විමුක්ති කොටි සංවිධානයේ නායකයකු වූ තිලීපන් ප්‍රසිද්ධියේ සැමරූ සියලු දෙනා ත්‍රස්ත පනත යටතේ අත්අඩංගුවට ගෙන සිරගත කළ යුතු යැයි මෑතදී

ආණ්ඩුවෙන් වෙන්වුණු සිංහල ජාතිකවාදී කණ්ඩායමක නායකයෙක් පවසා තිබේ.

'උත්තර ලංකා සභාගය' නම් මෑතකදී පිහිටුවා ගත් සංවිධානයේ සභාපති වන හිටපු ඇමැති විමල් විරවංශ කියා සිටින්නේ උතුරු නැගෙනහිර පළාත් වල ප්‍රසිද්ධියේ දින 12 ක් පුරා තිලීපන් සැමරීම ගැන ආරක්‍ෂක අමාත්‍යංශය දැඩි ක්‍රියාමාර්ග ගත යුතු බවයි.

දෙමළ ඊළාම් විමුක්ති කොටි සංවිධානය මෙරට තුල තහනම් බැවින් එහි නායකයන් සැමරීම, ඒ වෙනුවෙන් වාහන පෙළපාලි පැවැත්වීම  සිංහල ජනයාගේ කෝපයට හේතුවන බවයි විරවංශ පවසන්නේ.

''දෙමළ ජනයා හා දෙමළ දේශපාලනඥයන් මෙන්ම සමාජ මාධ්‍ය මගින් ද තිලීපන් සමරනු ලැබූවා. මේ අය ගැන සොයා බලා අත්අඩංගුවට අරන් සිරගත කරන්න ඕනෑ.''

 

තිලීපන් සැමරුම් උත්සව ප්‍රසිද්ධියේ පවත්වන විට ඒවා තහනම් නොකොට හමුදාව පොලිසිය බලා සිටියේ කිනම් කරුණක් නිසාද යැයි උත්තර ලංකා සභාගයේ නායකයා ප්‍රශ්න කොට තිබේ.

 

ඉන්දීය සාම සාධක හමුදා යාපනය අර්ධද්වීපයේ වාඩිලා සිටී 1987 ඉන්දු ලංකා ගිවිසුමෙන් පසු සමයේදී තිලීපන් ඉල්ලම් පහක් මුල් කරගනිමින් මිය යන තෙක්ම උපවාස කර මේ වනවිට වසර තිස් පහකි.




ඉල්ලීම් පහක් මුල්කර ගනිමින්.....


''
1 - සිංහල රජයේ හමුදා දෙමළ ජනයා ජීවත්වන ප්‍රදේශවලින් ඉවත් කර ගත යුතු ය,

2 - දෙමළ ජනයා වෙසෙන පළාත්වල දෙමල ජනයාගේ අතුරු ආණ්ඩුවක් පිහිටුවන තෙක් පුනරුත්ථාපනය මුවාවෙන් සිදුකෙරෙන සිංහල ජනපදකරණය නවතාලිය යුතු ය,

3 - දෙමල ජනයා වෙසෙන උතුරු-නැගෙනහිර සිංහල පොලිස් ස්ථාන හා කඳවුරු අලුතින් පිහිටුවීම රජය විසින් නැවැත්විය යුතු ය,

4 - ත්‍රස්තවාදය වැළක්වීමේ පනත යටතේ රඳවාගෙන සිටින සියලුම දේශපාලන සිරකරුවන් නිදහස් කළ යුතු ය,

5 - දෙමළ ප්‍රදේශවල පාසැල් තුළ වාඩිලා සිටින ශ්‍රී ලංකා හමුදා හා පොලිස් බල ඇණි ඒවායින් ඉවත්විය යුතු අතර රජය විසින් ග්‍රාමාරක්ෂකයන්ට ලබා දී ඇති ආයුධ ඉන්දීය හමුදා අධීක්ෂණය යටතේ නැවත ලබාගත යුතු ය ``


යන ඉල්ලීම් පහ මුල් කර ගනිමින්  තිලීපන් සිය උපවාසය ආරම්භ කරනු ලැබුවේ 1987 සැප්තැම්බර් 15 වැනිදා යාපනේ නල්ලුර් කෝවිල ආසන්නයේ ඉදි කළ අට්ටාලයක සිටයි.

 

එවකට දෙමළ ඊළාම් විමුක්ති කොටි සංවිධානයේ යාපනය නායකයා වූ තිලීපන් දොළොස් දිනකට පසු සැප්තැම්බර් 26 වැනිදා සිය අවසන් හුස්ම පොද මුදා හැරියේ යාපනය අර්ධද්වීපය වට කොට සිටී ඉන්දීය සාම සාධක හමුදාවත්, ලංකා රජයේ හමුදාවත් සසල කරමින්ය. උපවාසය නවතා ලීමට ඉන්දියාව දැඩි උත්සහයක යෙදුන ද සිය ඉල්ලීම් ඉටුකරන තෙක්  එය අත් හැරීමට තිලීපන් එකඟ නොවිණි.

 

රජයේ හමුදා මගින් කිහිපවතාවක්ම කඩා බිඳ දැමූ නල්ලුර් පිහිටි තිලීපන් ස්මාරකය අසලදී සැප්තැම්බර් 15 වැනිදා සැමරුම් උත්සවය ඇරඹියේ මහවිරු මාපියන්ගේ සහභාගිත්වයෙනි.

ඊට සමගාමීව යාපන සරසවි ශිෂ්‍ය සංගමය සංවිධානය කළ තිලීපන් සමරුවක් එහි සමරු ස්මාරකය අභියස පැවැත්වූ අතර ඒ සදහා මෙවර මුස්ලිම් හා සිංහල සිසු සිසුවියන්ගේ සහභාගිත්වයක් පැවති බව ප්‍රදේශයේ වාර්තාකරුවෝ පවසති.

දෙමළ ජාතික ජනතා පෙරමුණද තිලීපන් සමරුව වෙනුවෙන් යාපනය අර්ධද්වීපය  වටා රථ පෙළපාළියක් සංවිධානය කර තිබිණි.

35 Thilipan 3

35 Thilipan 2

35 Thilipan 1


අගමැති කැමැත්ත


තිලීපන් සමරුව ඇරඹීමත් සමගින් අගමැති දිනේෂ් ගුණවර්ධන ප්‍රකාශ කර ඇත්තේ යුද සමයේ මියගිය කිනම් පුද්ගලයකු වුවද ඔවුන්ගේ ඥාතීන්ට හා ඒ ජනවර්ගයන්ට අනුස්මරණය කිරීමට බාධාවක් නොමැති බවයි.

එහෙත් එවැනි උත්සව දේශපාලනික නොවිය යුතු අතර ජාති භේද අවුළුවාලන හා තහනම් සංවිධාන වල කොඩි හා සංකේත යොදා ගනිමින් ඊට පක්‍ෂපාතී ද නොවිය යුතු බව පවසන අගමැතිවරයා එවැනි දේ උල්ලංඝණය කළහොත් නීති මගින් පියවර ගන්නා බවට අවධාරණය කළේය.

පසුගිය වසර කිහිපය පුරා දෙමළ ජනයා සිය ආදරණියන් සිහිපත් කරමින් සමරු වැඩසටහන් පැවැත්වුයේ රජයේ ආරක්ෂක හමුදා හා පොලිසියේ බාධා කිරීම් හමුවෙයි.

 

දෙමළ ජනයාගේ අයිතීන් දිනා ගැනීම වෙනුවෙන් උපවාස කොට ප්‍රාණ පරිත්‍යාගයේ යෙදුනු තිලීපන්ගේ තිස් පස් වැනි සමරුව වෙනුවෙන් දෙමළ ජාතික ජනතා පෙරමුණ විසින් පොතුවිල් සිට නල්ලුර් දක්වා ගමන් ගත් රථ වාහන පෙළපාලියට වව්නියාව නගරයේදී පොලිසිය විසින් බාධා කළ බව ප්‍රදේශයේ වාර්තාකරුවෝ පවසති.

 

රථ පෙළ හරස් කළ පොලිසිය විසින්, තිලීපන්ගේ රුව රැගත් වාහන වල ගමන්ගත් සියලු දෙනාගේ නම් ගම් ඇතුළු තොරතුරු සටහන් කරගෙන තිබේ.

තිලීපන් සමරනු ලැබුවන් ත්‍රස්ත පනත යටතේ අත්අඩංගුවට ගෙන සිරගත කරන ලෙස අද ඉල්ලා සිටින විමල් විරවංශ ඉන්දීය සාම සාධක හමුදාව උතුරේ වාඩිලා සිටි සමයේ ඊට එරෙහිව දකුණේ ආයුධ ගත් ජනතා විමුක්ති පෙරමුණේ ශිෂ්‍ය අංශයේ පුර්ණකාලිකයෙකි.

පසුව එම පෙරමුණෙන් බිඳී රාජපක්‍ෂ හිතවාදියකු ලෙස ආණ්ඩු බලයට ඇතුලු  වූ වීරවංශ කොළඹ එක්සත් ජාතීන්ගේ කාර්යාලය ඉදිරිපිට ප්‍රදර්ශනාත්මක මාරාන්තික උපවාසයක් අරඹා දින කිහිපයකින් එය අත්හැර දැමීය.






සබැඳි පුවත් :


සාමකාමී අරගලයකින් මියගිය තිලීපන් සැමරේ

දෙමළ අයිතිය වෙනුවෙන් සාමකාමී අරගලයකින් මියගිය තිලීපන් සැමරේ


The LEADER Whatsapp Group එකට එකතුවෙන්න

Theleaderx2022

 
 

subscribeYT

WhatsApp Image 2021 09 13 at 13.49.58

නවතම පුවත්