හොරුන්ට ගොඩක් රිදුනත්, මේ රටේ පොදු ජනතාව වෙනුවෙන් පෙනී සිටීම ගැන තමා සතුටට පත්වන බව මුදල් කාරක සභාවේ සභාපති ආචාර්ය හර්ෂ ද සිල්වා පවසයි.



'' මම මුදල් කාරක සභාවේ සභාපතිවරයා වුණේ පුටු රත් කරන්න නෙවෙයි. රටට සහ ජනතාවට වැඩක් කරන්න. මම කෙටි කාලයට කරපු වැඩ ටිකට ඇතමුන්ට ගොඩක් රිදිලා. ඒ ගැන මට සතුටුයි.

මම විෂය පඨයට අදාල නැතිව ගල් අඟුරු ප්‍රසම්පාදනය ගැන පරීක්ෂණයක් කලාලු. විගණකාධිපතිවරයා කළ ඒ පරීක්ෂණයෙන් මොකක්ද අනාවරණය වුණේ? ඒ ගල් අඟුරු ප්‍රසම්පාදන ක්‍රියාවලිය රජයේ අනුමත ප්‍රසම්පාදන මාර්ගෝපදේශන වලට අනුකූල නොවන බව මූලික වශයෙන් නිරීක්ෂණය වුණා.

විශේෂයෙන්ම ප්‍රසම්පාදන ක්‍රියාවලියේදී සුදුසුකම් ලත් උනන්දුවක් දක්වන පාර්ශවයන්ට ප්‍රසම්පාදනයට සහභාගී වීම සඳහා සාධාරණ අවස්ථාවක් ලබාදී නොමැති බව හෙළිවුණා.  

මේ නිසා, මේ ප්‍රසම්පාදනයට සහභාගී වූ නිළධාරීන්ට වසරක කාලයක් ප්‍රසම්පාදන ක්‍රියාවලියට  සම්බන්ධ වීමට අවස්ථාව නොදෙන ලෙස අපි ඉල්ලා සිටියා.

මේක වැරදිද? අද මට චෝදනා කරන්නේ මා විෂය පඨය අභිබවා ගොස් මේ දේ කළ බවයි. සමාගමකට වසර 17 ක බදු සහන ඉල්ලමින් ආයෝජන මණ්ඩලයේ නිළධාරීන් පසුගියදා මුදල් කාරක සභාවට ආවා. එය සරල තීරණයක් නෙවෙයි.

මේ රටේ අහිංසක ජනතාව පාන් ගෙඩියට, සැමන් ටින් එකට බදු ගෙවන විට සමාගමකට අවුරුදු 17  ක බදු සහන දෙන්නට ඒ සමාගම මේ රටට ලබාදෙන ප්‍රතිලාභය දැනගත යුතුයි.

ඒ පිළිබඳව මා ආයෝජන මණ්ඩලයේ සභාපතිවරයාගෙන් ප්‍රශ්න කළා. ඔවුන්ට ඒ පිළිබඳව නිවැරදි තොරතුරු ලබාදීමට නොහැකිවූ නිසා මුදල් කාරක සභාව ලෙස අපි  ඒ විශ්ලේෂණාත්මක තොරතුරු ලබාදෙන තුරු ඒ සඳහා අවසර දුන්නේ නෑ. ඒක නිළධාරීන් මානසික ආතතියට පත් කිරීමක් වෙන්නේ කොහොමද ?

නිළධාරීන් කෙතරමි ආතතියට පත්වුවත් මින් ඉදිරියටත් රටට ලැබෙන ප්‍රතිලාභය ඇතුළු විශ්ලේෂණාත්මක තොරතුරු නොදෙන්නේ නම් මුදල් කාරක සභාව ලෙස අපි අනුමැතිය ලබා දෙන්නේ නෑ.


අනූපගේ වරප්‍රසාද ප්‍රශ්නයෙන් හර්ෂගේ රතු කට්ට පනී..

අනූප පැස්කුවෙල් අද මට එල්ලකළ අනිත් චෝදනාව තමයි මම පාර්ලිමේන්තු මන්ත්‍රීවරුන්ගේ ආර්ථික දැනුම වර්ධනය කිරීමට කළ වැඩසටහන වැරදියි කියන එකයි. ඒ තුළින් අපි බලාපොරොත්තු වුණේ පවතින ආර්ථික අර්බුදයේ බැරෑරුම්කම පිළිබඳව පාර්ලිමේන්තු මන්ත්‍රීවරුන්ව දැනුවත් කිරීම. ඒ සඳහා මෙරට ප්‍රමුඛ ආර්ථික විශේෂඥයින්ගේ සහාය අපි ලබාගත්තා.

එහි කිසිදු අක්‍රමිකතාවයක් සිදුවුණේ නෑ. හරි නම් මේ වගේ දැනුම බෙදන වැඩසටහන් කරන්න ඕන ආණ්ඩුව. අනූප පැස්කුවෙල්ලාගේ හඬ පිටුපස ඉන්නේ කවුද කියලා අපි දන්නවා.

මේ රට හොරු වලල්ලකට ගොදුරුවුණු රටක්. ඒ වලල්ලේ හොල්මන් තැනින් තැන මතු වෙනවා. අපි ඒවාට බය නෑ. මා මුදල් කාරක සභාවේ කටයුතු කළාටත් වඩා දැඩිව රට වෙනුවෙන් ඉදිරියේදී ඉටු කරනවා.

මාල කඩපු හොරෙක්ව සාමාන්‍ය මිනිහෙක් අල්ලල පොලීසියට භාර දුන්නොත් මිනිස්සු කියන්නේ නෑ, ඒක පොලීසියේ විෂය පඨයට අයිති එකක්. ඒ මනුස්සයා කළ වැඩේ වැරදියි කියලා. ඒ සත්කාරය වෙනුවෙන් ඔහුට මිනිස්සු තුති පුදනවා. ඒකයි සොබාදහම.

මම විෂය පඨයට අදාළ නැතත් හරි දේවල් කරන්න බය වෙන්නෙ නෑ. හොරුන්ට ගොඩක් රිදෙයි. ඒකට කමක් නෑ. මට සතුටුයි මේ රටේ පොදු ජනතාව වෙනුවෙන් පෙනී සිටීම ගැන.'' 

 
ගල් අඟුරු ටෙන්ඩරය සම්බන්ධයෙන් රාජ්‍ය මුදල් පිළිබඳ සභාව කළ විමර්ශනයේදී එහි සභාපති පාර්ලිමේන්තු මන්ත්‍රී ආචාර්ය හර්ෂ ද සිල්වා අත්තනෝමතික ලෙස ක්‍රියා කර ඇතැයි රාජ්‍ය අමාත්‍ය අනූප පැස්කුවල් අද (ඔක්. 7) පාර්ලිමේන්තුවේදී වරප්‍රසාද ප්‍රශ්නයක් මතු කළේ ය.

ඒ අනුව, හර්ෂ ද සිල්වා මන්ත්‍රීවරයා ඊට පිළිතුරු ලබා දීමට උත්සාහ කළ ද කතානායකවරයා සඳහන් කළේ, වරප්‍රසාද කමිටුව හමුවේ අදාළ කරුණු දක්වන ලෙස ය.

එම අවස්ථාවේදී කතානායකවරයාගේ ප්‍රකාශයත් සමග සභාවේ උණුසුම් විය.

හර්ෂ ද සිල්වා පිළිතුරු ලබා දීමට කිහිපවරක් ම අවසර ඉල්ලා සිටි අතර ඊට ප්‍රතිචාර දක්වමින් කතානායකවරයා මෙසේ පැවසීය.

“ඔබතුමා සැර කළාට කතා කරන්න දෙන්න බෑ. ඔබතුමාට අයිතියක් නෑ එහෙම කියන්න. එහෙම කතා කරන්න දෙන්න බෑ. වරප්‍රසාද කමිටුව ඉස්සරහ පිළිතුරු දෙන්න.”

එහිදී විපක්ෂ නායක සජිත් ප්‍රේමදාස, පාර්ලිමේන්තු මන්ත්‍රීවරුන් වන චමින්ද විජේසිරි, චන්දිම වීරක්කොඩි සහ මහින්දානන්ද අලුත්ගමගේ ඇතුළු මන්ත්‍රීවරුන් ඊට මැදිහත් වීමත් සමග සභාව තවත් උණුසුම් විය.

 

  


The LEADER Whatsapp Group එකට එකතුවෙන්න

 

Theleaderx2022

subscribeYT

WhatsApp Image 2021 09 13 at 13.49.58

නවතම පුවත්