ශ්‍රී ලංකාවේ වාසය කරන ආදිවාසී ජනතාවගේ අයිතිවාසිකම් නීතියෙන්ම සහතික කිරීමේ අවශ්‍යතාව ආදිවාසී නායකයා ශ්‍රී ලංකා පාර්ලිමේන්තුව හමුවේ අවධාරණය කර ති‌‌බේ.



ආදිවාසී නායක ඌරුවරිගේ වන්නිලැත්තෝ රටේ දේශපාලන ප්‍රධානීන් වෙත පෙන්වා දී ඇත්තේ තම ජනතාවගේ පැවැත්ම, අයිතීන් සහ නිදහස පිළිගෙන ඔවුන්ගේ යහපැවැත්ම ආරක්ෂා කිරීම සදහා නීති සම්පාදනය කරමින් නව පනතක් සැකසීම කාලීන අවශ්‍යතාවක්  බවයි.

ශ්‍රී ලංකා පාර්ලිමේන්තුවේ සන්නිවේදන දෙපාර්තමේතුව පවසන්නේ ආදිවාසී නායක ඌරුවරිගේ වන්නිලැත්තෝ ප්‍රමුඛ මෙරට වෙසෙන ආදිවාසී ප්‍රජාවගේ නායකයෝ ජනවාරි 17 වැනිදා පාර්ලිමේන්තුවට පැමිණ කථානායක මහින්ද යාපා අබේවර්ධන, අග්‍රාමාත්‍ය  දිනේෂ්  ගුණවර්ධන සහ විපක්ෂ නායක සජිත් ප්‍රේමදාස හමුවු අවස්ථවේදී ඒ බව සදහන් කළ බවයි.

ඌව, නැගෙනහිර උතුරු මැද සහ අනෙකුත් පළාත්වල ජීවත් වන ආදිවාසී කණ්ඩායම් හමුවී ඔවුන් මුහුණ දෙන විවිධ ගැටලු සම්බන්ධයෙන් විකල්ප ප්‍රතිපත්ති කේන්ද්‍රය සකස් කළ ප්‍රතිපත්ති සහ ඉල්ලීම් මාලාවක් ද එහිදී කථානායකවරයා, අග්‍රාමාත්‍යවරයා සහ විපක්ෂනායකවරයා වෙත  භාර දීම සිදු කර තිබේ.

ආදිවාසී ජනතාවගේ උන්නතිය සදහා යම් පියවර විවිධ අවස්ථාවලදී ගෙන තිබුණද ඒවාට නෛතික ශක්තිමත් බවක් නොමැතිවීම නිසා සිය ජීවනෝපාය සිදුකිරීමේදී ආදිවාසී ජනතාවට මුහුණදීමට සිදුවන විවිධ ගැටලු පිළිබඳව ප්‍රාදේශීය ආදිවාසී නායකයෝ එහිදී පෙන්වා දී ඇත.

 

1963 වසරෙන් පසු මෙරට ආදිවාසී ජනතාවගේ දත්ත සම්බන්ධයෙන් සංගණනයක් සිදුකොට නොමැති වීම ගැටළුවක් බව ද එහිදි ඔවුන් පෙන්වා දී ඇත.  " 1963න් පසුව සිදුකරන ලද සංගණනවලදී ආදිවාසී ප්‍රජාවගේ දත්ත ‘වෙනත්’ යන කාණ්ඩය යටතේ වර්ගීකරණය කිරීමෙන් අසාධාරණයක් සිදුව ඇති බවත් ආදිවාසී නායකයෝ දන්වා සිටියහ."

 

ලොව ඇතැම් රටවල ආදිවාසී ජනතාවගේ අයිතිවාසිකම් පිළිගෙන වෙනම පනතක් මගින් ඒ සදහා අවශ්‍ය නෛතික ප්‍රතිපාදන සපයා ඇති අයුරින් මෙරටද ආදිවාසී ජනතාවට එම පිළිගැනීම සහ අයිතිවාසිකම් හිමිවිය යුතු බව මෙහිදී සාකච්ඡා වු බව ශ්‍රී ලංකා පාර්ලිමේන්තුවේ සන්නිවේදන දෙපාර්තමේතුව වැඩි දුරටත් සදහන් කරයි.

එසේ ම ආදිවාසී කාන්තාවන් මුහුණ පා තිබෙන ක්ෂුද්‍ර මූල්‍ය ණය ගැටලුව පිළිබඳව ද එහිදී  සාකච්ඡා වී ඇත.

කථානායක මහින්ද යාපා අබේවර්ධන එහිදි  පවසා ඇත්තේ අදාළ ගැටළු  අග්‍රාමාත්‍යවරයා සමග ද සාකච්ඡා කොට ආදිවාසී ජනතාවගේ අයිතිවාසිකම් ආරක්ෂා කිරීමට සෑම පියවරක්ම ගන්නා බවයි.

අග්‍රාමාත්‍යවරයා ද පවසා ඇත්තේ ආදිවාසී ජනතාවගේ අයිතිවාසිකම් සුරක්ෂිත කිරීම සදහා අවශ්‍ය පූර්ණ සහය  ලබා දෙන බවයි.

" ආදිවාසී ජනයා ප්‍රාදේශීය වශයෙන් මුහුණ දෙන ගැටලු විස‍ඳීම සඳහා අවශ්‍ය ක්‍රියාමාර්ග ගැනීමට සුදුසු පියවර සොයා බලන ලෙස, අග්‍රාමාත්‍ය ගරු දිනේෂ් ගුණවර්ධන මහතා මෙහිදී රාජ්‍ය අමාත්‍ය ගරු අශෝක ප්‍රියන්ත මහතාට උපදෙස් ලබාදුන්නේය. පාර්ලිමේන්තුවේ කමිටු හරහා ගතහැකි ක්‍රියාමාර්ග ගැන සොයාබලන බවද අග්‍රාමාත්‍යවරයා කියා සිටියේය." ශ්‍රී ලංකා පාර්ලිමේන්තුවේ සන්නිවේදන දෙපාර්තමේතුව නිවේදනය කර තිබේ.

ආදිවාසී ජනතාවගේ මෙම ඉල්ලීම් ඉතා සාධාරණ බවත් මේ සදහා සම්පූර්ණ සහයෝගය ලබා දෙන බවත් විපක්ෂ නායක සජිත් ප්‍රේමදාස එහිදි  අවධාරණය කර ඇත.

මෙම අවස්ථාවට විකල්ප ප්‍රතිපත්ති කේන්ද්‍රය නියෝජනය කරමින් ලයනල් ගුරුගේ, ලලින්ද වික්‍රමරත්න, ලහිරු කිතලගම ඇතුළු පිරිසක් එක්ව සිටි බව ශ්‍රී ලංකා පාර්ලිමේන්තුවේ සන්නිවේදන දෙපාර්තමේතුව වැඩි දුරටත් සදහන් කරයි.

 

 

 

IMG 9993

IMG 9994



JW

 

Follow Us

Image
Image
Image
Image
Image
Image

Exchange Rates

නවතම පුවත්