ආර්ථිකය ගොඩගැනීමට හර්ෂගේ අවම පොදු වැඩපිළිවෙල මෙන්න

පවතින ආර්ථික අර්බුදයෙන් කෙටි කාලීනව සහ මධ්‍ය කාලීනව රට ගොඩගැනීම සඳහා පාර්ලිමේන්තු මන්ත්‍රී ආචාර්ය හර්ෂ ද සිල්වා විසින් සම්පාදනය කළ “ණය උගුලෙන් මිදීම සහ අන්තර්ග්‍රාහී තිරසාර සංවර්ධනය වෙනුවෙන් වන සැලැස්ම“ යන ආර්ථික වැඩපිළිවෙල පසුගියදා ඔහු විසින් පාර්ලිමේන්තුවට ඉදිරිපත් කළ අතර අද (14) උදෑසන ඒ සම්බන්ධයෙන් ඔහු මාධ්‍ය දැනුවත් කළේය.

එහිදී, ඔහු සඳහන් කළේ මෙම ආර්ථික සැලැස්ම ප්‍රතිසංස්කරණය කළ යුතු ප්‍රධාන ක්ෂේත්‍ර 10 ක් හඳුනා ගනිමින් සකස් කර තිබෙන බවයි.

ණය අර්බුදය කළමණාකරණය, මූල්‍ය සහ විනිමය අනුපාතික ප්‍රතිපත්තිය, ආදායම් ස්ථාවර කිරීම, වියදම් පාලනය, රාජ්‍ය අංශය කළමනාකරණය, බලශක්ති සහ මහජන උපයෝගීතා, වෙළෙඳාම, කර්මාන්ත, කාෂිකර්මය සහ සේවා ප්‍රවර්ධනය, නිෂ්පාදන සාධක වෙළෙඳපොළ ප්‍රතිසංස්කරණ, ශක්තිමත් සමාජ ආරක්ෂණ ජාලය, විනිවිදභාවය සහ වගවීම මෙම අංශ අතරට ඇතුළත් වේ.

ආචාර්ය හර්ෂ ද සිල්වා  විසින් සම්පාදනය කර තිබෙන මෙම ආර්ථික සැලැස්ම ප්‍රධාන විපක්ෂය වන සමඟි ජන බලවේගයේ ආර්ථික ප්‍රතිපත්ති ඒකකය මඟින් අනුමත කර ඇත.

 

එසේම, මෙය සමාජ සාධාරණත්වය සඳහා වන ජාතික ව්‍යාපාරය මඟින් කණ්ඩායම්  08 කගේ යෝජනා පාදක කර ගනිමින්  (Advocata ආයතනය, ශ්‍රී ලංකා නීතිඥ සංගමය, ඇල්ලේ  ගුණවංශ හිමියන්, ස්වාධීන ආර්ථික විද්‍යාඥයින්, සමාජ සාධාරණත්වය සඳහා වන ජාතික ව්‍යාපාරය,  NPP,  SJB ,  43 කණ්ඩායම) හා ශ්‍රී ලංකා නිදහස් පක්ෂය හා ව්‍යාපාරික ප්‍රමුඛයන් ගේ අදහස්ද විමසා සම්පාදනය කර ඇත.  

මෙම සැලසුම පිළිබඳව අදහස් දක්වමින් ආචාර්ය හර්ෂ ද සිල්වා මෙසේ පැවසීය.

“මෙය කෙටි කාලීන සහ මධ්‍ය කාලීන ආර්ථික සැලැස්මක්. ඩලස් අලහප්පෙරුම මහතා ජනාධිපති අපේක්ෂකයා විදිහට ඉදිරිපත් වන අවස්ථාවේ විපක්ෂයේ පක්ෂ සමග සාකච්ඡා කර මෙය ගොඩනැගීමේ වගකීම මට පැවරුණා. මේ සඳහා විපක්ෂයේ බොහෝ පක්ෂවල අනුමැතිය තිබෙනවා. මේ නිසා, මම ආණ්ඩුවට අවධාරණය කරන්නේ මේ වැඩපිළිවෙල වහාම ක්‍රියාත්මක කිරීමට කටයුතු කරන්න කියලයි. සාමාන්‍යයෙන් ආණ්ඩුව තමයි මෙවැනි වැඩපිළිවෙලක් ඉදිරිපත් කළ යුත්තේ. අපිට දැන් පක්ෂ, විපක්ෂ කිය කිය ඉන්න කාලයක් නෑ. මේ ආර්ථික සැලැස්ම විශේෂඥයින් විසින් සම්පාදනය කරපු එකක්. ඒක නිසා, වහාම මේක ක්‍රියාත්මක කරන්න. නැත්නම්, ආණ්ඩුව ඔවුන්ගේ ආර්ථික සැලැස්ම ඉදිරිපත් කරන්න. අපිට කල් මරන්න කාලයක් නෑ.“

විපක්ෂයේ මන්ත්‍රීවරයෙක්ට ප්‍රථම වතාවට රජයේ මුදල් කාරක සභාවේ සභාපතිකම දීම පිළිබඳ තමන් සතුටු වන බවත් මේ හරහා අවශ්‍ය වැඩපිළිවෙළ ක්‍රියාත්මක කිරීමට තමන් කටයුතු කරන බවත් ඔහු පැවසීය.

රට ගොඩ ගැනීම සඳහා ඇමතිවරයෙක් විය යුතුම නැතැයි යන්න මෙම තනතුර හරහා ඔප්පු කර පෙන්වීමට තමන් බලාපොරොත්තු වන බවත් මන්ත්‍රීවරයා කීවේය.