දීපවාලි උත්සවය වෙනුවෙන් ජනාධිපති පොදු සමාව ලබා දුන් බවට ආණ්ඩුව විසින් ප්‍රකාශයට පත් කරන ලද

ත්‍රස්ත පනත යටතේ සිරගත කර සිටි දෙමළ දේශපාලන සිරකරුවන්ගෙන් අඩකගේම පූර්ණ නිදහසට කොන්දේසි පනවා තිබේ.

ඉන් දෙදෙනකුටම තමන් සිරගත කිරීම අභියෝගයට ලක් කරමින් පවරා ඇති නඩු ඉවත් කරගන්නා ලෙස බලපෑම් කරන බව දෙමළ මන්ත්‍රීවරයකු පවසයි.

ජනාධිපති පොදු සමාව සමාව යටතේ දෙමළ දේශපාලන සිරකරුවන් අට දෙනකු නිදහස් කරන බව ජනාධිපති ලේකම් කාර්යාලය නිවේදනය කර තිබුණි.



එහෙත් පසුගිය සිකුරාදා [22] සම්පුර්ණ නිදහස ලබා සිය නිවෙස් කරා යාමට ඉඩ ලැබී ඇත්තේ ත්‍රස්ත පනත යටතේ අත්අඩංගුවට ගෙන වසර 23 ක් සිරගත කර සිටී වවුනියාවේ සතිවේල් ඉලන්ගේශ්වරන් ඇතුළු වසර 15 කට වැඩි කලක් සිරගත කර සිටී මඩකලපුවේ වීරකුමාර් රාහුලන්, මන්නාරමේ ජෙබ නේසන් සහ වත්තල රාමනාදන් නවාදීපන් නම් දේශපාලන සිරකරුවන් සිව් දෙනාට පමණකි.



''ජනාධිපති පොදු සමාව යටතේ නිදහස් කෙරුණු අට දෙනාගෙන් හතර දෙනෙක් සම්පුර්නයෙන්ම නිදහස් වෙලා ගෙවල් වලට ගිහින් තියෙනවා. ඉතිරි හතර දෙනා නිදහස් කරන්න නීතිය පැත්තෙන් අර්බුද මතු වෙලා,'' යැයි දෙමළ ජාතික සන්ධානයේ පාර්ලිමේන්තු මන්ත්‍රී චාල්ස් නිර්මලනාදන් පවසයි.

සෙසු දෙමළ දේශපාලන සිරකරුවන් සිව් දෙනා නිදහස් කිරීමට කොන්දේසි ඉදිරිපත් කර ඇති බව ඔහු පවසයි.



ත්‍රස්ත පනත යටතේ අත්අඩංගුවට ගෙන 2000 වසරේ සිට සිරගත කර සිටින දෙමළ දේශපාලන සිරකරුවෙකු වන රගුපති ශර්මා සහ වේලායුදන් වර්ධරාජන් ඔවුන්ට සිරදඩුවම් ලබා දීමට එරෙහිව මුලික අයිතිවාසිකම් පෙත්සම් ගොනු කර තිබේ. ''මොවුන් දෙදෙනාව  සම්පුර්ණයෙන්ම නිදහස් කිරීමට නම් ඔවුන් ගොනු කර ඇති පෙත්සම් ඉවත්කර ගන්න කියලා ඔවුන්ට දැනුම් දීලා තියෙනවා,'' යැයි පාර්ලිමේන්තු මන්ත්‍රී නිර්මලනාදන් කියයි.



''අනෙක් දෙන්නා සුදා හා කාන්තන් උසාවිය මගින් සිරදඩුවමට යටත් කරලා මාස හයක් පුනරුත්ථාපනය කළ යුතු කියලා තීන්දු කරලා තියෙන්නේ. පුනරුත්ථාපනයට යවන්නේ නැතිව නිදහස් කරනවා ද කියලා ජනාධිපති ලේකම් කාර්යාලයෙන් ලියුමක් එනකම් බලා ඉන්නවා.`` 


මේ අතර ත්‍රස්ත පනත යටතේ අත්අඩංගුවට ගෙන දිගු කලක් සිරගතව සිටී තවත් දෙමළ දේශපාලන සිරකරුවකු පසුගිය දා අධිකරණය විසින්  නිදහස් කෙරුනේ  ඔහුට එරෙහිව ගොනු කළ කිසිදු චෝදනාවක් ඔප්පු කිරීමට පැමිණිලි පාර්ශවය සමත් නොවූ නිසා බව දෙමළ ජාතික සන්ධාන මන්ත්‍රීවරයා පවසයි.

ජාතීන් අතර සංහිදියාව ගොඩනැගීමට අවංක උවමනාවක් ඇත්නම් කැබිනට් මණ්ඩලය හා නීතිපති දෙපාර්තමේන්තුව එකඟතාවකට පැමිණ සියළුම දේශපාලන සිරකරුවන්ට එරෙහිව පවරා ඇති නඩු ඉල්ලා අස්කරගෙන ඔවුන්  නිදහස් කළ හැකි බවට දේශපාලන සිරකරුවන් මුදාගැනීමේ ජාතික සංවිධානය නිවේදනයක්  නිකුත් කරමින් අවධාරණය කර තිබේ.


නඩු ඉවත් කරගන්න


''දෙමළ දේශපාලන සිරකරුවන් 8 දෙනකු ජනාධිපති පොදු සමාව යටතේ නිදහස් කිරීමට නියමිත බවට මාධ්‍යවල පළ වෙලා තිබුණා ඒත් අවසානයේ නිදහස ලැබුණේ 4 දෙනෙකුට විතරයි. නිවේදනය කරන්න කලින් ඔවුන්ව නිදහස් කරන්න තියෙන බාධක ඉවත් කරලා ඒගැන කියන්න ඕනේ,'' යැයි එම සංවිධානයේ සම්බන්ධිකාරක මාරිමුත්තු සතිවේල් පියතුමා පෙන්වා දෙයි.


වැරදිකරුවන්ට පොදු සමාව ලබා දීමේ ජනාධිපතිට ඇති හැකියාව ගැන කියමින්, අධිකරණයෙන් දඩුවම් ලැබූවන්ට ජනාධිපති පොදු සමාව යටතේ නිදහස ලබා දී ඇතැයි ප්‍රසිද්ධියේ පැවසීම මගින් දේශපාලන සිරකරුවන් තවත් දඩුවමකට යටත් කොට ඇති බවට සතිවේල් පියතුමා සිය නිවේදනය මගින් චෝදනා කර තිබේ.  

''උසාවියෙන් වරදකරු කර, ජනාධිපති සමාව ඉල්ලා සිටීම සඳහා දෙමළ නායකයන් එම ප්‍රකාශයම පුනරුච්චාරණය කිරීම දේශපාලන සිරකරුවන් ප්‍රසිද්ධියේ අපරාධකරුවන් ලෙස හුවා දැක්වීමක් වෙනවා. ඒ නිසා කැබිනට් මණ්ඩලයයි නීතිපති දෙපාර්තමේන්තුවයි කතා කරලා දේශපාලන සිරකරුවන්ට ගොනු කරලා තියෙන නඩු ඉල්ලා අස්කරගන්න කියලා ජනාධිපතිට ඉල්ලීම් කරන්න ඕනෑ. ඒක දේශපාලන සිරකරුවන්ට ගෞරවයක් වගේම වාර්ගික සන්හිදියාවටත් රුකුලක්.''

ත්‍රස්තවාදය වැළැක්වීමේ පනතට ජිවිත අහිමි කළ හැකි මුත්, ඊට ජීවිතය ලබා දිය නොහැකි බව පවසන දේශපාලන සිරකරුවන් මුදාගැනීමේ මධ්‍යස්ථානයේ සම්බන්ධිකාරක සතිවේල් පියතුමා සදහන් කරන්නේ ඒ ගැන දෙමළ ජනයා ගෙවුණු වසර 43 තුල අත්දුටු බවයි.


''මේ කුරිරු නීතිය හඳුන්වා දුන් 1979 අවුරුද්දේ ඉදන් දෙමළ ජනතාව ඊට එරෙහිව හඬ නඟනවා. මේ වන විට දකුණේ සිංහල ජනතාව ද එහි ම්ලේච්ඡත්වය අවබෝධ කරගෙන තියෙනවා. ජාත්‍යන්තර සංවිධානත් මිට එරෙහිව හඬ නගනවා. ඒත් ඒක අහෝසි කරන්න පාලකයන් සූදානම් නොවීම ඔවුන්ගේ දේශපාලන ම්ලේච්ඡත්වය පෙන්නුම් කිරීමක්.''

 
  

subscribeYT

WhatsApp Image 2021 09 13 at 13.49.58