රට දැඩි ආර්ථික අහේනියකට මුහුණ දී සිටියදී කිසිදු සහනයක් නොලද වතු කම්ක

රු පවුල් අයවැය මගින්ද තවදුරටත් සාගින්නේ හෙලා ඇති බවට කඳුකර ජනයාගේ අයිතීන් වෙනුවෙන් පෙනී සිටින සංවිධාන දිගින් දිගටම චෝදනා කරද්දී, වතුකරයේ ජනතාව වෙනුවෙන් ඉංග්‍රීසි මාධ්‍යයෙන් ක්‍රියාත්මක දිවා සුරැකුම් මධ්‍යස්ථාන ආරම්භ කිරීමට විදේශ රැකියා අමාත්‍යාංශය සැරසෙයි.

වතු කම්කරු ජනතාව ලංකාවට පැමිණ වසර දෙසීයක් සම්පූර්ණවීම නිමිත්තෙන් පැවැත්වෙන වැඩසටහන් මාලාව අනුව මෙසේ ඉංග්‍රීසි මාධ්‍ය දිවා සුරකුම් මධ්‍යස්ථාන ආරම්භ කිරීමට නියමිතව ඇති බව රජය නිවේදනය කර ඇත.

 

"වතු කම්කරු ජනතාවගේ සුබසාධනය සම්බන්ධයෙන් විශේෂ අවධානයක් යොමු කරන ලෙසට කම්කරු සහ විදේශ රැකියා අමාත්‍ය මනුෂ නානායක්කාර මහතා උපදෙස් ලබාදී ඇති අතර ඒ අනුව මෙම ඉංග්‍රීසි මාධ්‍ය දිවා සුරැකුම් මධ්‍යස්ථාන ආරම්භ කෙරේ."


විදේශ ගත ශ්‍රමිකයන්ගේ දරුවන් සදහා ඉංග්‍රීසි මාධ්‍ය දිවා සුරකුම් මධ්‍යස්ථාන දීප ව්‍යාප්තව ආරම්භ කිරීම සදහා වන විශේෂ ව්‍යාපෘතියක නියමු ව්‍යාපෘති ජනවාරි මාසය වන විට ක්‍රියාත්මක කිරීමට අපේක්ෂිත අතර එය වතුකරයේ ජනතාව වෙනුවෙන් ද පුළුල් කිරීමට සැලසුම් කර ඇති බව රජය වැඩි දුරටත් පවසයි.


ශ්‍රී ලංකාවේ දුප්පතුන්ගෙන් අඩකට වැඩි පිරිසක් හමුවන්නේ වතුකරයෙනි.

ඒ අනුව දරිද්‍රතාවයෙන් පෙළෙන සියයට 51 ක්වූ වැඩි ජන කොටසක් වාර්තා වනුයේ වතු කම්කරු ජිවිත ඇසුරින් බවට රටේ ආහාර අර්බුදය ගැන ගෘහ මට්ටමේ සමීක්ෂණවලදී සනාථ වූ බව නූතන වහල්භාවය පිළිබඳ එක්සත් ජාතීන්ගේ විශේෂ වාර්තාකරු ටොමෝයා ඔබෝකාටා සඳහන් කර තිබුණි.

එක්සත් ජාතීන්ගේ ආහාර හා කෘෂිකර්ම සංවිධානයේ සහ ලෝක ආහාර සංවිධානයේ විශේෂ ඒකාබද්ධ වාර්තාව වූ ශ්‍රී ලංකාවේ ආහාර අර්බුදය ගැන තක්සේරුව, ලෝක ආහාර සංවිධානයේ අධීක්ෂණ වාර්තාව, ශ්‍රී ලංකා හා ජාත්‍යන්තර රතු කුරුස සංවිධානයේ ආර්ථික සමාලෝචනය සහ නූතන වහල්භාවය පිළිබඳ එක්සත් ජාතීන්ගේ විශේෂ වාර්තාකරු ටොමෝයා ඔබෝකාටා මානව හිමිකම් කොමිෂන් සභාවට ඉදිරිපත් කළ වාර්තාව ඇතුළු ජාත්‍යන්තර සංවිධාන හතරක් මගින් වතු කම්කරුවන් මුහුණ දී තිබෙන දුෂ්කර තත්වය පෙන්නුම් කර තිබේ.


ජීවත්වීමට සරිලන  වැටුපක් නොලැබීම, හිසට වහලක් නොමැතිවිම, සනීපාරක්ෂක පහසුකම් නොමැතිවීමට අමතරව බඹරුන්, දිවියන්, සර්පයන් ඇතුළු වන සතුන්ගෙන් වන හිරිහැර නිසා වතු කම්කරුවන් නිරන්තරයෙන් පීඩා විදිමින් සිටි. මහනුවර සමාජ සංවර්ධන ආයතනයේ පෙරියසාමි මුතුලිංගම් අවධාරණය කරන පරිදි දැනට එක්ලක්ෂ හැට නම දාහක් වතු කම්කරුවන් ලයින් කාමරයක් තුළ කොටුවී සිටින අතර ඔවුන් වෙනුවෙන් ඉදි කළ නිවාස තිස් පන් දහසකට අධික නිවාස වල අයිතිය තවමත් ඔවුන් වෙත පවරා නැත.


මේ වන විට වතුකරයේ ජනතාව වාසය කරන අඩු පහසුකම් සහිත නිවාස වර්ගීකරණය කරමින් සංඛ්‍යා ලේඛනද ඉදිරිපත් කළ දෙමළ ප්‍රගතිශීලි සන්ධානයේ නියෝජ්‍ය නායක වේලුසාමි රාධක්‍රිෂ්ණන්  2022 වසරේ නොවැම්බර් 30 වැනිදා පාර්ලිමේන්තුවේදී සදහන් කළේ වතුකරයේ ජනතාව වෙනුවෙන් අවශ්‍ය වී තිබෙන නිවාස ප්‍රමාණය එක්ලක්ෂ පනස් දාහකට ආසන්න බවයි.

ශ්‍රී ලංකාවේ තමන්ටම කියා නිවසක් අහිමි ජනතාව අතර ඉදිරියෙන්ම සිටින්නේ වතු කරයේ කම්කරුවන්ය.

වී. රාධක්‍රිෂ්ණන් මන්ත්‍රීවරයාට අනුව වතු කම්කරු ජනතාව වෙනුවෙන් අවශ්‍ය වී තිබෙන වැසිකිලි ප්‍රමාණය 36158 කි.

දෛනික වැටුප රුපියල් දහසක් දක්වා වැඩි කර ගැනීම වෙනුවෙන් වතු කම්කරුවන් වසර කිහිපයක් තිස්සේ කරන අරගලයටද මේතාක් සාධාරණයක් ඉටුවී නැත.


පසුගිය වසරේ නොවැම්බර් මාසයේදී මාධ්‍ය නිවේදනයක් නිකුත් කරමින් කඳුකර ජනයා රැකගැනීමේ ව්‍යාපාරයේ උපදේශක මාරිමුත්තු සතිවේල් පියතුමා චෝදනා කර තිබුනේ 2023 වසරට වතු කම්කරුවන් මෙරටට රැගෙන විත් වසර 200 ක් සම්පුර්ණ වුවද ඔවුන්ගේ ජිවිත යහපත් කිරීමට ආණ්ඩුව කිසිදු පියවරක් ගෙන නොමැති බවයි.


වතු කම්කරුවන් ලංකාවට පැමිණ වසර දෙසීයක් සම්පූර්ණවීම නිමිත්තෙන් පැවැත්වෙන වැඩසටහන් මාලාවට සමගාමීව ඔවුන්ගේ සුබසාධනය වෙනුවෙන් විශේෂ ව්‍යාපෘති කිහිපයක් ක්‍රියාත්මක කිරීමට නියමිතව ඇති බව රජය නිවේදනය කළත් වතු කම්කරු ජනතාව පීඩාවිදින මුලික ප්‍රශ්න සදහා ලබාදෙන විසදුම් කවරේදැයි රජය තවම ප්‍රකාශයට පත් කර නැත.
 

 


JW

Follow Us

Image
Image
Image
Image
Image
Image

Exchange Rates

නවතම පුවත්