අපරාධ පරීක්ෂණ දෙපාර්තමේන්තුවේ අධ්‍යක්ෂ ජ්‍යෙෂ්ඨ පොලිස් අධිකාරී ශානි අබේසේකරගේ ස්ථාන මාරුව අත්හිටුවන්නැයි ඉල්ලමින් ශ්‍රි ලංකා වෘත්තිය ජනමාධ්‍යවේදීන්ගේ සංගමය,

නිදහස් මාධ්‍ය ව්‍යාපාරය සහ ශ්‍රී ලංකා තරුණ ජනමාධ්‍යවේදීන්ගේ සංගමය ජාතික පොලිස් කොමිෂන් සභාවෙන් කළ ඉල්ලීම් පිළිබඳව සාකච්ඡා කිරීමට පොලිස් කොමිසම නොවැම්බර් 28 වන දින රැස් වී ඇති බව වාර්තා වේ.

ශ්‍රි ලංකා වෘත්තිය ජනමාධ්‍යවේදින්ගේ සංගමය නොවැම්බර් 23 වන දින පොලිස් කොමිසමේ සභාපතිවරයාට ලිපියක් යොමු කරමින් සදහන් කර තිබුණේ සන්ඬේ ලීඩර් කර්තෘ ලසන්ත වික්‍රමතුංග ඝාතනය, මාධ්‍යවේදී ප්‍රගීත් එක්නැළිගොඩ පැහැරගෙන ගොස් අතුරුදහන් කිරීම, නේෂන් පුවත්පතේ නියෝජ්‍ය කර්තෘ කීත් නොයාර්ව පැහැරගෙන ගොස් වධහිංසා පමුණුවීම, රිවිර හිටපු කර්තෘ උපාලි තෙන්නකෝන්ට පහරදී පැහැරගැනීමට උත්සාහ කිරීම ආදී ජනමාධ්‍යයට එරෙහි සිදුවීම් සම්බන්ධ විමර්ශන කටයුතු සිදුකරනු ලැබුවේ ශානි අබේසේකර මහතාගේ උපදෙස් සහ මෙහෙයවීම මත බවය.

එම විමර්ශන අතරින් දෙකක් මේ වනවිට අවසන් කොට නීතිපතිවරයාට ඉදිරිපත් කොට ඇති බවත් ඒ සම්බන්ධයෙන් නීතිපතිවරයා විසින් අධිචෝදනා ගොනු කිරීමද සිදුකර ඇති බවත් එහි සඳහන් කර ඇත.

එවැනි පොලිස් නිලධාරියෙක්ව මාරු කිරීමෙන් ඉදිරි පරීක්ෂණවලට සහ අධිකරණ කටයුතුවලට දැඩි බලපෑමක් සිදුවන බැවින් ඔහුගේ මෙම ස්ථාන මාරුව අවලංගු කොට පෙර පරිදි රාජකාරියේ පිහිටවිය යුතු බව වැඩිදුරටත් එහි සඳහන්ය.

 

දේශපාලන බලපෑමක් !

නිදහස් මාධ්‍ය ව්‍යාපාරය යැවූ ලිපියෙහි සඳහන් වන්නේ මෙය දේශපාලන බලපෑමක් මත සිදුවීයැයි ඉදිරිපත්ව ඇති කරුණ සලකා බැලිය යුතු බවය.

ශ්‍රි ලංකා තරුණ ජනමාධ්‍යවේදීන්ගේ සංගමය නොවැම්බර් 22 වන දින යොමු කළ ලිපියේ සදහන් කර තිබුණේ ශානි අබේසේකරව මෙසේ හදිසියේ ස්ථාන මාරු කරනු ලැබුවේ දේශපාලන හේතූන් නිසා බවත්, ස්වාධීන කොමිෂන් සභාවක් වන ජාතික පොලිස් කොමිෂන් සභාව එවැනි පටු තීන්දු තීරණ ගැනීම ආණ්ඩුක්‍රම ව්‍යවස්ථා පරමාර්ථ උල්ලංඝණය කිරීමක් වන බවත්ය.

(අනිද්දා -රේඛා නිලුක්ෂි හේරත්)

සබැඳි පුවත්:

පොලීසියේ ශානි අබේසේකරට ජනපතිගෙන් චෝදනා

'ශානි අබේසේකරගේ ස්ථාන මාරුව දේශපාලන පලිගැනීමක්' - තරුණ ජනමාධ්‍යවේදීන්ගේ සංගමය (VIDEO)

subscribeYT

Cyber Window

නවතම පුවත්