''විරෝධතා ප්‍රශ්නයක් නෑ. විරෝධතාවලටත් වඩා අද රටට අවශ්‍ය විසඳුම්'' යයි 43 සේනාංක නායක, පාර්ලිමේන්තු මන්ත්‍රී පාඨලී චම්පික රණවක පවසයි.
තමන් කවදත් කොන්ද කෙළින් තබාගෙන රටට විසඳුම් ඉදිරිපත් කොට එකී විසඳුම් ක්‍රියාත්මක කිරීම සඳහා කැපවූ පිරිසක් බවත්, ජනවාරි මාසයේ තමන් ඉදිරිපත් කළ විසඳුම් වැඩපිළිවෙල නොපිළිගත් ආණ්ඩුව රට බංකොලොත් කරගත් බවත් ඔහු කියා සිටියි.
ඔහු පෙන්වා දෙන්නේ තමන් ඇතුළු පිරිස දැනට පවතින තත්ත්වය සඳහා ද විසඳුම් යෝජනා ඉදිරිපත් කොට ඇති බවය. විරෝධතාවල ප්‍රශ්නයක් නොමැති නමුත්, ඊටත් වඩා රටට දැන් අවශ්‍ය වන්නේ විසඳුම් බවත් හෙතෙම අවධාරණය කරයි.
ඔහු එම කාරණා සඳහන්කර සිටියේ, තුර්කි තානාපතිවරිය සමග සාකච්ඡාවකින් අනතුරුව මාධ්‍ය හමුවේ දක්වමිනි.
මාධ්‍ය හමුවේ වැඩිදුරටත් අදහස් දැක්වූ 43 සේනාංක නායකයා මෙසේද සඳහන් කළේය.
"අපි තුර්කි තානාපතිතුමිය සමග 43 සේනාංකය හැටියට සාකච්ඡාවක් සිදුකළා. තුර්කිය යුරෝපයත්, ආසියාවත් අතර තියෙන ඓතිහාසික රටක්. කලකට පෙර බලගතු ඔටෝමන් අධිරාජ්‍යය දැන් වර්තමානයේ ඉතාම වැදගත් දේශපාලන හා ආර්ථික භූමිකාවක්, මේ යුක්රේන ප්‍රශ්නය, ඒ වගේම අරාබිකරයේ ආසියාවේ මතුවෙලා තියෙන ප්‍රශ්නත් සමග සිදුකරගෙන යනවා."
"ලංකාව අලුත් මිතුරන් හොයාගත යුතුයි. අවු.9 කට කලින් තමයි තානාපති කාර්යාලය මෙහෙ ස්ථාපිත කළේ. අපිට ගොඩක් මෙහෙවරක් කරගන්න පුළුවන් රටක්. ඒ සම්බන්ධයෙන් තානාපති කාර්යාලයත්, ඒ රටත් සමග අපි අදහස් හුවමාරු කර ගැනීමක් තමයි කළේ."
ප්‍රශ්නය :
මොකද උනේ ඒ පැත්තෙන් මොනවද උනේ?
චම්පික :
ඒ අය අපිත් සමග යම් වෙළෙඳ සම්බන්ධතා තියෙනවා. අපේ පවතින දැනට පවතින විශේෂ ආර්ථික අර්බුදය හමුවේ ඒ අයගෙත් අත්දැකීම් තියෙනවා. පළවෙනි ලෝක යුද්ධය, දෙවෙනි ලෝක යුද්ධයත් එක්ක බිඳ වැටිලා තිබුණු රටක් ගොඩනැගීම ගැන. ඒ සමග වර්තමානයේ පවතින මේ යුක්රේන අර්බුදය සමග විශේෂයෙන්ම ලංකාවට ඒ අයගේ උපකාරය ලබාගන්න පුළුවන්. මොකද ඒ අය තමයි දැන් මැදිහත් වෙලා තියෙන්නේ. විශේෂයෙන්ම රුසියාවේ යුක්රේනයේ තිරිඟු පිටි, තෙල් ගෑස් ලබා ගැනීමේ කාර්යයන් වලට. ඒ වගේ කාරණා වලදී ලංකාවටත් ලොකු උපකාරයක් විශේෂයෙන්ම අපේ ආයෝජකයින්ට, අපේ ව්‍යාපාරිකයන්ට අනෙකුත් හැමකෙනාටම අවස්ථා තියෙන රටක්.
ප්‍රශ්නය :
විරෝධතාවයක් දක්වන්න අවස්ථාවක් ලැබිලා නැති තත්වයක් දැන් ඇතිවෙලා තියෙන්නේ රටේ. මොකද හිතන්නේ ඒ ගැන?
චම්පික :
ඇත්තටම ආණ්ඩුව මූල්‍ය අරමුදලත් සමග කටයුතු කරන්න යනවා නම් ඊට සමාන්තරව තමන්ගේ සහකම්පනය, මානුෂීයභාවය ප්‍රකාශයට පත් කරලා ඒ ජනතාව දිනාගත යුතුයි. ඒ වගේම මේ රටේ දැන් ජනතාවට විශාල වශයෙන් අවශ්‍ය විරෝධතාවය පමණක් නෙවෙයි විසඳුම්. අපි බලාපොරොත්තු වෙනවා පාර්ලිමේන්තුවේ ආර්ථික ස්ථායිකරණ අනුකමිටුවෙන් විසඳුම්වලිය අද කතානායකතුමාට භාරදෙන්න අපි බලාපොරොත්තු වෙනවා. විරෝධතා කමක් නෑ. වැඩියෙන් රටට අවශ්‍ය දැන් විසඳුම්.
ප්‍රශ්නය:
ඔබත් ආණ්ඩුවට මාරු වෙනවද?
චම්පික :
අවරගණයේ කතානේ. රටට විසඳුම් ඉදිරිපත් කරන කොට ඉතින් ඔන්න ආණ්ඩුවට යනවා. රනිල්ගේ පැත්ත ගන්නවා ආදී වශයෙන් කියනවා. අපි කවදත් කොන්ද කෙලින් තියාගෙන රටට විසඳුම් ඉදිරිපත් කරලා විසඳුම් ක්‍රියාත්මක කරන්න කැපවූ පිරිස. ඉතින් අපි මේ ජනවාරි මාසේ ඉදිරිපත් කළා. ඒක අහන්නේ නැතුව ගිහිල්ලා තමයි ආණ්ඩුව රට බංකොලොත් කර ගත්තේ. ඉතින් අපි දැනුත් විශ්වාස කරනවා රටට අවශ්‍ය විසඳුම් සහ ඒ සඳහා කටයුතු කිරීම.
විරෝධතා කමක් නැහැ. තමන්ගේ අයිතිවාසිකම් වෙනුවෙන්. නමුත් රටට ඕන විසඳුම් මිනිස්සුන්ට ඕනේ තමුන්ගේ දැවෙන ප්‍රශ්නවලට. ඖෂධ නැතිකමට, කෑම නැතිකමට. රස්සා නැතිකමට, ආදායම් අහිමිවීම ගැන, තෙල් නැතිවීම ගැන, විදුලිය නැතිවීම ගැන, ආර්ථික කඩාවැටීම, රටෙන් අපේ තරුණ පරම්පරාව පලා යන එක, වෘත්තීයවේදීන් මේ රටේ පලා යන එකට විසඳුම්.
මේ මොහොතේ දැන් ඇත්තම කතාව රාවයක් යනවනේ කණ්ඩායමක් එකතුවෙන්න යනවා කියලා. ඔබතුමා මොකක්ද හිතන්නේ? මොකක්ද මේ ඇත්තටම වෙන්නේ? ඒ මොකක් අරබයා ද යන්නේ?
චම්පික :
ඒක සිද්ධ වුණාම ඒ ඇත්තන්ගෙන් අහන්න. එහෙම විපක්ෂයේ කට්ටියක් යනවා නම් ඒ කළාට පස්සේ ඒ ඇත්තන්ගෙන් අහලා දැනගන්න ඕන දෙයක්. එක එක්කෙනා ඉතින් ප්‍රශ්න දිහා දකින විදිය වෙනස්. ඉතින් ඒ අනුව ඒගොල්ලෝ හිතනවා ඇති ආණ්ඩුවට එකතුවෙලා තමයි වඩාත්ම හොඳ සේවය කරන්න පුළුවන්. විපක්ෂේ ඉන්නවට වැඩියෙන් කියලා. එහෙම වෙන්න ඇති ඒගොල්ලෝ යනවා ඇත්තෙ. ඉතින් ඒගොල්ලන්ගේ කල්කිරියාවත්, ආණ්ඩුවේ කල්කිරියාවත් ඔවුන් ලබා දෙන මත තීරණය වෙන්නේ.
ප්‍රශ්නය:
මොනයම් හෝ මැතිවරණයක් සම්බන්ධව නිකන් ආසාවක්වත් නැද්ද මේ මොහොතේ?
චම්පික :
මැතිවරණ දැනට පවත්වන්න එපැයි. නීත්‍යානුකූලව පළාත් පාලන මැතිවරණය පවත්වන්න. ඒ සඳහා ආණ්ඩුව කටයුතු කළ යුතුයි. මැතිවරණය කල් දැමීම විසඳුමක් නෙමෙයි. මොකද ඒක ජනතාවගේ ස්වෛරීභාවයට අත තැබීමක් කියලා ශ්‍රේෂ්ඨාධිකරණයත් ප්‍රකාශ කරලා තිබුණා. ඉතින් ඒ නිසා ඒක කල් දැමීම කිසිසේත්ම සුදුසු නෑ. මේ මහජන අසහනය තවත් තීව්‍ර වෙන දෙයක්.
ප්‍රශ්නය:
සාමාන්‍යයෙන් මේ දැන් ආණ්ඩු පක්ෂයට නැතුව විපක්ෂයට එහෙම බලය ගියෝතින් නිකං මේ රට අරාජිකම වෙයිනේ. ඔය කියන පොඩි මැතිවරණෙත් එහෙම?
චම්පික :
නෑ එහෙම අදහසක් නෑ. විපක්ෂයට ගියහම රට අරාජික වෙනවා කියලා, රට දැනටත් අරාජිකයි. අපි විශ්වාස කරන්නෑ කයිවාරු ගහන පමණින්, අපිට දුන්නොත් අපි කරලා පෙන්නන්නම් වගේ, කයිවාරු ගහන පමණින් කරන්න පුළුවන් කියලා. අපි මේ රටේ ජනතාවට කියන්නේ, ඔය හුඟක් දෙනෙක් ආණ්ඩු කළා. සමහරු ප්‍රාදේශීය සභා කළා. සමහරු අමාත්‍යාංශ කළා. සමහරු ආණ්ඩු කළා. ඒවායේ කළමනාකරණ හැකියාව ගැන බලලා කටයුතු කරන්න. එහෙම නැතුව මේ කෙනෙක් අලුතෙන් ඇවිල්ලා තමන් ලස්සන වූ පමණින් නළුවෙක් වූ පමණින් ක්‍රීඩකයෙක් වූ පමණින්, රණවිරුවෙකු එහෙම නැත්නම් වෙනත් කලාකාරයෙක් වූ පමණින් ඔහුත් හොඳ කළමනාකාරයෙක් වෙන්නෑ. දේශපාලන පවුලකින් පැවත ආ පමණින් ද එහෙම කළමනාකාරිත්වයක් නැහැ. ඒ අයගේ අමාත්‍යාංශවල කෙරුවාව ඒගොල්ලෝ කරපු දේ ගැන බලලා ඕනේ මහජනයාව තීන්දු කරන්න. එහෙම තීන්දු නොගැනීමේ ප්‍රතිඵලයක් හැටියට තමයි මේ ගෝඨාභය රාජපක්ෂ මහත්තයා මහා මාධ්‍ය මුලාවකින් බලයට ඇවිල්ලා මේ රටට මේ විනාශය කළේ.
The LEADER Whatsapp Group එකට එකතුවෙන්න
