අරගලකරුවන් සහ තරුණ පරපුර සමග විනිවිදභාවයෙන් කටයුතු කිරීමට සූදානම් බව ජනාධිපති රනිල් වික්‍රමසිංහ පැවසීය.
දැන් තිබෙන අභියෝගය ආර්ථික අරගලය ජය ගැනීම බව කී ජනාධිපතිවරයා, අරගල භූමියේ සිටින සියලු තරුණ තරුණියන් එම ආර්ථික අරගලයේ ජයග්‍රහණය සඳහා සෑම අයුරකින්ම දායකකර ගැනීමට තමන් අපේක්ෂා කරන බව ද කියා සිටියේය.
ගාලු මුවදොර අරගලකරුවන්ගේ පාර්ශ්ව කිහිපයක් හා ජනාධිපති රනිල් වික්‍රමසිංහ අතර විශේෂ සාකච්ඡාවක් අද (05) ජනාධිපති කාර්යාලයේ දී පැවැත්වුණු අතර එහිදී ජනාධිපතිවරයා මේ බව සඳහන් කළේය.
ප්‍රජාතන්ත්‍රවාදී නොවන දේශපාලනයට සහ ප්‍රචණ්ඩත්වයට තමන් විරුද්ධ බවත්, මර්දනය වෙනුවෙන්ම කටයුතු කරන පිරිස් විශ්වවිද්‍යාල ක්‍රියාවලිය තුළින්ම නවකවදය නවතා යහපත් සමාජ ප්‍රජාතන්ත්‍රවාදයක් වෙනුවෙන් ඉදිරිපත් විය යුතු බවත් ජනාධිපතිවරයා අවධාරණය කළේය.
ජනාධිපති රනිල් වික්‍රමසිංහ සමග පැවති මෙම සාකච්ජාවට Black Cap Movement, ලිබරල් සහෝදරත්වය, සර්වපාක්ෂික අරගලකරුවෝ, වන් ප්ලස් සංවිධානය සහ ගෝල්ෆේස් අරගලභූමියේ අරගලකරුවන් පිරිසක් ද සහභාගී වී සිටියේය.
මෙහිදී Black Cap Movement හී සම කැඳවුම්කරුවන් වන විමුක්ති දුෂාන්ත හා හේමප්‍රිය කවිරත්න සහ, මාධ්‍ය ප්‍රකාශක බුද්ධි ප්‍රබෝධ කරුණාරත්න කරුණු තුනක් මුල් කරගනිමින් මෙම හමුවේදී අදහස් ප්‍රකාශ කරන ලදී.
එනම්,
1. මර්දනකාරී හදිසි නීතිය වහාම ඉවත් කිරීම.
2. 2022 ජන අරගලය පැන නැඟීමට හේතු වූ කරුණු සහ එම තත්ත්වයට තිරසාර විසඳුම් සෙවීම සඳහා පූර්ණ බලැති කොමිෂන් සභාවක් පිහිටුවීම.
3. පවතින අර්බුදය පිළිබඳව අරගලකරුවන් සහ රජය අතර සංහිඳියා ක්‍රියාවලියක් ඇතිකර ගැනීම.
එමෙන් ම, ගාලු මුවදොරින් ඔබ්බට යෝජනාවලියේ සඳහන් කරුණු යථාවක් කරගැනීම සඳහා රජයේ මැදිහත්වීමේ වැදගත්කම ද Black Cap Movement සංවිධානයේ සමාජ මාධ්‍ය අංශ ප්‍රධානී ගුණරත්න අධිකාරි මහතා විසින් අවධාරණය කරන ලදී.
එසේම, රටේ පොදුජන මතය පාර්ලිමේන්තුව සහ පොදුජනතාව යන දෙපාර්ශවයට විතැන් ව ඇති බැවින්, දෙපාර්ශවයේ කඹ ඇදීමේ ක්‍රියා පිලිවෙත වෙනුවට, ජනතා අභිලාෂයන්ට ගරු කරමින් රටේ අර්බුදකාරී තත්ත්වය සමනය කර ගැනීමට ක්‍රියා කළ යුතු බව සංවිධානයේ සම ජාතික සංවිධායක යෂේන්ද්‍ර විජේවර්ධන මෙහිදී අවධාරණය කළේ ය.
මෙහිදී අරගලකරුවන් ආමන්ත්‍රණය කළ ජනාධිපති රනිල් වික්‍රමසිංහ පවසා සිටියේ හදිසි නීති තත්ත්වය නුදුරේදීම ඉවත් කරගැනීමට තවමත් සූදානමක් නොමැති බවත්, එසේ ම, ලංකා ගුරු සංගමයේ ලේකම් ජෝසප් ස්ටාලින් ඇතුලු ප්‍රජාතන්ත්‍රවාදී ලෙස විරෝධය දැක්වූ අරගලකරුවන්ට යම් අසාධාරණයක් සිදු වී නම් ඒ ගැන සොයා බලා මැදිහත්වීමට පෞද්ගලික ව කටයුතු කරන බවත් ය.
එමෙන් ම 'ජන සභා ක්‍රමය' හා පර්ලිමේන්තුවේ අධීක්ෂණ කරක සභා වලට තරුණ නියෝජනය තහවුරුකරණ බවත්, අරගල භූමියේ සමස්ථය නියොජනය කරන කණ්ඩායමක් සමග සාකච්ඡාවක් කිරීමට බලාපොරොත්තු වන බවත් ජනාධිපතිවරයා පැවසීය.
මෙම හමුව සඳහා අමාත්‍ය මනූෂ නානායක්කාර සහ රුවන් විජේවර්ධන ද සහභාගී වූහ.
කාටත් කලින් අභ්‍යන්තර දේශපාලන පුවත් බලන්න,
