ශ්‍රී ලංකාවට විදේශ විනිමය උපයා දෙන වතු කම්කරුවන්ගේ ජීවිත වලට එල්ල වී ඇති තර්ජන සම්බන්ධයෙන් විපක්ෂයේ මන්ත්‍රීවරයෙක් හෙළි කර තිබේ.



සමගි ජන බලවේගයේ බදුල්ල දිස්ත්‍රික් පාර්ලිමේන්තු මන්ත්‍රී වඩිවේල් සුරේෂ් ඔක්තෝබර් 18 වැනිදා පාර්ලිමේන්තුව අමතමින් සඳහන් කළේ පසුගිය වසරක කාලය තුළ බඹර ප්‍රහාර හේතුවෙන් වතුකරයේ මිය ගොස් ඇති කම්කරුවන් ගණන 127 දෙනකු පමණ වන බවයි.


එපමණක් නොව සර්පයන් දෂ්ඨ කිරීම මෙන්ම දිවියන්ගේ ප්‍රහාරවලට ලක්වීම නිසා වතු කම්කරුවන් නිරන්තරයෙන් ජීවිත තර්ජනයට මුහුණ දී සිටින බවයි පාර්ලිමේන්තු මන්ත්‍රීවරයා එහිදී වැඩි දුරටත් සදහන් කළේ.

 

ලංකා ජාතික වතු කම්කරු සංගමයේ මහලේකම් ද වන පාර්ලිමේන්තු මන්ත්‍රී  වඩිවේල් සුරේෂ් සුරේෂ් අවධාරණය කරන්නේ නිසියාකාර නඩත්තුවක් නොමැති කමින් තේ වතු වනාන්තර බවට පත්වෙද්දී වන සතුන් තේ වතු දෙසට සහ මිනිස් වාසස්ථාන කරා ගමන් කරන බවයි.

 

මීට සති දෙකකට පෙර පස්සර කනවරැල්ල වත්තේ විසි හය හැවිරිදි තමිල්හර්ෂන් ගනේෂමුර්ති නමැති තරුණ වතු කම්කරුවා විදුලි සැර වැදී මිය ගිය ආකාරය සිහිපත් කරන මන්ත්‍රීවරයා පෙන්වා දෙන්නේ දිවියන්ගේ ප්‍රහාරවලට අමතරව කම්කරුවන් ඌරන්ගේ ප්‍රහාරවලටද ලක් වන බවයි.


"ඌරන්ගේ සහ දිවියන්ගේ ප්‍රහාරවලින්  වතු  කම්කරුවන් මිය ගිහිල්ලා තියනවා. තේ වතු වනාන්තර බවට පත්වෙමින් තියනවා.  අපි ආර්ථිකය ගැන කතා කරනවා. මේ ඉඩම් අපේ කඳුකර ජනතාවට ලබා දෙනවා වෙනුවට වනාන්තරයේ වෙසෙන සතුන් මිනිසුන්ගේ වාසස්ථානවලට ඇවිල්ලා මිනිස් ජීවිත බිලිගන්නවා."


වන සතුන්ගේ ප්‍රහාර වලට වතු කම්කරුවන් ලක්වු අවස්ථා කිහිපයක්ම පාර්ලිමේන්තු මන්ත්‍රීවරයා එහිදී සදහන් කළේය.


"හැටන් ප්‍රදේශයෙන් කොටි පැටවුන් හමුවෙනවා. තෙල්බැද්ද  වතුයායේ බඹරු දෂ්ඨ කිරීමෙන් පුද්ගලයෙකු මිය ගිහිල්ලා තියනවා. කොක්කාගලෙයි  වතුයායේදී පුද්ගලයන් තුන්දෙනෙක්ට සර්පයයෝ  දෂ්ඨ කරලා තියනවා. ගෝනගලෙයි උද්‍යානයේ පුද්ගලයෙකුට ද සර්පයෙකු දෂ්ඨ කර තිබෙනවා."

 

වැවිලි කර්මාන්ත අමාත්‍යාංශය සහ කර්මාන්ත අමාත්‍යාංශය මේ සම්බන්ධයෙන් අවධානය යොමු නොකළ බවට චෝදනා කරන මන්ත්‍රීවරයා ප්‍රශ්න කරන්නේ කම්කරුවන් වතු සමාගම්වලට බාරදී ආණ්ඩුව අහක බලාගෙන ඉන්නවාද යන්නයි.

 

වන සතුන්ගේ ප්‍රහාරවලට ලක්වූවන්ට කොපමණ වන්දි මුදලක් ලබා දෙනවාද? වගකිවයුතු අමාත්‍යාංශය වන්දි සම්බන්ධයෙන් ගෙන ඇති පියවර මොනවාද? යන්න පාර්ලිමේන්තුවේදී ප්‍රශ්න කළ වඩිවේල් සුරේෂ් විපක්ෂයේ මන්ත්‍රීවරයා එහිදී අවධාරණය කලේ  ආණ්ඩුක්‍රම ව්‍යවස්ථා සංශෝධනයේදී වතු කම්කරුවන්ගේ  ඉඩම් අයිතිය සහ නිවාස අයිතිය  තහවුරු කළ යුතු බවයි.


"ආණ්‌ඩුව කොටි ගැනවත් සැලකිල්ලක්‌ නැහැ." මන්ත්‍රීවරයා තව දුරටත් සදහන් කළේය.


 

subscribeYT

WhatsApp Image 2021 09 13 at 13.49.58

නවතම පුවත්