ත්‍රස්තවාදී ක්‍රියාකාරකම් සඳහා නම් කළ පුද්ගලයෙකු ලෙස ශ්‍රී ලංකා රජය විසින් පසුගියදා
ලැයිස්තුගත කළ තරුණ කවියකුගේ ඇප කොන්දේසි ලිහිල් කිරීමට අධිකරණය කටයුතු කර තිබේ.
අගෝස්තු මස පළමුවැනිදා ආරක්ෂක ලේකම් කමල් ගුණරත්න විසින් නිකුත්කළ අංක 2291/02 දරණ අතිවිශේෂ ගැසට් නිවේදනය මගින් පුද්ගලයන් 15ක් හා සංවිධාන 316 ක් නම් කරන ලදී.
මන්නාරමුදු අහ්නාෆ් නමින් දෙමළ පාඨක ප්‍රජාව අතර ප්‍රකට කිවියර හා ගුරුවර අහ්නාෆ් ජසීම් ඇතුළු 55 දෙනකුත් සංවිධාන 3කුත් එම ලැයිස්තුවට අලුතින් ඇතුලත් කර තිබුණි.
පද්‍ය සංග්‍රහයක් ලියා පළ කිරීම නිසා ත්‍රස්තවාදය වැළැක්වීමේ පනත යටතේ අත්අඩංගුවට ගෙන දහනම මාසයක් සිරකොට තැබීමෙන් අනතුරුව උසාවියෙන් ඇප පිට නිදහස් කර සිටි අහ්නාෆ් ජසීම්ගේ ඇප කොන්දේසි පුත්තලම මහාධිකරණය විසින් 2022 අගෝස්තු 26 වැනිදා ලිහිල් කර තිබේ.
වසර එක හමාරකට වැඩි කාලයක් සිරගත කොට තැබීමෙන් පසු රුපියල් ලක්ෂ තුන බැගින් වූ ශරීර ඇප තුනක් මත අහ්නාෆ් ජසීම් මුදා හැරීමට නියෝග කළ පුත්තලම මහාධිකරණ විනිසුරු නයෝමි වික්‍රමසිංහ 2021 වසරේ දෙසැම්බර් 15 වැනි බදාදා තව දුරටත් නියෝග කර තිබුනේ ඔහුට සෑම මසකම පළමු සහ අවසන් ඉරිදා ත්‍රස්ත මර්දන කොට්ඨාසයේ පුත්තලම කාර්යාලයේ අත්සන් කළ යුතු බවයි.
ඒ අනුව 2021 වසරේ දෙසැම්බර් 15 වැනිදා සිට මාස අටක් පුරාවට, සෑම මසකම පළමු සහ අවසාන ඉරිදා පුත්තලම ත්‍රස්ත විමර්ශන කොට්ඨාස කාර්යාලයට වාර්තා කිරීමට ඔහුට සිදු විය.
නඩු විභාගය 2022 ඔක්තෝබර් 10 දා යළි කැදවීමට නියමිතය.
අහ්නාෆ් ජසීම් ත්‍රස්ත මර්දන හා විමර්ශන කොට්ඨාශය (CTID) විසින් 2020 මැයි 16 දා පන්ඩාරවේලියේ පිහිටි ඔහුගේ නිවසේදී අත් අඩංගුවට ගන්නා ලද්දේ 2017 දී ලියා පලකළ නවරසම් (நவரசம்) පද්‍ය සංග්‍රහය ගැන සහ සිය ශිෂ්‍යයන් ‘අන්තවාදී මතවාදවල’ අනුගාමිකයන් බවට පත් කිරීමේ අභිලාෂයෙන් ඔවුන් ‘අන්තවාදී’ කරුණුවලට නිරාවරණය කළ බවට චෝදනා කරමිනි.
ඔහුට අධිචෝදනා ගොනු කරන ලද්දේ 2021 නොවැම්බර් 15 දාය.
නමුත් ඔහු කොළඹ රිමාන්ඩ් බන්ධනාගාරයෙන් නිදහස් කර යවන ලද්දේ 2021 දෙසැම්බර් 16 වැනිදා පස්වරුවේය.
සබැඳි පුවත් :
මුස්ලිම් ජාතික කවියාට දහනම මාසයකට පසු ඇප
සිරකළ මුස්ලිම් කවියාට ඇප දීමට නීතිපති 18 මාසයක් ගනී
ත්‍රස්ත පොලිසිය හිරකරගෙන සිටි මුස්ලිම් කවියාට 18 මාසයකට පසු නඩු
හිරේ දැමූ අහ්නාෆ් ජසීම් කවියාට අවුරුද්දකට පසු නීතිඥයන් හමුවීමේ වරම
මුස්ලිම් කවියාගේ නඩුවට උත්තර දෙන්න නීතිපති උසාවියේ නෑ
රිමාන්ඩ් කර සිටින අහ්නාෆ් ජසීම්ට සමාන පහසුකම් දීමට උසාවි නියෝගයක්
අහ්නාෆ් නිදහස් කරන ලෙස ඉල්ලීමට යුරෝපා ආණ්ඩු එක්වේ
කවි පොතට හිරේ දැමූ කවියා නිදහස් කරගන්නට ජාත්‍යන්තර සංවිධාන සමූහයක් එක්වෙයි
මුස්ලිම් කවියාට විරුද්ධ චෝදනා ඔප්පු කරගන්න බැරිව CTID උපාමාරුවක
මුස්ලිම් තරුණ කවියකු රඳවාගැනීම ගැන TID ලොක්කාට ප්‍රශ්න
සිර කළ මුස්ලිම් කවියකු වෙනුවෙන් මානව හිමිකම් කොමිසමට ඉල්ලීමක්
කාටත් කලින් අභ්‍යන්තර දේශපාලන පුවත් බලන්න,
The LEADER Whatsapp Group එකට එකතුවෙන්න.
