ශ්‍රී ලංකා ක්‍රිකට් ආයතනයේ විධායක කමිටු සාමාජිකයින් විසින් කරනු ලබන
හෝ කිරීමට සැලසුම් කර ඇති ඕනෑම සංචාරයක් ශ්‍රී ලංකාවේ ක්‍රිකට් ක්‍රීඩාවේ දියුණුවට අදාළ ‘නිල කටයුතු’ අරමුණු කරගත් සංචාර මිස අන් කිසිවක් නොවන බව ශ්‍රී ලංකා ක්‍රිකට් ආයතනය නිවේදනයක් නිකුත් කරමින් පවසයි.
ශ්‍රී ලංකා ක්‍රිකට් ආයතනයේ නිලධාරීන් හත් දෙනකු රුපියල් කෝටි ගණනක් වියදම් කරමින් සුපිරි සංචාරයක් යෑමට අවසර ඉල්ලා ඇතැයි අර්ජුන රණතුංග කළ ප්‍රකාශයට ප්‍රතිචාර දක්වමින් එම නිවේදනය නිකුත්කර ඇත.
ශ්‍රී ලංකා ක්‍රිකට් ආයතනයේ විධායක කමිටු සාමාජිකයන් හත් දෙනෙකුට දැන් පැවැත්වෙන ආසියානු කුසලාන ක්‍රිකට් තරගාවලියේ නිල කටයුතු සඳහා සහභාගී වීමට ක්‍රීඩා අමාත්‍යංශයෙන් අවසර ඉල්ලූ බව එම නිවේදනයේ සඳහන් වේ.
රුපියල් කෝටි ගණනක් වැය කර විදේශ සංචාරයක නිරත වීමට සූදානම් වූ ශ්‍රී ලංකා ක්‍රිකට් ආයතනයේ නිලධාරීන් හත්දෙනකුගේ ගමන අත්හිටවූ බව ජාතික ක්‍රීඩා සභාවේ සභාපති අර්ජුන රණතුංග ඊයේ (28) මහනුවරට පැමිණ මල්වතු අස්ගිරි මහනාහිමිවරුන් බැහැදැකීමෙන් අනතුරුව මාධ්‍ය හමුවේ අදහස් දක්වමින් සඳහන් කර තිබිණ.
කෙසේවුවද අර්ජුන රණතුංග කළ ප්‍රකාශයක් මත පළවූ මාධ්‍ය වාර්තා ස්වෙච්ඡාවෙන් සේවය කරන ශ්‍රී ලංකා ක්‍රිකට් නිලධාරීන්ගේ ප්‍රතිරූපයට හානියක් බවත් 2022 ආසියානු කුසලානය ක්‍රිකට් තරගාවලිය අතරතුරදී සාමාජික රටවල නිලධාරීන් සහ ආසියානු ක්‍රිකට් සංගමය සමඟ සාකච්ඡා කිරීමට, ශ්‍රී ලංකාවේ ක්‍රීඩාව සඳහා දැවැන්ත වාණිජ අවස්ථා උදාකර දිය හැකි පුද්ගලික අංශයේ නියෝජිතයන් හමුවීමට, වසර 2023 සිට 2027 දක්වා ශ්‍රී ලංකාවේ අනාගත තරග සංචාර වැඩසටහන් සහ ලංකා ප්‍රිමියර් ලීග් (එල්.පී.එල්.) තරගාවලියේ ප්‍රතිසංස්කරණ කටයුතු පිළිබඳව සාකච්ඡා කිරීම ආදි වැඩසටහන් රැසක් ඉටුකිරීමට නියමිතව තිබූ බවත් ශ්‍රී ලංකා ක්‍රිකට් ආයතනය පවසයි.
ශ්‍රී ලංකා ක්‍රිකට් විධායක කමිටු සාමාජිකයින් ක්‍රිකට් ක්‍රීඩාවට කරන ගෞරවනීය සේවය වෙනුවෙන් විශාල ගෞරවයක් හිමිවිය යුතු වුවද අර්ජුන රණතුංග කළ ව්‍යාජ ප්‍රකාශවලින් එම ගෞරවය පහතට වැටෙන බව කීයන ශ්‍රී ලංකා ක්‍රිකට් ආයතනය, ශ්‍රී ලංකා ක්‍රිකට් ආයතනය ස්වාධීනව කළමනාකරණය කරන ආයතනයක් මෙන්ම ජාත්‍යන්තර තරගාවලි පැවැත්වීමෙන්, කණ්ඩායම් අනුග්‍රාහකත්වයන් විකිණීමෙන් සහ තරග විකාශන අයිතිය විකිණීමෙන් උපයාගන්නා අරමුදල්වලින් පමණක් එහි මෙහෙයුම් කටයුතු ක්‍රියාත්මක කරන බවත් ශ්‍රී ලංකා ක්‍රිකට් ආයතනය එම නිවේදනයෙන් වැඩි දුරටත් අවධාරණය කරයි.
කාටත් කලින් අභ්‍යන්තර දේශපාලන පුවත් බලන්න,
The LEADER Whatsapp Group එකට එකතුවෙන්න.
