ව්‍යාපාරිකයන් ඇතුලු පුද්ගලයන් රටවා රුපියල් කෝටි ගණනින් මුදල් වංචා කළ බව චෝදනා එල්ල වී සිටින තිළිණි ප්‍රියමාලිට එරෙහිව රුපියල් කෝටි 75 ක
වංචාවක් සම්බන්ධයෙන් තවත් පැමිණිල්ලක් අපරාධ පරීක්ෂණ දෙපාර්තමේන්තුවට ලැබුණ බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිඥ නිහාල් තල්දූව පවසයි.
කොළඹ කුරුදුවත්ත ප්‍රදේශයේ පදිංචි ව්‍යාපාරිකයකු මෙම පැමිණිල්ල අපරාධ පරීක්ෂණ දෙපාර්තමේන්තුව වෙත ඉදිරිපත් කළ බවද පොලිස් මාධ්‍ය ප්‍රකාශකවරයා කීය.
මේ අනුව මුදල් වංචා කිරීම සම්බන්ධයෙන් සැකකාරියට එරෙහිව පැමිණිලි 11 ක් අද දිනය වනවිට ලැබී ඇති බවද අපරාධ පරීක්ෂණ දෙපාර්තමේන්තු ආරංචි මාර්ග පවසයි.
මෙම සැකකාරිය මුදල වංචාවට අමතරව විවිධ පුද්ගලයන්ට ආචාර්ය පදවි ලබා දෙන ආයතනයක් ද පවත්වාගෙන ගොස් ඇති අතර, රටේ ජනප්‍රිය පුද්ගලයන්ට, නළු නිළියන්ට ඇතුලු පිරිසට එම ආයතනය හරහා ආචාර්ය උපාධි ද ලබා දී ඇති බව අපරාධ පරීක්ෂණ දෙපාර්තමේන්තුව තොරතුරු හෙළි කරගෙන ඇත.
තිළිණි ප්‍රියමාලි ලෝක වෙළද මධ්‍යස්ථානයේ පවත්වාගෙන ගිය ව්‍යාපාරික ස්ථානයේ සේවක සේවිකාවන්ගෙන් ප්‍රකාශ ලබා ගැනීම ආරම්භ කළ බවද අපරාධ පරීක්ෂණ දෙපාර්තමේන්තු ආරංචි මාර්ග පවසයි.
මෙම ව්‍යාපාරික ස්ථානයේ මාධ්‍ය විශේෂඥයන් වශයෙන් කටයුතු කළ ජනප්‍රිය නිවේදිකා සුරංගි කොඩිතුවක්කු හා ධනංජය නානායක්කාර යන දෙදෙනා ඊයේ (13) පෙරවරුවේ අපරාධ පරීක්ෂණ දෙපාර්තමේන්තුවට කැඳවා සිද්ධිය සම්බන්ධයෙන් ප්‍රකාශ ලබාගෙත් බවද පොලිස් ආරංචි මර්ග පවසයි.
ඉදිරි දිනවල දී තවත් සේවක සේවිකාවන්ගෙන් ප්‍රකාශ ලබා ගැනීමට නියමිතව ඇත.
මේ අතර එම කාර්යාලයේ තිබු සැකකාරියට අයත් සේප්පුවක් ද අපරාධ පරීක්ෂණ දෙපාර්තමේන්තුව පරීක්ෂාවට ලක් කළ ද එහි මුදල් කිහිවක් නොතිබූ බවද එම ආරංචි මාර්ග පවසයි.
ඇගේ දුරතකනය දත්ත හා විද්‍යුත් තැපෑල ඔස්සේ ලැබුණු හා යැවු පණිවිඩ සම්බන්ධයෙන් ද මේ වනවිට විමර්ශන ආරම්භ කර ඇති බවද එම ආරංචි මාර්ග පවසයි.
මෙම සැකකාරිය ඇතැම් පුද්ගලයන්ට සෘජුවම කතා කර මේ වංචාව සදහා සම්බන්ධ කරගෙන ඇති බවත්, තවත් පිරිසක් වෙනත් පාර්ශවයන් හරහා සම්බන්ධ කරගෙන ඇති බවද අපරාධ පරීක්ෂණ දෙපාර්තමේන්තු ආරංචි මාර්ග පවසයි.
මෙම සැකකාරිය සිදු කළ මුල්‍ය වංචා සිද්ධිය සම්බන්ධයෙන් වංචා සිද්ධියට අමතරව මුදල් විශූද්ධිකරණය යටතේ නීතිය ක්‍රියාත්මක කරන බවට අපරාධ පරීක්ෂණ දෙපාර්තමේන්තු ආරංචි මාර්ග පවසයි.
(lankadeepa.lk)
