විවිධ ආයතන හා පුද්ගලයන් දේශීය ආදායම් දෙපාර්තමේන්තුවට මේ දක්වා
රුපියල් කෝටි 20,000 කට ආසන්න බදු මුදලක් ගෙවීම පැහැර හැර ඇතැයි වාර්තා වේ.
මෙසේ බදු ගෙවීම පැහැර හැරි පුද්ගලයන්ගෙන් සියයකට ආසන්න පිරිසක් මියගොස් සිටින බව එම දෙපාර්තමේන්තු ආරංචි මාර්ග සඳහන් කළේය.
මෙම හිඟ බදු මුදල් සම්බන්ධයෙන් අදහස් දක්වන මුදල් රාජ්‍ය අමාත්‍ය රංජිත් සියඹලාපිටිය පැවසුවේ, ඇතැම් පාර්ශව මෙම හිඟ ණය මුදල් ගෙවීමට එකඟවී සිටින බවයි.
හිඟහිටි ආදායම් අයකර ගැනීම සම්බන්ධයෙන් රජය විශේෂ අවධානයක් යොමු කර ඇති බවත් මහභාණ්ඩාගාරය ඒ සඳහා වෙනම කණ්ඩායමක්ද පත්කර සිටින බවත් ඔහු ප්‍රකාශ කළේය.
එසේම දේශීය ආදායම් බදු ආඥා පනත ගැළපෙන පරිදි යාවත්කාලින කර සංශෝධනය කර හිඟ බදු මුදල් අයකර ගැනීමට කටයුතු කරන බව සියඹලාපිටිය රාජ්‍ය අමාත්‍යවරයා වැඩිදුරටත් පැවසීය.
මේ අතර විශාල වශයෙන් ආදායම් උපයන වෛද්‍යවරුන්, නීතිඥයන්, උපකාරක පන්ති ගුරුවරුන්, දෛවඥයන් ඇතුළු පිරිසක් කාලයක් තිස්සේ බදු ගෙවීම පැහැර හරිමින් සිටින බව මුදල් අමාත්‍යාංශ ආරංචි මාර්ග සඳහන් කළේය.
