ගෝඨාබය රාජපක්ෂ ජනාධිපති වුවහොත් නිදොස්කොට නිදහස් කිරීමට යන්නේ, 2009 යුධ ජයග්‍රහණයෙන් පසු  එනම්, 2010 සහ 2015 අතර කාලය තුලදී මේ රටේ මාධ්‍යවේදීන්ට පහරදීම්,

මාධ්‍යවේදීන් අතුරුදහන් කිරීම්, ශිෂ්‍යයින් අතුරුදහන් කිරීම් වැනි චෝදනා මත අධිකරණ නියෝගමත රිමාන්ඩ් භාරයට පත්කර සිටින ආරක්ෂක අංශ සාමාජිකයින් කිහිප දෙනෙකු බව හිටපු යුධ හමුදාපති ජෙනරාල් මහේෂ් සේනානායක පවසයි.

එවැනි චෝදනා ලබා සිටින හමුදා සාමාජිකයින් මෙහෙයවා ඇත්තේ යම් පුද්ගලයකු හා කණ්ඩායමක් විසින් බවද ජනරාල්වරයා පවසයි.

'ජාතික ජනතා ව්‍යාපාරයේ' ජනාධිපති අපේක්ෂක ජෙනරාල් මහේෂ් සේනානායක මේබව සඳහන් කර සිටියේ, UTV රුපවාහිනියේ සම්මුඛ සාකච්ජාවකට සහභාගී වෙමිනි.

යුද්දෙ කළ නිසා පමණින්ම සෙබළු සිරගත කරලා තිබුණද? කියා UTV මාධ්‍යවේදියා කළ විමසීමේදී ජෙනරාල්වරයා පවසන්නේ, ''මම ඒකට එකඟ වෙන්නේ නැහැ.'' කියාය.

ඔහු තවදුරටත් මෙසේද කියා සිටියි.

''යුද්ධය කළ පමණින් සිරගත වෙලා ඉන්න සෙබළුන් නැහැ. පැහැදිළිවම කෙනෙක් හිටියා නම් ඉස්සෙල්ලා, යුද්ධයේදී නිල ඇඳුමට මුවාවෙන් යම් කිසි දෙයක් කරපු කෙනෙක් තමයි එහෙම ඉන්නට ඇත්තේ.

අද මේ ඉන්න හෝ කතාකරන අය ඉතාම ස්වල්පයයි ඉන්නේ. ඔවුන් 2009 යුද්ධයෙන් පස්සේ 2010 සහ 2015 අතර තුලදී මේ රටේ මාධ්‍යවේදීන්ට පහරදීම්, මාධ්‍යවේදීන් අතුරුදහන් කිරීම්, ශිෂ්‍යයින් අතුරුදහන් කිරීම්, වගේ දේවල් නිසා තමයි ඔවුන් සිරගත වෙලා හෝ බේල් ලබාගෙන හිරෙන් එළියට ඇවිල්ලා ඉන්නේ.

ඒ පරීක්ෂණ වෙනම කරන පරීක්ෂණ, ඒවා යුද හමුදාවට ඉඳුරාම අදාල නැහැ ඒ රාජකාරියට. කණගාටුවෙන් හෝ කියන්නට ඕනේ සමහර සෙබළුන් කිහිප දෙනෙක් ඉතාමත් ස්වල්පයක්, ඔවුන්ව මෙහෙයවලා තියෙනවා කෙනෙක් සහ කණ්ඩායමක් වැරදි දේ කරන්න. ''

තමන් බලයට පත් වුවහොත් එදිනම, එනම් නොවැම්බර් 17 වනදාම "අසාධාරණ ලෙස සිරගත කර සිටින රණවිරුවන්" නිදොස් කොට නිදහස් කරන බව ගෝඨාබය රාජපක්ෂ ඔක්තෝම්බර් 09දා අනුරාධපුරයේ දී ප්‍රකාශ කළේය.  

කතික වේදිකාව අසල රඳවා තිබු 'ටෙලිප්‍රොම්ටරයේ' තිරයේ සටහන් බලමින් ඔහු එබව සඳහන් කලේ, ඔහුගේ ජයග්‍රහණය වෙනුවෙන් ශ්‍රී ලංකා පොදුජන පෙරමුණ සංවිධාන කරන ජනරැළි මාලාවේ මංගල රැළිය අමතමිනි.

මේ හමුදා භටයන් "අභූත" චෝදනා මත සිරගත කර ඇතැයි පොහොට්ටුවේ ජනාධිපති ධුර අපේක්ෂකයාගේ තර්කයයි.

රැඳවුම් භාරයේ සිටින මේ හමුදා භටයන් ගැන ගෝඨාබය රාජපක්ෂ නොකී දේ මෙලෙසය.

පොලීසිය විසින් අත්අඩංගුවට ගත සෙබළුන් 42 අතර දැනට 7 දෙනෙකු තවමත් සිරභාරයේ සිටින අතර, අන් සියලු දෙනා ඇප මත නිදහස් කොට ඇත. තවද ඒ අතර තම රාජකාරීවල නිරත වීමේදී සිදු වූ වැරදි සම්බන්ධයෙන් අත්අඩංගුවට ගත් එක් නිලධාරියකු වත් නොසිටියි.

දැනට සැක පිට අධිකරණය ඉදිරිපත් කර ඇත්තේ මාධ්‍යවේදීන් ඝාතනය කිරීම, මාධ්‍යවේදීන්ට ප්‍රහාර එල්ල කිරීම, මාධ්‍යවේදීන් පැහැර ගෙන යෑම සහ කප්පම් සඳහා තරුණයන් පැහැර ගැනීමේ චෝදනාවලට සම්බන්ධ සෙබළුන් අතළොස්සක් පමණි.

මෙවැනි අපරාධවලට සම්බන්ධ වීම සොල්දාදුවගේ නිල රාජකාරීන් නොවන අතර, ඒවා සැබවින්ම දේශපාලන වුවමනා හෝ අණ දීම් මත සිදු වූ අපරාධ බව මැනවින් පැහැදිලි වේ.

 සබැඳි පුවත් :
මිනීමරු 'සුදු වෑන්' මෙහෙයුම් කාගේ වැඩක්ද ?- හිටපු යුධ හමුදාපති මහේෂ් හෙළිදරව් කරයි (VIDEO)  

ගෝඨාබයට සිහි කැඳවීමක් : ඔවුන් සිරගතව සිටින්නේ ඔබ නිදොස් කළ අධිකරණයමයි !

අධිකරණයටත් අබසරණයි ! - නිදොස් කොට නිදහස් කිරීමේ බලයත් ගන්නා බව ගෝඨාබය කියයි

subscribeYT

කාටුන්

Sniper Comix

නවතම පුවත්