හිරගෙදර දී පොදුවේ සිරකාර මනුෂ්‍යයන්ටත්, විශේෂයෙන් මුස්ලිම්වරුන්ටත් කරන
අඩන්තේට්ටම් පිළිබදව, ත්‍රස්තවාදය වැලැක්වීමේ පනත යොදා වසර එක හමාරකට වැඩි කාලයක් සිරකර තැබු තරුණ කවියකු විසින් හෙළි කර තිබේ.
"රිමාන්ඩ් භාරයට පත් කරන ලද පුද්ගලයකු අධිකරණය හමුවට පමුණුවා ආපසු හිරගෙදරට ගෙන එන විට විශේෂ කාර්ය බලකා සෙබළුන් විසින් ඔවුන් පරීක්ෂාවට ලක් කරනු ලැබේ. ඒ තැනැත්තා මුස්ලිම් නම් පරීක්ෂා කරනු ලබන්නේ ඇඳුම් ගලවා නිරුවත් කොට විදුලි බුබුලක් සහිත ඉඳිකටුවක් ගුද මාර්ගය තුලට යැවීමෙනි."
මන්නාරමුදු අහ්නාෆ් නමින් දෙමළ පාඨක ප්‍රජාව අතර ප්‍රකට කිවියර හා ගුරුවර අහ්නාෆ් ජසීම් ට්ව්ටර් පනිවිඩයක් තබමින් ඒ බව හෙළි කර ඇත්තේ ජාතික සිරකරු දිනය යෙදි තිබු දාට පසුදිනය.
ජාතික සිරකරු දිනය සැප්තැම්බර් 12 වැනිදාට යෙදී තිබුනි.
2017 දී ලියා පලකළ නවරසම් (நவரசம்) පද්‍ය සංග්‍රහය ගැන සහ සිය ශිෂ්‍යයන් ‘අන්තවාදී මතවාදවල’ අනුගාමිකයන් බවට පත් කිරීමේ අභිලාෂයෙන් ඔවුන් ‘අන්තවාදී’ කරුණුවලට නිරාවරණය කළ බවට චෝදනා කරමින් 2020 මැයි 16 දා පන්ඩාරවේලියේ පිහිටි ඔහුගේ නිවසේදී අත් අඩංගුවට ගන්නා ලද අහ්නාෆ් ජසීම් ත්‍රස්තවාදය වැලැක්වීමේ පනත යොදා දින 579ක් සිරගත කොට තිබුනි.
අධිකරණය විසින් ඔහු ඇප මත නිදහස් කර යැවීමෙන් පසුත් ත්‍රස්තවාදී ක්‍රියාකාරකම් සඳහා නම් කළ පුද්ගලයකු ලෙස ශ්‍රී ලංකා රජය විසින් පසුගියදා ඔහු ලැයිස්තුගත කර තිබුනි.
