ, ගුරු සංගම් නායක ජෝසෆ් ස්ටාලින් ඇතුළු දකුණේ අත්අඩංගුවට ගත් විරෝධතාකරුවන් කොන්දේසි විරහිතව නිදහස් කරන තෙක් සාකච්ජා වර්ජනය කරන බව අවධානරණය කර සිටියි.
The LEADER Whatsapp Group එකට එකතුවෙන්න.
