ආණ්ඩු විසින් ක්‍රියාත්මක කරන ප්‍රජාතන්ත්‍ර විරෝධී කටයුතු වලට එරෙහිව දැවැන්ත බලවේගයක්
ලෙස එක්ව කටයුතු කිරීම උදෙසා විපක්ෂයේ කණ්ඩායම් රැසක් අද එකඟත්වයට පැමිණ තිබේ.
වර්තමානයේ උද්ගතව ඇති දේශපාලනික, ආර්ථික හා සමාජයීය ප්‍රශ්න හමුවේ ආණ්ඩුව විසින් ක්‍රියාත්මක කරනු ලබන අත්තනෝමතික, වැඩපිළිවෙළට එරෙහිව විපක්ෂයේ දේශපාලන පක්ෂ රැසක් එකට එක්වී පොදු වැඩපිළිවෙලක් සැකසීම සඳහා සමගි ජනබලවේගය ප්‍රමුඛ විපක්ෂයේ කණ්ඩායම් රැසක් අද (24) පාර්ලිමේන්තුවේ දී එක්විය. ඒ විපක්ෂ නායක සජිත් ප්‍රේමදාස ගේ ප්‍රධානත්වයෙනි.
ජනතා විමුක්ති පෙරමුණ ප්‍රමුඛ ජාතික ජන බලවේගයේ මන්ත්‍රීවරු සහභාගී වී නොසිටියේය.
ජාත්‍යන්තරය සමග ගණුදෙනු නොකර, ළිං මැඩි සංකල්පය තුළ හිඳිමින් රටකට පෙරට යා නොහැකි බවත් අප කළයුත්තේ ජාත්‍යන්තර සමග සංවාදශීලී වැඩපිළිවෙළක් හරහා හොදම දේ දිනාගැනීම බවද විපක්ෂ නායක සජිත් ප්‍රේමදාස එහිදී පැවසීය.
ආණ්ඩුව විසින් ගෙන ඒමට නියමිත ප්‍රතිත්‍රස්ත පනත ඇතුළු පනත් බොහොමයක් මේ රටේ මානව හිමිකම් ඇතුළු ප්‍රජාතන්ත්‍රවාදී අයිතිවාසිකම් උල්ලංඝනය කරන බවත් එබැවින් ඒවට එරෙහිව ගත හැකි සියලු ක්‍රියාමාර්ග විපක්ෂය එක්ව ගත යුතු බවත් විපක්ෂ නායකවරයා අවධාරණය කළේය.
PTA සහ ATA වෙනුවට විකල්ප වැඩපිළිවෙළක් සකස් කළයුතු බව එහිදී විපක්ෂ නායකවරයා පැවසූ අතර, ඊට මහාචාර්ය ජී එල් පීරිස්, රවුෆ් හකීම්, මනෝ ගනේෂන්, ලක්ෂ්මන් කිරිඇල්ල, ඉම්තියාස් බකීර් මාකර්, චන්දිම වීරක්කොඩි, නාලක ගොඩහේවා, උදය ගම්මන්පිල, වීරසුමන වීරසිංහ, ගජේන්ද්‍ර පොන්නම්බලම්, දයාසිරි ජයසේකර, ගෙවිදු කුමාරතුංග, ඇතුළුව මන්ත්‍රීවරු කණ්ඩායමක් ඒ සඳහා සුදුසු ලෙස පත්තර ගන්නා ලෙසද විපක්ෂ නායකවරයා ඉල්ලා සිටියේය.
නෛතික, ජාතික, සමාජයීය, ජාත්‍යන්තර යන සිව් ආකාරයෙන් මේ තත්ත්වය පිලිබදව ක්‍රියාමාර්ග කටයුතු බව ඩලස් අලහප්පෙරුම මෙහිදී පැවසීය.
ජාත්‍යන්තර මූල්‍ය අරමුදල පිළිබදව පාර්ලිමේන්තුවට ඉදිරිපත් කරන යෝජනාව, ප්‍රතිත්‍රස්ත පනත පිළිබඳව එම හමුවේදි මූලික අවධානයක් යොමු අතර පනත පරාජය කිරීමට විපක්ෂයේ සියලු පක්ෂ සමග එක්ව කටයුතු කරන බවට සියලු දෙනාම එක්විය යුතුබව දයාසිරි ජයසේකර පැවසීය.
ප්‍රතිත්‍රස්ත පනත ක්‍රියාත්මක කළහොත් ජාත්‍යන්තර වශයෙන් බලවත් අනතුරක් ඇතිවිය හැකි බවත් යුරෝපා කොමිසම පවා මේ තීරණාත්මක මොහොතේ එරෙහිවනු ඇති බවත් මහාචාර්ය ජී එල් පීරිස් පැවසීය.
මේ පනත් කෙටුම්පත් කරන්නේ නීති පති දෙපාර්තමේන්තුව ට වඩා පෞද්ගලික නීතිඥවරුන් විසින් යයි එහිදී ලක්ෂ්මන් කිරිඇල්ල පැවසීය.
ප්‍රතිත්‍රස්ත පනත ජනාධිපතිවරයා නීත්‍යානුකූල ඒකාධිපතියකු බවට පත් වීම උදෙසා උත්සාහ කිරීමක ප්‍රතිඵලයක් යැයි මනෝ ගනේෂන් එහිදී සඳහන් කළේය.
මෙම පනතට විරෝධය දැක්වීමේ දී නිශ්චිත කාල රාමුවක් සකස් කර ගැනීම අතිශය වැදගත් බව එහිදී ගජේන්ද්‍ර කුමාර් පොන්නම්බලම් පෙන්වා දුන්නේය.
ආංශික කාරක සභා රැස්වන අවස්ථාවේදී මේ පනත පිළිබඳව බලපෑම් සහගත සාකච්ඡාවක් සිදු කළ යුතු බව එහිදී රවුෆ් හකීම් පැවසීය.
මේ පනතට විරෝධය දැක්විය යුත්තේ ත්‍රස්ත විරෝධී පනත රදවා ගැනීමට නොව මේ පනත් දෙකම අහෝසි කොට දියුණු රටවල ක්‍රියාත්මක වන පරිදි ත්‍රස්ත විරෝධී පනතක් ක්‍රියාත්මක කරලීමට විය යුතු බව චන්දිම වීරක්කොඩි මන්ත්‍රීවරයා කියා සිටියේය.
මේ පනත සම්පූර්ණයෙන්ම ඉල්ලා අස්කර ගත යුතු බවට බලපෑම් කළ යුතු බව එහිදී ගෙවිඳු කුමාරතුංග මන්ත්‍රීවරයා අවධාරණය කළේය.
මෙම පනතට සියලු දෙනා විරුද්ධ බව පැහැදිලි යැයිද, දැන් අවශ්‍ය වන්නේ ඊට එරෙහිව ගතයුතු ක්‍රියාමාර්ග පිළිබඳව එකඟතාවයකට පැමිණීම යයිද උදය ගම්මන්පිල මන්ත්‍රීවරයා පැවසීය.
අදාල පොදු එකඟතා කටයුතු ඉදිරියට කරගෙන යෑම සඳහා පාර්ලිමේන්තුවේ විපක්ෂ දේශපාලන පක්ෂ එකමුතුවේ කැදවුම්කරු ලෙස විපක්ෂ නායකවරයා සහ විපක්ෂයේ අනෙකුත් පක්ෂ නායකයින්ගේ එකඟත්වයෙන් ඉම්තියාස් බාකීර් මාකර් ව පත් කරනු ලැබීය.
ප්‍රතිත්‍රස්ත පනත ඇතුළු ආණ්ඩුව විසින් ගෙන ඒමට නියමිත ප්‍රජාතන්ත්‍ර විරෝධී පනත් පිළිබඳව පුළුල් වශයෙන් මාධ්‍ය දැනුවත් කළ යුතු බව එහිදී යෝජනාව වූ අතර එම කටයුත්ත ද ඉම්තියාස් බාකීර් මාකර් ට පැවරිණි.
{gallery}Dulles SJB{/gallery}
