පළාත් පාලන මැතිවරණය කල් දැමීමට එරෙහිව ජාතික ජන බලවේගය පැවැත්වූ විරෝධතාවයට
ප්‍රහාර එල්ල කිරීම වෘත්තීය සමිති විසින් හෙළා දැක තිබේ.
නිවේදනයක් නිකුත් කරන ජාතික කම්කරු උපදේශක සභාව නියෝජනය කරන වෘත්තීය සමිති පවසන්නේ මෑතක සිට විශාල පොලිස් බලයක් යොදා ගනිමින් ජනතා විරෝධතා මර්දනය කිරීමට ආණ්ඩුව පැහැදිලි තින්දුවක සිටින බවයි.
අහෝසි කළ යුතු යැයි බල කෙරෙන ත්‍රස්ත පනත යොදා ගනිමින්, පොදු දේපල ආරක්ෂා කිරීමට යැයි අධිකරණ නියෝග ලබා ගැනීමත් ආණ්ඩුවේ මර්දනයේ
අලුත් පැතිකඩක් බවට එම නිවේදනයේ දැක්වේ.
නිදහස් වෙළෙඳ කලාප සහ පොදු සේවා සේවක සංගමය, ශ්‍රී ලංකා නිදහස් සේවක සංගමය, ලංකා වෘත්තීය සමිති සම්මේලනය, එක්සත් කම්කරු සම්මේලනය, ලංකා වතු සේවා සංගමය, ලංකා බැංකු සේවක සංගමය, අන්තර් සමාගම් සේවක සංගමය සහ නාවිකයන්ගේ ජාතික වෘත්තීය සංගමය ඒකාබද්ධව ප්‍රකාශය මගින් පෙන්වා දෙන්නේ පළාත් පාලන මැතිවරණය ගැන සමාජයේ කෙතරම් මත බෙදීම් තිබුනද, එය කල් දැමීමට එරෙහිව විරෝධය දැක්වීම තහනම් කිරීම හෝ මර්දනය කිරීම මුලික මිනිස් අයිතියක් උල්ලංඝණය කිරීමක් බවයි.
අදහස් ප්‍රකාශනය හා විරෝධය දැක්වීමේ අයිතිය මෙසේ මර්දනය කිරීමට රනිල් වික්‍රමසිංහ ප්‍රමුඛ ආණ්ඩුව සැරසෙන්නේ නම් සමාජය අස්ථාවර වී, ආර්ථිකය ගොඩනැගීමේ ආණ්ඩුවේ පොරොන්දු හිස් ප්‍රලාප වනු ඇති බවට එම වෘත්තීය සමිති අවධාරණය කර ඇත.
කඳුළු ගෑස් හා අධිබල ජල ප්‍රහාර යොදා ගනිමින් විරෝධතාකරුවන්ට එල්ල කළ පොලිස් ප්‍රහාරයෙන් තුවාල ලබා රෝහල් ගත කළ ජාතික ජනබලවේගයේ නිවිතිගල ප්‍රාදේශය සභා අපේක්ෂකයෙකු වන නිමල් අමරසිරි කඳුළු ගෑස් නිසා ඇතිවූ ස්වසන ආබාධයකින් මිය ගියේය. හැට එක් හැවිරිදි නිමල් අමරසිරි එක්
දරු පියෙක් වන විශ්‍රාමික වැවිලි කාර්ය මණ්ඩල සේවකයෙකි.
ශ්‍රි ලංකාවේ ප්‍රජාතන්ත්‍රවාදය උදෙසා වූ ජනමාධ්‍යවේදියෝ [JDS] ට්විටර් සටහනක් මගින් වාර්තා කර තිබුනේ පොලිස් ප්‍රහාරයෙන් බරපතල තුවාල ලැබූ හතළිස් හය හැවිරිදි, දෙදරු පියෙකු වූ කැස්බෑවේ අජිත් ගමගේ නමැති ජාතික ජන බලවේගයේ සාමාජිකයකු තවදුරටත් කොළඹ මහ රෝහලේ දැඩි සත්කාර ඒකකයේ ප්‍රතිකාර ලබන බවයි.
