දහතුන් වසරකට ඉහතදී සිය සමීපතමයන්ට අත් කර දුන් ඉරණම හෙළි නොකර මුදලක් ගෙවා බේරී යාමට උත්සාහ කරන

ආණ්ඩුව තම දරුවන් සොයා දෙන්නේ නම් එමෙන් දෙගුණයකට වැඩි මුදලක් දීමට සුදානම් බව ශ්‍රී ලංකාවේ දීර්ඝතම අරගලය අඛණ්ඩව පවත්වාගෙන යන යුද පීඩිත උතුරු නැගෙනහිර මව්වරුන් අගනගරයේදී විරෝධතාවකදී පවසා තිබේ.

අතුරුදහන් කළ අයකු වෙනුවෙන් රුපියල් ලක්ෂ දෙකක වන්දි මුදලක් ගෙවීමට පසුගියදා කැබිනට් මණ්ඩලය ගත් තීන්දුවට දැඩි විරෝධතාවය පළ කරන දෙමළ මව්වරුන් සිය අඛණ්ඩ අරගලයේ 2066 වැනි දිනයේ කොළඹ එක්සත් ජාතීන්ගේ කාර්යාලය ඉදිරිපිට උද්ඝෝෂණයක යෙදෙමින් සන්දේශයක් භාර දෙමින් ඉල්ලා සිටියේ සිය සමීපතමයන්ට අත් කළ ඉරණම සොයා ගැනීම සදහා ජාත්‍යන්තර මැදිහත්වීමකි.

JDS 1

JDS 2

පුද්ගලයකු අතුරුදන් වූ බව තහවුරු වුවහොත්, අතුරුදහන් වූ බවට සහතිකයක් ලබාගැනීමේ අවශ්‍යතාවය ඉවත් කරමින්, කලින් ගෙවීමට තීන්දු කළ ලක්ෂයක මුදල රුපියල් ලක්ෂ දෙකක් දක්වා වැඩි කිරීමට කැබිනට් මණ්ඩලය අනුමැතිය ලබාදී ඇති බව අමාත්‍ය බන්දුල ගුණවර්ධන පසුගියදා  ප්‍රකාශ කර තිබුනි. එම මුදල තම සටන අඩපන කිරීමට ගෙවන අල්ලසක් ලෙසින් ඥාතීහු දැඩි ලෙස ප්‍රතික්ෂේප කරති.



" අපේ ළමයි කෝ. අපේ ළමයි ඔක්කොටෝම මොනවද උනේ. මොනවද උනේ. අපේ ළමයිට මොනවද උනේ. අපිට සල්ලි එපා. අපි දෙනවා. ලක්ෂ පහක් දෙනවා.අපේ ළමයිට ඔයගොල්ලන්ගෙන්  ලක්ෂ දෙකක් අපිට ඕනේ වෙන්නේ නැ. අපි ලක්ෂ පහක් දෙනවා. අපේ ළමයිගේ ඇටකටුහරි පෙන්නන්න ඕනේ. අපි අන්තිමට අහනවා දෙකෙන් එකක් ඉවර වෙන්න ඕනේ," යි  විරෝධතාවයට එක්ව සිටි දෙමළ මාතාවක් හැඩු කදුලින් යුතුව සිංහල බසින් කියා සිටියාය.

සිංහල, දෙමළ සහ ඉංශ්‍රීසි යන භාෂා ත්‍රිත්වයෙන් ලියන ලද සටන් පුවරු හා බලහත්කාරයෙන් අතුරුදහන් කර සිටින සිය සමීපතමයන්ගේ ඡායාරූප ප්‍රදර්ශනය කරමින් කොළඹ,  එක්සත් ජාතීන්ගේ කාර්යාලය ඉදිරිපිට පැවැති විරෝධතාවය සදහා උතුරු-නැගෙනහිර අතුරුදහන්වූවන්ගේ ඥාතීහු 150කට වැඩි පිරිසක් එක්ව සිටි බව අගනගරයේ වාර්තාකරුවෝ පවසති.

4

3

2

003

002

කොළඹ පිහිටි එක්සත් ජාතීන්ගේ කාර්යාලයට අමරතව තවත් තානාපති කාර්යාල කිහිපයකටම සිය ඉල්ලීම් ඇතුලත් සන්දේශ භාර දීමට දෙමළ මව්වරුන් කටයුතු කළ බව වාර්තාකරුවෝ වැඩි දුරටත් පවසති.

තම දරුවන්ගේ ජීවිතයක වටිනාකම රුපියල් ලක්‍ෂ දෙකකට තක්සේරු කිරීමේ වික්‍රමසිංහ-රාජපක්‍ෂ ආණ්ඩුවේ වන්දි වැඩසටහන ප්‍රතික්ෂේප කරමින් මුලතිව් දිස්ත්‍රික්කයේ බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ සභාපතිනි මරියසුරේෂ් ඊශ්වරී පසුගියදා මාධ්‍ය හමුවක් පවත්වමින් චෝදනා කර තිබුනේ මුදල් ලබා දී යුක්තිය උදෙසා කරන අරගලය කඩා දැමීමේ උත්සාහයක් පවතින බවටයි.

''අපේ දරුවන්ගේ වටිනාකම රුපියල් ලක්‍ෂ දෙකක්ද? අපි හමුදාවට බාරදුන් අය, ගෙවල්වලට ඇවිල්ලා අපේ ඇස් ඉදිරිපිටම අරන් ගිය අය, සුදු වෑන් වලින් ඇවිත් පැහැරගෙන ගිය අය, මුහුදේ දී අත්අඩංගුවට ගත් අය, බාර දීපු කුඩා දරුවන් වෙනුවෙන් අපි සාක්ෂිකරුවන් විදියට ඉඳගෙන ඒ ගොල්ලන්නව හොයනවා. මේවාගේ සල්ලි  දීලා යුක්තිය උදෙසා කරන අපේ අරගලය බිඳ දමන්නයි ආණ්ඩුව හදන්නේ,'' `මුලතිව් මාධ්‍ය සමාජයේ දී වන්නි මාධ්‍යවේදීන් හමුවූ ඇය පවසා තිබුනි.

''මේ ලක්‍ෂ දෙක දීලා අපිව රවට්ටන්න හදන්නේ ශ්‍රී ලංකාව සම්බන්ධයෙන් ජිනීවා නුවර මානව හිමිකම් සැසියේදී සම්මත වුනු යෝජනාව වහගන්නයි. අපේ අඛණ්ඩ අරගලය බිඳ දමන්න හිතාගෙන වන්දි ගෙවන්න පටන් ගත්තේ අරගලයට මුහුණ දෙන්න බැරිව පළා ගිය ජනාධිපති ගෝඨාභය රාජපක්ෂ. කණගාටුයි කියන්න වත්මන් ජනාධිපති රනිල් වික්‍රමසිංහත් ඔවුන් එක්ක එකතුවෙලා අපිට කපටිකම් කරනවා.'' ඇය වැඩි දුරටත් සදහන් කර තිබුනි.



දහතුන් වසරකට ඉහතදී  සිය සමීපතමයන්ට අත් කර දුන් ඉරණම හෙළි කර ගැනීම වෙනුවෙන් උතුරු නැගෙනහිර දෙමළ මව්වරුන් ගෙන යන අඛණ්ඩ විරෝධතාවය මේ වන විට දින 2050 ත් පසුකර තිබේ.



යුද්ධයේ අවසාන දින වලදී ආරක්ෂක අංශ භාරයට පත් වීමෙන් පසුව හා යුද්ධයේ අවසන් මොහොතේ අතුරුදහන් වු තමන්ගේ ආදරණීයයන්ට අත්වූ ඉරණම හෙළි කරන ලෙස රජයට බල කරමින් 2017 වසරේ පෙබරවාරි සහ මාර්තු මාසවලදී වව්නියාව, කිලිනොච්චිය, යාපනය, මුලතිව්, ත්‍රිකුණාමලය සහ අම්පාර දිස්ත්‍රික්ක වල සත්‍යග්‍රහ ව්‍යාපාර ආරම්භ විය.

ඔවුන්ට අත්වු ඉරණම සෙවීම සදහා මෛත්‍රී රනිල් ආන්ඩුව විසින් තමන්ගේ නායකත්වයෙන් 2018 පෙබරවාරි 28 අතුරුදහන් වූ තැනැත්තන් පිළිබඳ කාර්යාලය (OMP) පිහිටුවන ලද නමුත් ඥාතීන්ට එකම සමීපතමයකු හෝ සොයා දීමට එම කාර්යාලයට  මේ තාක් හැකිවී  නැත.

වර්තමාන නීතිඥ සංගමයේ සභාපති ධුරය උසුලන OMP කාර්යාලයේ ආරම්භක ප්‍රධානී, ජනාධිපති නීතිඥ සාලිය පීරිස් ප්‍රකාශ කර තිබූ පරිදි යුද සමයේ අඩුම වශයෙන් විසිදහසක් හෝ අතුරුදහන් වී ඇත. එයින් සාතිශය බහුතරය ශ්‍රී ලංකා රාජයේ ආරක්ෂක අංශවලට භාර වුවන්ය.

 


The LEADER Whatsapp Group එකට එකතුවෙන්න

new logo

 

subscribeYT

WhatsApp Image 2021 09 13 at 13.49.58

නවතම පුවත්