ආරක්ෂක අංශවලට බාරවීමෙන්, හෝ ඔවුන් විසින් පැහැරගෙන යාමෙන් අනතුරුව
අතුරුදහන් කරනු ලැබූ තම සමීපතමයන්ගේ ඉරණම හෙළි කරගනු පිණිස වියපත්වීම, ආර්ථික අහේනිය, කෝවිඩ් සහ බියගැන්වීම් ඇතුළු අනේක විධ ගැහැට නොතකා වීදි බැස සිටින දෙමළ මව්වරුන්ගේ අරගලය හත්වැනි වසරට ලඟාවී තිබේ.
ශ්‍රී ලංකාවේ දීර්ඝතම අඛණ්ඩ විරෝධතාව පවත්වාගෙන යන යුද පීඩිතයන් අතුරින් පිළිතුරු නොලබාම මරුමුවට පත් වී ඇති මව්වරුන් හා පියවරුන් සංඛ්‍යාව 160කට අධිකය.
ආණ්ඩුව විසින් යෝජනා කරන රුපියල් දෙලක්ෂයක වන්දි මුදල දැඩි ලෙස ප්‍රතික්ෂේප කරන සටනේ නිරත මව්වරුන් හා පියවරුන් පෙරලා පවසා සිටින්නේ සොයාදෙන සෑම අතුරුදහන් අයකු වෙනුවෙන්ම ලක්ෂ 25ක් ලබා දීමට තමන් සුදානම් බවයි.
“අපිට අවුරුදු හයක් තිස්සේම උත්තර හම්බ උනේ නෑ. ආණ්ඩුවේ කොමිසම් 12කට ගිහිල්ලත් අදවන තුරු කිසිම උත්තරයක් ලැබුනේ නෑ,” යි උතුරු නැගෙනහිර බලහත්කාරයෙන් අතුරුදහන් කරනු ලැබුවන්ගේ ඥාතීන්ගේ සංගමයේ සභාපතිනි යෝගරාසා කලාරන්ජනී පැවසුවාය.
තම අඛණ්ඩ අරගලය හත්වැනි වසරටත් පවත්වාගෙන යාමට සිදුවීම සනිටුහන් කරමින් දෙමළ ඥාතීන් සිය ගණනක් කිලිනොච්චියේ කන්දසාමි කෝවිලේ සිට ඩිපෝ හන්දිය දක්වා පා ගමනින් ගොස් රැළියක් පැවැත්වූහ.
