රිදියගම සෆාරි උද්‍යානය තුළ සිද්ධවන ම්ලේච්ඡ සත්ත්ව ඝාතනය පසුපස සිටින ප්‍රධාන මස්වැද්දා එහි සහකාර සත්ත්ව පාලකවරයා බවත් සතුන් මදු ගසා මැරීම සඳහා මදු අටවනු ලබන්නේ එම පුද්ගලයා බවත් සෆාරි උද්‍යානයේ සේවකයෙක් 'හිරු ප්‍රවෘත්ති' සේවයට විශේෂ ප්‍රකාශයක් කරමින් හෙළිදරවු කර ඇත.
ගෝලීය වශයෙන් වඳ වී යන තර්ජනයට ලක්වූ බවට හඳුනාගෙන ඇති බ්ලැක් බර්ක් නැමැති දුර්ලභ මුව විශේෂයේ වැඩුණු සතෙක් වෙඩි තබා ඝාතනය කර ඇති ආකාරය මාධ්‍යයට මුදා හැර ඇති තතු දත් පාර්ශව පෙන්වා දෙන්නේ මේ ඝානයන් සිදුවන්නේ සෆාරි උද්‍යානයේ නිලධාරීන් අතින්ම බවය.
මැරෙන්නට පණ අදින සතුන්ගේ ගාත් පණ පිටින් කපාගෙන යන තරම් නින්දිත තිරිසනුන් උද්‍යානය තුළ සේවය කරන බව එම ආරංචි මාර්ග කියයි.
ඝාතනය වන සතුන් උද්‍යානයේ සේවය කරන රියදුරන් උද්‍යාන ගේට්ටුවෙන් ප්‍රවාහන කරන බවත් මේ අශිෂ්ට ජාතික අපරාධයට එරෙහි වීමට හෝ එරෙහි වන නිලධාරීන්ව රැක ගැනීමට තරම් කොන්දක් සහිත ඉහළ නිලධාරියෙක් නොමැති වීම ඛේදවාචයක් බවත් සෆාරි උද්‍යානයේ අභ්‍යන්තර ආරංචි මාර්ග පවසයි.
ඔවුන් පවසන්නේ මේ අශිෂ්ට දුර්දාන්ත සිදුවන්නේ සංචාරක ව්‍යාපාරයෙන් ගොඩ යන්නට සිටින රටක ප්‍රධාන සංචාරක ආකර්ශන ස්ථානයක් මුල් කරගෙන වීම අන්තර්ජාතික මට්ටමේ විහිලුවක් බවය.
රිදියගම සෆාරි උද්‍යානය තුල සිටින වන සතුන් දඩයක්කරුවන්ගේ ග්‍රහණයට ලක්වන බව මුල් වරට අණාවරණ වුණේ එහි ස්ථාන භාර පශු වෛද්‍ය නිළදාරී ප්‍රියසාද් එදිරිවර්ණ සමාජ මාධ්‍යට එක් කළ වීඩියෝවක් සමගයි.
සත්ත්ව ඝාතන ඇතුළු උද්‍යානය තුළ පැවති අපරාධයන්ට එරෙහි වූ මින් පෙර සේවය කළ වෛද්‍යවරයෙකුගේ ගෙලට පිහිය තබා මරණ තර්ජනය කළ පසු ඔහු ඉවත් වී ගිය බවත් දිගින් දිගටම මේ ඝානයන්ට එරෙහිව හඬ නැගූ රිදියගම සෆාරි උද්‍යානයේ ස්ථාන භාර වෛද්‍ය නිලධාරි ප්‍රියසාද් එදිරිවර්ණ වහාම ක්‍රියාත්මකවන පරිදි මාරු කර යැවූ බවත් සෆාරි උද්‍යානයේ අභ්‍යන්තර ආරංචි මාර්ග හෙළි කළේය.
'හිරු' ප්‍රවෘත්ති සේවයට ප්‍රකාශයක් නිකුත් කරන උද්‍යානයේ සේවකයෙක් නම් ගම් සහිතව මේ අපරාධය හෙළි කරන්නේ මෙසේය.
“රිදියගම සෆාරි උද්‍යානයට අක්කර පන්සියයක් තියනවා. ඒ පන්සියයම සම්පූර්ණයෙන්ම අඩි 10ක් උස කොන්ක්‍රීට් බැම්මකින් කවර් වෙලා තියෙන්නේ. ඒ කෑල්ලට මිනිස්සු හැමෝටම එන්න බෑ. එන්න පුළුවන් ප්‍රධාන ගේට්ටු දෙකෙන් විතරයි. “
“ඔයා බලන්න සත්තුන්ට දාලා තියන වැටවල්. ඒවා අඩි 04ක් උස්සලා තියෙන්නේ. මිනිස්සුන්ට පෙනුනට මේක වැටක් කියලා සත්තුන්ට එහාපැත්තට පනින්න පුලුවන් විදිහට තමයි මේ අය වැට මේන්ටේන් කරන්නේ.”
එතකොට ඔය එහා පැත්තේ ගස්වල තමයි මදු අටවන්නේ.
“ඒ මදු අටවන්නේ සහකාර සත්ත්ව පාලක තුෂාර දමිත්. “
“සත්තු මේ පැත්තෙන් කළබල කළ හැටියේ වැටෙන් එහාට පනිනවා. පැන්න ගමන් මදුවලට අහුවෙනවා. පස්සේ තමයි සත්තු මැරෙන්නේ. ඔය සත්වෝද්‍යාන අධ්‍යක්ෂ ජනරාල් කලාතුරකින් සත්තු මැරෙනවා කියන්නෙ ඔන්න ඔය කෑල්ලේ ගහපු මදුවලට. වැඩේ කියන්නෙ ඔය කෑල්ලට හැමෝටම එන්න බෑ. එන්න පුලුවන් වෙන්නේ ගේට්ටුවෙන් තමයි. “
“උපුල් කියන කෙනා, යූජි සම්පත් කියන කෙනා. ගාමිණි කියලා කෙනෙක් ඉන්නවා. ඒ රියදුරන් තමයි දඩමස් උනත් හරක් මස් උනත් ඔතනින් පිටතට ගේන්නේ. “
“කලින් ඩොක්ටර් නන්ද පෙරේරා කියලා ඩොක්ටර් කෙනෙක් හිටියා. එයාගෙ බෙල්ලට පිහියක් තියලා මරණ තර්ජන කළා. එයා ට්‍රාන්සර් ගියා දෙහිවලට. “
කොටින්ට දඬුවම් කරන, කටගොන්නක් බී ගෙන ගොස් කොටි පැටවුන්ට කිරි පොවා උන් දෙදෙනා මරා දැමූ සේවකයින් පිළිබඳ විනය නිර්දේශ ඇතත් ඒ කිසිවක් ක්‍රියාත්මක නොවන බවද එම සේවකයා 'හිරු' ප්‍රවෘත්ති සේවයට ප්‍රකාශ කර තිබිණි.
එම සිද්ධිය හිරු පුවත් සේවය වාර්තා කර තිබුණේ මෙසේය.
(lankasara.com)
සබැඳි හිරු පුවත :
රිදියගම සතුන් ඝාතනය ගැන තවත් අනාවරණයක් (වීඩියෝ)
