දේශපාලන සිරකරුවන් ගැන 'විජ්ජා පෙන්නීම' අතහරින ලෙස රනිල්ට ඉල්ලීමක්

බලයට පත් වූ සෑම රජයක්ම දේශපාලන සිරකරුවන් නිදහස් කරන බවට ලබා දුන් පොරොන්දු කඩ කළ බවට

චෝදනා කරන දෙමළ දේශපාලන සිරකරුවන්ගේ අයිතිවාසිකම් වෙනුවෙන් පෙනී සිටින උතුරේ සංවිධානයක් එම සිරකරුවන් නිදහස් කිරීමට කඩිනමින් මැදිහත් වන ලෙස වත්මන් ජනාධිපතිවරයාගෙන් ඉල්ලා සිටී.

 “හඬක් නැතියවුන්ගේ හඬ” එම ඉල්ලීම කර ඇත්තේ දෙමළ දේශපාලන පක්ෂ කිහිපයක් ආණ්ඩුවට ඇතුල් වීම සඳහා දේශපාලන සිරකරුවන් නිදහස් කරන ලෙස ඉල්ලීම් ඉදිරිපත් කර තිබියදීය.

 නිවේදනයක් නිකුත් කරමින් එම සංවිධානය පවසන්නේ, රජය විසින් දේශපාලන සිරකරුවන් නිදහස් කිරීම හරහා ජාතීන් අතර අන්‍යෝන්‍ය අවබෝධය සහ විශ්වාසය ඇති කළ හැකි බවයි.

ඒ හරහා රට ගොඩ නැගිය හැකි බවයි “හඬක් නැතියවුන්ගේ හඬ” සංවිධානයේ කැඳවුම්කරු මුරුගයියා කෝමගන් පවසන්නේ.

අගෝස්තු 3 වැනි බදාදා හඬක් නැතියවුන්ගේ හඬ සංවිධානය නිකුත් කළ නිවේදනයේ දැක්වෙන පරිදි හදිසි නීතිය සහ ත්‍රස්තවාදය වැළැක්වීමේ පනත යටතේ අත්අඩංගුවට ගෙන වසර 10 සිට 26 දක්වා කාලයක් විවිධ බන්ධනාගාර වල සිරගත කර සිටින සිරකරුවන් ගණන 46කි.

බලයට පත්වු සෑම රජයක්ම දේශපාලන සිරකරුවන් නිදහස් කිරීම සම්බන්ධයෙන් සොයා බැලීමට කොමිෂන් සභා පිහිටවු ආකාරයත්, විශේෂ අධිකරණ පිහිටවු ආකාරයත් සිහිපත් කරන මුරුගයියා කෝමගන් සදහන් කරන්නේ, ඒ හරහා නඩු කටයුතු කඩිනම් කරන බවට කාලයක් තිස්සේ කරගෙන යන විජ්ජාව නතර කළ යුතු බවයි.

බලයට පත් එකදු රජයක් හෝ කිසිදු කමිටුවක නිර්දේශ සම්පූර්ණයෙන් ක්‍රියාත්මක කළ ඉතිහාසයක් නොමැති බවත් “හඬක් නැතියවුන්ගේ හඬ” සංවිධානයේ කැඳවුම්කරු මුරුගයියා කෝමගන් පෙන්වා දෙයි.

එබැවින් දේශපාලන සිරකරුවන් නිදහස් කිරීම සම්බන්ධයෙන් සොයා බලන බව පවසමින් කල් නොමරා සැබෑ යහපත් චේතනාවෙන් දේශපාලන තීන්දුවක් ගෙන සියලු දේශපාලන සිරකරුවන්ට තරාතිරම නොබලා නිදහස ලබා දී සිය පවුලේ උදවිය සමග එකට ජීවත් වීමට අවස්ථාව සලසා දිය යුතු බවයි “හඬක් නැතියවුන්ගේ හඬ” සංවිධානය පවසන්නේ.

රටේ සාධාරණ ලෙස සිතන කිසිදු පක්ෂයක් දෙමළ දේශපාලන සිරකරුවන්ට නිදහස ලබා දීමට විරුද්ධ වන බවක් පෙනෙන්නට නොමැති බවත් එම සංවිධානය නිකුත් කළ නිවේදනයේ දැක්වේ.

මේ  අවස්ථාවේදී දෙමළ දේශපාලන සිරකරුවන් නිදහස් කිරීම සම්බන්ධයෙන් මානුෂීය පදනමකින් කටයුතු කරන ලෙස ජාත්‍යන්තර ප්‍රජාව ද ශ්‍රී ලංකා රජයට බල කළ යුතු බව මුරුගයියා කෝමගන්  වැඩි දුරටත් සදහන් කරයි.