උතුරු නැගෙනහිර පළාතේ මත්ද්‍රව්‍ය උවදුර පැතිරී යාම පිටුපස රජයේ හමුදා සහ පොලිසිය සිටින බවට

පක්ෂ බේදයකින් තොරව දෙමළ ජනතා නියෝජිතයන්ගෙන් චෝදනා එල්ල වෙමින් පවතී.

තුන් මාසයක් තරම් කෙටි කාලයක් තුලදී මත්ද්‍රව්‍ය පාවිච්චියෙන් දස දෙනකු මරුමුවට පත්වූ බව උතුරෙන් වාර්තාවේ.

දෙමළ ජාතික ජනතා පෙරමුණේ නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් පවසන්නේ හමුදා හා පොලිස් දැඩි ලෙස යොදා තිබෙන මෙම පළාත් වල මත්ද්‍රව්‍ය අලෙවිය හා භාවිතය ගැන ආණ්ඩුව සුදුසු පියවර ගත යුතු බවයි.

``මත්ද්‍රව්‍ය අත්අඩංගුවට ගත්තාට පසු උසාවිය හරහා ඒවා රස පරීක්‍ෂක වෙත යවන්න ඕනෑ. පොලිසිය කෙලින්ම යවන එක නවත්වන්න ඕනෑ.



යාපන අර්ධද්වීපය පුරා මත්ද්‍රව්‍ය උවදුර පැතිර යාම ඇරඹියේ යුද්ධය අවසන් වීමෙන් පසු හමුදා, නාවික, ගුවන් සහ පොලිස්  ආරක්‍ෂක අංශ පාලනය පැවතියදී බවට ඊළාම් ජනතා විප්ලවකාරී විමුක්ති පෙරමුණේ නායක, හිටපු පාර්ලිමේන්තු මන්ත්‍රී සුරේෂ් ප්‍රේමචන්ද්‍රන් පවසයි.



''හමුදා බුද්ධි අංශ, නාවික බුද්ධි අංශ, ගුවන් බුද්ධි අංශ, පොලිස් බුද්ධි අංශ, ත්‍රස්ත විමර්ශන බුද්ධි අංශ, වගේ විවිධ වර්ගයේ බුද්ධි අංශ උතුරේ ක්‍රියාත්මක වෙනවා. එහෙත් මත්ද්‍රව්‍ය එනවා. මේ බුද්ධි අංශ මොනවද කරන්නේ.''

යාපනය මාධ්‍ය සමාජයේදී  මාධ්‍යවේදීන් හමුවූ EPLF නායක ප්‍රේමචන්ද්‍රන් ප්‍රශ්න කර සිටින්නේ විදී හරස් කොට සෝදිසි මුර කපොලු දැමීමෙන් මත්ද්‍රව්‍ය බෙදාහරිම, අලෙවිය හා භාවිතය නැවැත්විය හැකිද යන්නයි.

''නාවික හමුදාව ඉන්දීය ධිවරයන්ව බෝට්ටු පිටින්ම අත්අඩංගුවට ගන්නවා. කේරල ගංජා මෙහෙ තහනම් කරනවා. ඒත්  අලිමංකඩ හා වවුනියා මුරපොළවල් හරහා දකුණේ ඉඳන් උතුරට කොකේන්, හෙරොයින්, අයිස් වගේ දේවල් එනවා. සිසුන් හා තරුණයන් අතරේ බෙදා හරිනවා.''



දෙමළ ශක්තිය බිඳීමේ මෙහෙයුමක්?

නිදහස, අයිතිය, බලය වෙනුවෙන් සටන් කිරීමට පෙළඹෙන උතුරේ දෙමළ තරුණ තරුණියන්ව මානසික හා ශාරීරික ලෙස ශක්තිය බිඳ දමා නිහඬ කිරීම සඳහා මත්ද්‍රව්‍ය පැතිරවීම බළල් අතක් ලෙස යොදා ගන්නේද යන සැකයක් ඇති බව  දෙමළ ජනතා ජාතික සන්ධානයේ නායක, උතුරු පළාත් සභාවේ හිටපු මහ ඇමැති සී.වී. විග්නේශ්වරන් පවසයි.



''කොටි පාලනය තිබුණු කාලේ උතුරේ කිසිම මත්ද්‍රව්‍ය ප්‍රශ්නයක් තිබ්බේ නැහැ. නාවික, ගුවන්, පාබල හමුදා හා පොලිසිය  උතුරේ පාලනයට ආවාට පස්සේ තමයි මේ වගේ මත්ද්‍රව්‍ය විකිණීම හා භාවිතය වැඩිවෙලා තියෙන්නේ. උතුරු නැගෙනහිර පළාත් වල පරිපාලනය අපිට දෙනවා නම්  මේවා ඔක්කොම සම්පුර්නයෙන්ම නැති කරනවා.''



මේ අතර උතුරු පළාත් ආණ්ඩුකාර ජීවන් ත්‍යාගරාජා ගේ උපදෙස් මත යාපනයේ නගරයේ ප්‍රධාන මාර්ග වල මුරකපොලු යොදා මත්ද්‍රව්‍ය බෙදාහැරීම ගැන සෝදිසි කිරීම් මේ දිනවල සිදුකෙරේ.

''පාසැල් ළමුන් හා තරුණයන් ඉලක්ක කරගෙන මත්ද්‍රව්‍ය අළෙවි කරන බවට ප්‍රසිද්ධ කතා බහක් ඇතිවෙලා තියෙනවා. ඒ නිසා සෝදිසි කිරීම් කරලා මත්ද්‍රව්‍ය පාවිච්චි කරන අය අත්අඩංගුවට ගන්නවා. එහෙම අය ඉන්නවා නම් ලඟම තියෙන හමුදා කඳවුරට කියන්න,'' යැයි යාපනය යුධ හමුදා අණ දෙන නිලධාරි මේජර් ජනරාල් චන්දන විජේසුන්දර ඉල්ලීමක් කරයි.  

  

The LEADER Whatsapp Group එකට එකතුවෙන්න

new logo

subscribeYT

WhatsApp Image 2021 09 13 at 13.49.58