අස්ථාවරභාවය හමුවේ රට හැර ගිය වෛද්‍යවරුන් සංඛ්‍යාව 500කට අධික බව ජාතික ජන බලවේගයේ ප්‍රධාන ලේකම් විශේෂඥ වෛද්‍ය නිහාල් අබේසිංහ පැවසීය.
ආණ්ඩුව ඉදිරිපත් කළ අසාධාරණ හා අත්තනෝමතික බදු ක්‍රමය නිසා වෛද්‍යවරුන් රට හැරයන බවත් මේ බදු ක්‍රමයේ 6% සිට 36% දක්වා වෘත්තිකයන්ගෙන් අය කිරීමක් කර තිබෙන බවත් ඔහු කියා සිටියේය.
පසුගිය වසරේ 2022 සහ 2023 කාලසීමාවට ඖෂධ ඇණවුම් කර නැති බවත් හෙතෙම අනාවරණය කළේය.
එහිදී ඔහු මෙසේ ද කීය.
“වෛද්‍යවරුන් සහ අනෙකුත් වෘත්තිකයන් රට හැර යාමට හේතුවක් තමයි සමාජයේ ආර්ථික හා දේශපාලන අස්ථාවරභාවය. මේ වෛද්‍යවරුන් රටට සේවය ලබා දෙන්න හැකියාව ඇති දියුණු දැනුමක් ඇති වෛද්‍යවරු. මේ වන විට වෛද්‍යවරු 500කට අධික සංඛ්‍යාවක් රට හැර ගොස් තිබෙනවා. සෞඛ්‍ය ක්ෂේත්‍රයේ විවිධ තාක්ෂණ නිලධාරීන් රට හැර යාමට උත්සහ දරමින් ඉන්නවා. වෛද්‍යවරුන් විවිධ විභාගවලට සූදානම් වෙමින් ඉන්නවා වෙනත් රටවල විවිධ ක්ෂේත්‍රයන්ට යොමු වෙන්න.
අපි ආණ්ඩුවට බලපෑම් කරනවා, මේ වෛද්‍යවරුන්ගේ වෘත්තිකයන්ගේ ඉල්ලීම්වලට ඇහුම්කන් දෙන්න කියලා. බදු අය කළ යුතුයි. එහෙත් අසාධාරණ ලෙස බදු අය කිරීමත් ඔවුන් රට හැර යාමෙන් එය ඊටත් වඩා බරපතළ තත්ත්වයකට රටට මුහුණ දෙන්න සිදු වේවි.
පසුගිය කාලසීමාව තුළ වැටුප් වැඩිවීමක් සිදුවුණේ නෑ. වෙනත් ක්ෂේත්‍රවලට වඩා වෛද්‍යවරුන් හදිසි කැඳවීම්වලදී රෝහලට පැමිණිය යුතුයි. එයට ප්‍රවාහන දීමනාවක් සහ කැඳවීම්වලට අදාළ දීමනාවක් තිබුණා. මේ දීමනාවලටත් බදු අය කිරීමට ආදායම ලෙස එකතු කර තිබෙනවා. වෛද්‍යවරුන් සහ සෞඛ්‍ය සේවකයන් ඉතාමත් කලකිරීමෙන් සේවයේ යෙදෙන්නේ. මෙය සෞඛ්‍ය සේවයට බරපතළ ලෙස බලපානවා.
ඖෂධ හිඟය සහ මිල ඉහළ යාම ප්‍රශ්නයක් මතුවෙලා තිබෙනවා. සමහර මිල ඉහළ යෑම 300% දක්වා ගොස් තිබෙනවා. මේ ආනයනය කරන්නේ ඉතා ම සුළු ප්‍රමාණයක්.
මේ වෙන කොට අපේක්ෂා රෝහලේ පිළිකා රෝගීන් සඳහා අවශ්‍ය කරන ඖෂධ වර්ග බොහොමයක් අඩු බවට වාර්තා වෙනවා. මේක නම් කර තිබෙන්නෙ අපේක්ෂා රෝහල කියලා. මේ අපේක්ෂා රෝහලට එන රෝගීන් අපේක්ෂා භංගත්වයට පත්කර තිබෙනවා.
බොහෝ රෝහල්වල ඖෂධ නෑ. ඒ සමග ම පරීක්ෂණ කර ගැනීමේ හැකියාවක් නෑ. බේරුවල රෝහලේ සුදු රුධිරාණු පරීක්ෂා කිරීමේ හැකියාවක් නෑ. දවසකට සාම්පල 15ක් පමණ අරගෙන කළුතරට හෝ දර්ගා නගරයට යවනවා. වෛද්‍යවරුන්ට ලබා දිය හැකි සේවාව බවට පත්වෙලා තිබෙන්නේ ඒ ආකාරයෙන්.”
මේ අතර වෛද්‍යවරුන් ඇතුළු වෘත්තිකයන්ගේ බදු විරෝධය සාධාරණද? කියන කාරණය සම්බන්ධයෙන් ද සමාජ මාධ්‍ය ඔස්සේ පුළුල් කතිකාවක් මතුව ඇත. පහත දැක්වෙන්නේ CARBON TV ඔස්සේ විකාශය වූ එවැනි වැඩසටහනකි.
බදු ගැන සාකච්ඡාවකට ජනාධිපති කාර්යාලයෙන් වෘත්තිකයින්ට ඇරයුමක්
බදුවලට මම විරුද්ධ නෑ - (ධම්ම දිසානායක)
අය වැය සහ ණය වැය තුලින් මතුවෙන බදු අසහනය - (ජයශ්රී ප්රියලාල්)
