ගාලුමුවදොර පිටියේ දී කුඩා දරුවන්ට හිංසා කළ පොලිස් නිලධාරීන් හා නිලධාරිණියන් සම්බන්ධයෙන්
ක්‍රියාමාර්ගයක් ගන්නා ලෙස දිවයිනේ ප්‍රමුඛතම ගුරු සංගමයක් ළමා ආරක්ෂාව සම්බන්ධයෙන් වගකීම් පැවරී ඇති රාජ්‍ය බලධාරීන්ගෙන් ඉල්ලා තිබේ.
ජාතික ළමා ආරක්ෂක අධිකාරිය වෙත ඔක්තෝබර් 10 වැනිදා පැමිණිල්ලක් ඉදිරිපත් කරමින් ලංකා ගුරු සංගමය පෙන්වා දෙන්නේ, විවේකි දිනයක දරුවන් නිදහසේ කාලය ගත කරන ස්ථානයක සාමකාමීත්වය නැති කොට කලබල කිරීමේ පොලිස් නිලධාරීන්ගේ ක්‍රියාකලාපය හේතුවෙන් දරුවන් දැඩි පීඩනයකට හා අනතුරුදායී තත්වයකට පත් වු බවයි.
''මෙම දරුවන් ගාලුමුවදොර පිටියට පැමිණියේ ඔවුන්ගේ දෙමව්පියන් සමග වන අතර, එය ගැටුම් ඇතිවන ස්ථානයක් නොවන අතර, ඉරිදා වැනි නිවාඩු දිනයන් හි දී විශාල පිරිසක් තම නිදහස් කාලය ගත කිරීමට පැමිණෙන ස්ථානයකි. මෙවැනි ස්ථානයක සාමකාමීත්වය නැති කොට කලබල කිරීමේ පොලිස් නිලධාරීන්ගේ ක්‍රියාකලාපය හේතුවෙන් දරුවන් දැඩි පීඩනයකට හා අනතුරුදායී තත්වයක පත් විය.''
කොළඹ ගාලු මුවදොර දී ඔක්තෝබර් 9 වැනිදා පැවැති සාමකාමී විරෝධතාවයකට සහ මළවුන් සැමරුමකට කඩා වැදී ඊට බාධා කිරීම හා එයට සහභාගී වූවන්ට "කෘර, අමානුෂික සහ අවමන් සහගත ලෙස" සැලකු බවට ජනමාධ්‍යවේදීන්ගේ සංවිධානයක්ද ශ්‍රී ලංකා පොලීසියට චෝදනා එල්ල කර තිබුනි.
ඔක්තෝම්බර් 09 දින ගාලුමුවදොර පිටියේ පැවති සාමකාමී විරෝධය අතරතුර පොලිස් අධිකාරීවරු, සහකාර පොලිස් අධිකාරීවරු සහ පොලිස් ස්ථානාධිපතිවරු ඇතුළු පොලිස් නිලධාරීන් හා නිලධාරිණියන් එම ස්ථානයට පැමිණ උද්ඝෝෂකයන්ට බාධා පමුණුවමින් කලහාරී ලෙස හැසිරිණු අතර, උද්ඝෝෂණයේ යෙදී සිටින පුද්ගලයන් කිහිපදෙනක් අත්අඩංගුවට ගත් බව සිහිපත් කරන ලංකා ගුරු සංගමයේ ප්‍රධාන ලේකම් ජෝසප් ස්ටාලින් පෙන්වා දෙන්නේ, එම අවස්ථාවේදී වයස අවුරුද්දක් වන කුඩා දරුවකු වඩාගෙන සිටින පියකුගෙන් දරුවා උදුරාගැනීමට තැත්කළ අතර එම කලබලයට මැදි වූ දරුවා බියට පත්ව වමනය ඇතුළු සංකූලතා ගණනාවකට ලක්ව එදිනම රාත්‍රියේ රිජ්වේ ආර්යා ළමා රෝහලට ඇතුළත් කළ බවයි.
ඊට අමතරව තවත් ලාබාල දැරියකගේ මව අත්අඩංගුවට ගැනීමට පොලිස් නිලධාරිණියන් පිරිසක් උත්සාහ කළ අතර, එම උත්සාහයේදී බියට පත්ව මව ළඟට සමීප වීමට උත්සාහ කළ දැරිය පසෙකට ඇද දමමින් දැරියට හිංසා වන ආකාරයෙන් පොලිස් නිලධාරිණියන් කටයුතු කළ බවටත් ජ්‍යෙෂ්ඨ ගුරු සංගම් නායකයා චෝදනා කරයි.
එසේම උවිඳු රාජපක්ෂ නැමති 16 හැවිරිදි පාසල් සිසුවකු අත්අඩංගුවට ගැනීමට පොලීසිය කටයුතු කළ අතර, තම මව සමග පැමිණි දරුවා එම විරෝධතාවය වීඩියෝ ගත කරමින් සිටි බවයි ලංකාගුරු සංගමය පවසස්නේ.
ඊට අමතරව එම ස්ථානයේ සාමකාමීව විරෝධයේ සිටි මෙන්ම ක්‍රීඩා කරමින් සිටි දරුවන් බියට පත් කරමින් හිංසාවට පත් කරමින් පොලීසිය කටයුතු කරනු දක්නට ලැබුන බවටත් ගුරු සංගම් නායකයා චෝදනා කරයි.
පොලිස් නිලධාරීන්ගේ ක්‍රියාකලාපය සම්බන්ධයෙන් පරීක්ෂණයක් සිදු කරන ලෙසත්, මෙම සිද්ධියේ දී දරුවන්ට හිංසා කළ පොලිස් නිලධාරීන් හා නිලධාරිණියන් සම්බන්ධයෙන් ක්‍රියාමාර්ගයක් ගන්නා ලෙසත් ලංකා ගුරු සංගමය ජාතික ළමා ආරක්ෂක අධිකාරිය වෙත පැමිණිලක් ඉදිපත් කරමින් වැඩි දුරටත් ඉල්ලා සිටි.
