වසර තුන හමාරකට අධික කාලයක් තිස්සේ අත්හිටුවා තිබූ ශ්‍රී ලංකාවෙන් මේතාක් හමුවූ දැවැන්තම සමූහ මිනී වලේ විමර්ශන යළි ඇරඹීම ප්‍රමාද කිරීමට
පොලිසිය උසාවියෙන් ඉල්ලා තිබේ.
මන්නාරම මහේස්ත්‍රාත් ඒ. එස් ඉබ්දුල්ලා විසින් ඔක්තෝබර් 17 වැනිදා පොලිසියට නියෝගය කළේ ස.තො.ස සමුහ මිනී වලේ විමර්ශන ඉක්මනින් ඇරඹන ලෙසයි.
මහේස්ත්‍රාත් උසාවියේදී ඊයේ [30] නඩුව කැඳවූ විට පොලීසිය කියා සිටියේ, මන්නාරම සමුහ මිනී වලේ කැනීම් වෙනුවෙන් ඒ ආසන්නයේ ඇති වෙළඳ සල් කඩා ඉවත් කිරීමටත්, නගරයට ජල සපයන නල පද්ධතියද අක්‍රිය කිරීමට සිදු වීමත් නිසා ඒ ගැන ක්‍රියා කිරීමට පොලිස් දෙපාර්තමේන්තුවේ නීති අංශයට යොමු කර ඇති බවයි.
මන්නාරම ස.තො.ස. සමුහ මිනී වලේ කැනීම් ආරම්භ කර විමර්ශනය කිරීමට තවත් කාලයක් අවශ්‍ය බව පොලිසිය උසාවියට කරුණු දක්වා තිබේ.
මෙහිදී අතුරුදහන් කළවුන්ගේ ඥාතින් වෙනුවෙන් පෙනී සිටින නීතිඥ වී.එස්. නිරංජන් කරුණු දක්වා සිටියේ මිට පෙර සොයා ගත් මිනිස් අස්ථි කොටස් හා අනෙකුත් නඩු භාණ්ඩ කිසිවක් මෙතෙක් අධිකරණයට ඉදරිපත් කර නොමැති බවකි.
මෙම නඩුව සම්බන්ධයෙන් වව්නියා මහාධිකරණය ලබා දී ඇති නියෝග ක්‍රියාත්මක විය යුතු බවට නීතිඥ නිරන්ජන් පෙන්වා දීමෙන් අනතුරුව මහේස්ත්‍රාත් වරයා පොලිසියට නියෝග කර සිටියේ කැනීම් ඇරඹීම හා නඩු භාණ්ඩ ගැන එළඹෙන ජනවාරි 27 වැනිදාට කරුණු ඉදිරිපත් කරන ලෙසයි. එදිනට නඩුව යළි කැඳ වෙනු ඇත.
දැනට 300 ඉක්මවලා
දරුවන් 28 දෙනකු ඇතුලු තුන්සියයකට අධික ගැහැණු සහ පිරිමි ඇට සැකිලි හමුවූ මන්නාරම සමුහ මිනී වලේ කැනීම් කටයුතු යළි ආරම්භ කරන ලෙස මන්නාරම අධිකරණය විසින් 2022 පෙබරවාරි 22දා නියෝග කරන ලද්දේ බලහත්කාරයෙන් අතුරුදහන් කළවුන්ගේ ඥාතීන් විසින් කරන ලද ඉල්ලීමකට අවසර දෙමිනි.
මන්නාරම සතොස භූමියෙන් 2018 මැයි මාසයේ මිනිස් ඇටකටු හමුවීමෙන් අනතුරුව ආරම්භ කළ කැනීම් කටයුතු එයින් අවුරුද්දකට පසු නවතා දමන ලද්දේ මාස තුනකට පමණෙකියි ප්‍රකාශයට පත් කරමිනි.
එසේ වෙතත්, ශ්‍රී ලංකා යුද හමුදාවට බාර දීමෙන් පසුත්, පැහැරගෙන යාමෙන් පසුත් අතුරුදහන් වූවන්ගේ ඥාතීන් විසින් ඉල්ලා සිටින තුරු කැනීම් කටයුතු ආරම්භ කෙරුනේ නැත.
මන්නාරම සතොස සමුහ මිනීවලේ කැනීම් කටයුතු සිදුකළ වෝහාරික විශේෂඥ සමින්ද රාජපක්ෂ ඉකුත් ඔක්තෝම්බර් 17 වැනිදා පැවති නඩු වාරයේදී අධිකරණයට දැනුම් දී ඇත්තේ, විමර්ශන කටයුතු යළි ආරම්භ කිරීම සදහා වන වියදම් ඇතුළු විස්තර වාර්තාවක් මැයි 18 වැනිදා අධිකරණයට ඉදිරිපත් කර තිබෙන බවයි.
විමර්ශන කටයුතු යළි ඇරඹීම සදහා අවශ්‍ය මුදල් සම්බන්ධයෙන් ප්‍රශ්නයක් පවතීනම් අතුරුදහන් තැනැත්තන් පිළිබඳ කාර්යාලය (OMP) හරහා මුදල් සොයා දීමේ හැකියාවක් පවතින බව එම කාර්යාලය නියෝජනය කරමින් අධිකරණයට පැමිණ සිටි නීතිඥයා පැවසු බව මන්නාරමේ අධිකරණ වාර්තාකරුවෝ ප්‍රකාශ කළහ.
අපරාධයක් සිදුවූ ස්ථානයක් ලෙස තීන්දු කරමින් මන්නාරම සතොස සමුහ මිනීවලේ කැනීම් කටයුතු සිදුකෙරෙන බව වෝහාරික විශේෂඥ සමින්ද රාජපක්ෂ විමර්ශන කටයුතු සිදුකෙරෙන 190 වැනි දිනයේදී මාධ්‍යවේදීන්ට කියා තිබුනි.
මන්නාරම සතොස සමූහ මිනීවලෙන් ගොඩගත් අස්ථි කොටස් හයක් පරීක්ෂා කළ ෆ්ලොරීඩාවේ, මියාමි හි පිහිටි බීටා ඇනලිටික්ස් ආයතනය විසින් නිගමනය කොට තිබුනේ ඒවා ක්‍රිස්තු වර්ෂ 1404 ත් 1635 ත් අතර සියවස් ගණනක කාල පරාසයකට අයත් බවය. එම නිගමනය දැඩි ලෙස ප්‍රතික්ෂේප කරන කැළණිය විශ්ව විද්‍යාලයට අනුබද්ධිත පුරාවිද්‍යා පශ්චාත් අධ්‍යයන අංශයේ මහාචාර්ය රාජ් සෝමදේව සමූහ මිනිවළෙහි කාලය පිළිබඳ විශ්වසනීය නිගමනයකට එළැඹිය හැකි මිනිස් අස්ථි කොටස් සමගින් ගොඩගෙන ඇති භාණ්ඩ සිය ගණනක් සම්බන්ධයෙන් 2019 ජූලි මාසයේ අලුතින් පරීක්ෂණ ආරම්භ කර තිබුණි.
මේ තාක් හමුවූ ඇටකටු අතරින් සමහරක ගැඹුරු කැපුම් තුවාල දැකගත හැකි වූ අතර එකට ගැටගසා තිබුණු ආකාරයක් දිස්වන අස්ථි කොටස් ද සමූහ මිනී වලෙන් සොයා ගෙන තිබුණි.
The LEADER Whatsapp Group එකට එකතුවෙන්න
