ශ්රී ලංකාව ලබාගෙන ඇති බාහිර ණය ප්රතිව්යුහගත කිරීමේ සාකච්ඡා සාර්ථකව සිදුකෙරෙමින් පවතින බව ජනාධිපති වික්රමසිංහ පවසයි.
ඔහු පවසන්නේ අදාළ සාකච්ඡා සැප්තැම්බර් සහ නොවැම්බර් අතර කාලසීමාවේදී නිම වෙතැයි බලාපොරොත්තු වන බවය.
ජනාධිපති වික්රමසිංහ මේ බව පවසා ඇත්තේ ජපාන අගමැති ෆුමියෝ කිශිදා සමග අදහස් හුවමාරුවක් සඳහා සූදානම් වෙමිනි.
එම හමුව ටෝකියෝ නුවර පිහිටි ජපාන අගමැතිවරයාගේ කාර්යාලයේදී පැවැත්විණි.
"ණය ප්රතිව්යුහගතකරණය සම්බන්ධයෙන් පැවැත්වෙන සාකච්ඡා හොඳින් ඉදිරියට යනවා," ජනාධිපතිවරයා පැවසීය.
ශ්රී ලංකාව ජාත්යන්තර මූල්ය අරමුදලෙන් ඩොලර් බිලියන 2.9ක විස්තීර්ණ ණය පහසුකමක් පසුගිය මාර්තු මාසයේදී ලබාගත් අතර ඒ අනුව සැප්තැම්බර් මාසය වනවිට ණය ප්රතිව්යුහගත කිරීමේ ක්රමවේදය සැකසිය යුතුය.
එසේ නොවුණහොත් ආර්ථිකය නැවතත් යථාතත්ත්වයට පත්වීම පමාවිය හැකි බව විචාරකයෝ පවසති.
IMF: සැප්තැම්බර් වන විට ණය ප්රතිව්යුගතකරණය අවසන් කළ හැකි ද?
ශ්රී ලංකාව ණය ප්රතිව්යුහගතකරණය කිරීමේ ක්රියාවලිය අනිවාර්යයෙන්ම ලබන සැප්තැම්බර් මාසය වනවිට අවසන් කළයුතු බව අන්තර්ජාතික මූල්ය අරමුදලේ(IMF) නියෝජිත කණ්ඩායම මෙරට සංචාරය නිමාකරමින් සඳහන් කළේය.
මෙම නියෝජිත කණ්ඩායම මෙරටට පැමිණියේ, ශ්රී ලංකාව ලබන සැප්තැම්බර් මාසයේදී සිය ණය වැඩසටහන පිළිබඳ පළමු සමාලෝචනයට සූදානම් වෙමින් සිටියදී, සිය නිත්ය උපදේශනවල කොටසක් ලෙස මැයි 11-23 අතරතුර කාලයේ නිරීක්ෂණ සංචාරයක් සඳහාය.
ශ්රී ලංකාවට වැඩි ජාතික ආදායමක් අවශ්ය වන අතර, සැප්තැම්බර් මාසය වන විට ණය ප්රතිව්යුහගතකරණය කිරීම ඔස්සේ රටේ ණය තිරසාර බව තහවුරු කරගැනීම අත්යවශ්ය බව ඔවුහූ අවධාරණය කළහ.
(මැයි 23වැනිදා ) සිය සංචාරය අවසන් කළ IMF නියෝජිත කණ්ඩායම, ශ්රී ලංකාවේදී නිරීක්ෂණය කරන ලද, සිය විස්තීරණ ණය පහසුකමට අදාළව, ශ්රී ලංකාව සැපිරීමට සමත්ව සිටින නිර්දේශයන් සහ රටේ කැපවීම සම්බන්ධයෙන් ජනමාධ්ය වෙත නිවේදනයක් නිකුත් කරනු ලැබීය.
ජ්යෙෂ්ඨ දූත මණ්ඩල ප්රධානී පීටර් බෲවර් සහ දූත මණ්ඩල සාමාජික මසාහිරෝ නොසාකි මෙම නිවේදනය නිකුත් කර තිබිණි. කෙසේවෙතත් IMF නියෝජිත කණ්ඩායම නිකුත් කළ මෙම නිවේදනයේ ප්රකාශිත අදහස් IMF කාර්ය මණ්ඩලයේ අදහස් පමණක් වන අතර IMF විධායක මණ්ඩලයේ අදහස් එමගින් නියෝජනය නොවේ.
IMF හි විධායක මණ්ඩලයේ අදහස් ශ්රී ලංකාවට දැනගත හැකිවන්නේ 2023 සැප්තැම්බරයේ පැවැත්වෙන ණය වැඩසටහනට අදාළ පළමු සමාලෝචනයේදීය.
“මෙම සංචාරයේදී අපි මෑතකාලීන සාර්ව ආර්ථික සහ මූල්ය අංශයේ වර්ධනයන් පිළිබඳව සාකච්ඡා කළෙමු. ශක්තිමත් ප්රතිපත්ති ක්රියාත්මක කිරීමේ උත්සාහයන්ගෙන් පසුව, උද්ධමනය මධ්යස්ථ වීම, විනිමය අනුපාතිකය ස්ථාවර වීම සහ මහ බැංකුවේ සංචිත නැවත ගොඩනැගීම යන වර්ධනයන් සමග ශ්රී ලංකාවේ සාර්ව ආර්ථික තත්ත්වය වැඩිදියුණු වීමේ තාවකාලික ලකුණු පෙන්නුම් කරයි. කෙසේ වෙතත්, සමස්ත සාර්ව ආර්ථික සහ ප්රතිපත්තිමය පරිසරය තවමත් පවතින්නේ අභියෝගාත්මක මට්ටමකය.” ජාත්යන්තර මුල්ය අරමුදල සඳහන් කළේය.
එම අරමුදල සඳහන් කළේ, IMF විසින් අරමුදල් සැපයීමේ වැඩසටහන(විස්තීරණ ණය පහසුකම) යටතේ නිර්දේශ කරනු ලැබූ ප්රධාන කැපවීම් සපුරාලීම සඳහා බලධාරීන්ගේ අඛණ්ඩ උත්සාහයන් පිළිගන්නා බවය. 2023 සැප්තැම්බරයේදී සිදුකිරීමට බලාපොරොත්තු වන විස්තීරණ අරමුදල් පහසුකම යටතේ එහි පළමු සමාලෝචනයේදී, ණය වැඩසටහන යටතේ කාර්ය සාධනය විධිමත් ලෙස පවතිනවාද නැද්ද යන්න තක්සේරු කරනු ලබන බවද ජාත්යන්තර මුල්ය අරමුදල සඳහන් කළේය.
"සාර්ථක ලෙස ආදායම් රැස්කිරීම සහතික කිරීම සඳහා තීරණාත්මකව බලපානු ලබන අතිරේක රාජ්ය මූල්ය වැඩසටහන් පිළිබඳව තම නියෝජිත කණ්ඩායම සාකච්ඡා කළේය." යැයි IMF නියෝජිත කණ්ඩායම සිය නිවේදනයේ සඳහන් කර ඇත.
"විදේශීය සහ දේශීය ණය හිමියන් සමඟ සිදුවෙමින් පවතින සාකච්ඡා සැළකිල්ලට ගනිමින් ණය ප්රතිව්යුහගත කිරීමේ ප්රගතිය පිළිබඳව ද අපි සාකච්ඡා කළෙමු.
සිය සංචාරය අවසන් කරමින් IMF නියෝජිත කණ්ඩායම අවධාරණය කර ඇති ප්රධාන කරුණ වන්නේ ණය ප්රතිව්යුහගතකරණය කිරීමේ ක්රියාවලිය අනිවාර්යයෙන්ම ලබන සැප්තැම්බර් මාසය වනවිට අවසන් කළයුතු බවය.
ඒ අනුව සිය විදේශීය ද්විපාර්ශ්වීය ණය හිමියන් සමග පමණක් නොව වාණිජ ණය හිමියන් සමගද සාකච්ඡා කර, ශ්රී ලංකාව සැප්තැම්බර් මාසයට පෙර, මාස තුනක පමණ කෙටි කාලයක් ඇතුළත සාර්ථක ලෙස ණය ප්රතිව්යුහගතකරණය කිරීමේ සැලැස්මක් සකස්කර ගත යුතුය.
විදේශීය ද්විපාර්ශ්වික ණය සම්බන්ධයෙන් ගත්කළ, ශ්රී ලංකාව එහි පාර්ශ්වකරුවන් සැලකිව යුතු සංඛ්යාවකගේ සහයෝගය ලබාගනිමින් සිටින බව පෙනෙන්නට තිබේ.
ජපානය, ඉන්දියාව සහ ප්රංශය යන රටවල සම-සභාපතිත්වයෙන් පසුගිය මැයි 09වැනිදා පැවැති ශ්රී ලංකාවේ නිල ද්විපාර්ශ්වික ණය හිමියන්ගේ කමිටුවේ පළමු රැස්වීමේ දී අනාවරණය වූ තොරතුරුවලට අනුව දැනටමත් චීනය හැර අනෙකුත් සියලුම ණය හිමියන් පොදු රාමුවක් යටතේ ශ්රී ලංකාවේ ණය ප්රතිව්යුහගතකරණය කිරීමට කැමැත්ත පළකර ඇත.
මැයි 09 රැස්වීමෙන් අනතුරුව 'G20 කණ්ඩායමේ සභාපති කාර්යාලය' විසින් නිවේදනයක් නිකුත් කරමින් කියාසිටියේ, ශ්රී ලංකාවට සහන ලබාදීම වෙනුවෙන් සියලුම ණය හිමියන්ගේ කැපවීම එකසේ අවශ්ය වන බවයි.
"අන්තර්ජාතික මූල්ය අරමුදලේ ණය වැඩසටහනේ නිර්දේශයන්ට අනුකූලව ශ්රී ලංකාවේ විදේශ ණය අවදානම් සඳහා සුදුසු විසඳුමක් සෙවීම වෙනුවෙන් කැපවෙමින් කමිටුව සිය කාර්යය කරගෙන යනු ඇත. ණය සහන ලබාදීමේ මූලධර්මවල සංසන්දනාත්මකභාවයට අනුකූලව, මෙම ණයහිමි කමිටුව විසින් එකඟ වූ පරිදි, අවම වශයෙන් හිතකර කොන්දේසි මත, ණය සහන ලබාදීමේ වැදගත්කම ශ්රී ලංකාවේ පෞද්ගලික ණයහිමියන්ට සහ අනෙකුත් නිල ද්විපාර්ශ්වික ණයහිමියන්ට මෙම කමිටුව විසින් අවධාරණය කරයි. ණයහිමි කමිටුවට විධිමත් ලෙස සම්බන්ධ වන ලෙස අනෙකුත් ද්විපාර්ශ්වික නිල ණයහිමියන්ට කමිටුව නැවත ආරාධනය කර තිබේ." යැයි එහි සඳහන් විය.
කෙසේවෙතත් ජපානය සහ ඉන්දියාව ඇතුළු අනෙකුත් පාර්ශව විසින් චීනයෙන් ඉල්ලා ඇත්තේ, ලොව පුරා අඩු සහ මධ්යම ආදායම් ලබන රටවල් රැසකට ණය ලබාදී ඇති චීනය, එම රටවල ප්රතිපත්ති සම්පාදකයන්ට යම් බලාපොරොත්තුවක් ලබා දෙන පියවරක් ලෙස, අදාළ බහුතරයක් රටවල ණය අර්බුද විසඳීම වෙනුවෙන් පොදු සාකච්ඡා මේසයේ අසුන්ගන්නා ලෙසයි.
විශ්රාමිකයින්ගේ ඉතුරුම්වලට අහිතකර බලපෑමක් කරයි ද?
විශ්රාමික රජයේ සේවකයන්ට අමතරව මාසික විශ්රාම වැටුපක් සඳහා සුදුසුකම් ඇති විශ්රාමිකයන්ගෙන් බහුතරයක් තම විශ්රාම වැටුප් අරමුදල් වාණිජ බැංකුවල තැන්පත් කර පොලී ලැබීමෙන් ජීවත් වෙති. පෞද්ගලික අංශයේ සහ රාජ්ය ව්යවසාය සේවකයෝ, සේවා යෝජකයන්ගේ සහ සේවකයන්ගේ ව්යවස්ථාපිත දායකත්වයන් සමඟ සේවක අර්ථසාධක අරමුදලේ විශ්රාම වැටුප් රැස්කර ගනිති.
ශ්රී ලංකා රජයට ප්රධාන දේශීය ණයදෙන්නන් වන්නේ රාජ්ය බැංකු වන අතර, ඒවා වඩාත් විශ්වාසදායක සහ ස්ථාවර මූල්ය ආයතන ලෙස රටේ වැඩකරන ජනතාව විසින් සලකනු ලැබේ.
ජනතා මුදල් බහුලව පවතින, ලංකා බැංකුව, මහජන බැංකුව සහ ජාතික ඉතිරිකිරීමේ බැංකුව ඇතුළු මෙම බැංකු භාණ්ඩාගාර බිල්පත් සහ බැඳුම්කර මිලදී ගැනීමෙන් රජයට ණය දී ඇත.
ඒ අනුව මෙම ආයතනවල පවතින ජනතා අරමුදල් ප්රතිව්යුහගතකරණය, ජනතාවට පැහැදිලි කරදීම රජයට සැබෑ අභියෝගයක් වනු ඇත.
ආර්ථික ප්රතිසංස්කරණ ඉදිරියට ගෙන යාම අත්යවශ්ය බව ජාත්යන්තර මූල්ය අරමුදලෙහි ආසියා සහ ශාන්තිකර දෙපාර්තමේන්තුවේ අධ්යක්ෂ ක්රිෂ්ණා ශ්රීනිවාසන් පැවසීය.
ඔහු ඒ බව සඳහන් කළේ, ශ්රී ලංකා මහ බැංකුවේ (මැයි 15 වැනිදා) පැවති ප්රවෘත්ති සාකච්ඡාවකට එක්වෙමිනි.
ශ්රීනිවාසන් පැවසුවේ “ප්රතිසංස්කරණ ක්රියාත්මක කිරීමේ වේගය දිගටම පවත්වාගෙන යාම දැන් අත්යවශ්යයි”
මෙම වසර අගදී පැවැත්වෙන පළමු සමාලෝචන මෙහෙයුමට පෙර නිත්ය උපදේශනවල කොටසක් ලෙස IMF නියෝජිත කණ්ඩායමක් මැයි 23 වැනිදා දක්වා ශ්රී ලංකාවේ සංචාරයක නිරතවිය.
මොවූහූ මුදල් අමාත්යවරයා වන ජනාධිපති රනිල් වික්රමසිංහ ඇතුළු නිලධාරීන් රැසක් හමුවී සාකච්ඡා පැවැත්වූහ.
ආසියා සහ පැසිෆික් දෙපාර්තමේන්තුවේ ශ්රී ලංකාව සඳහා IMF ජ්යෙෂ්ඨ දූත මණ්ඩල ප්රධානී පීටර් බ්රවර් පැවසුවේ රජයේ සාර්ව ආර්ථික රාමුව සුදුසුද නැතහොත් එයට සංශෝධන අවශ්යද යන්න පිළිබඳව සොයා බලන බවයි.
අභියෝගාත්මක ගෝලීය පරිසරය ශ්රී ලංකාවට බලපාන්නේ කෙසේ ද?
ක්රිෂ්ණා ශ්රීනිවාසන් පෙන්වා දුන්නේ, ශ්රී ලංකාව අතීතයේ ගත් වැරදි ප්රතිපත්ති ක්රියාමාර්ග සහ එකක් පසුපස එකක් වශයෙන් පැමිණි ආර්ථික කම්පන හේතුවෙන් දැඩි ආර්ථික අර්බුදයකට මුහුණ දෙමින් සිටින බවයි.
ශ්රී ලංකාවේ ආර්ථික ප්රතිපත්ති සහ ප්රතිසංස්කරණය සඳහා සහය ලබා දීමට ජාත්යන්තර මූල්ය අරමුදල විධායක මණ්ඩලය මාර්තු 20වැනිදා ඩොලර් බිලියන 3ක් පමණ වන මාස 48ක විස්තීරණ ණය පහසුකමක් අනුමත කළේය.ජාත්යන්තර මූල්ය අරමුදල පවසන්නේ මෙය අර්බුදය නිරාකරණය කිරීම කරා වැදගත් පියවරක් සනිටුහන් කළ බවයි.
ශ්රී ලංකා ආර්ථිකය 2024 වසරේදී සියයට 1.5% ක සාමාන්ය වර්ධනයක් වාර්තා කරනු ඇතැයි ජාත්යන්තර මූල්ය අරමුදල පුරෝකථනය කරයි.
ශ්රීනිවාසන් පැවසුවේ 2023 වසරේ දී ශ්රී ලංකා ආර්ථිකයේ 3% කින් සංකෝචනය වනු ඇතැයි අපේක්ෂා කරන බවයි.
මෙම අපේක්ෂාවන් ආර්ථික ප්රතිසංස්කරණ වැඩසටහන ක්රියාත්මක කිරීම මත බෙහෙවින් තීරණාත්මක ලෙස රඳා පවතිනු ඇතැයි ශ්රීනිවාසන් අවධාරණය කළේය.
පාවෙන පොලී අනුපාතියක් මත ශ්රී ලංකාවට මෙම ණය පහසුකම ලබා දී ඇති බවත්, ගෙවා නිමවන විට මෙම ණය මුදලේ පොලී අනුපාතය 5%ක් පමණ වනු ඇති බවත් පීටර් බ්රවර් මෙහිදී අනාවරණය කළේය.
ප්රධාන කරුණු 5ක් ගැන IMF ප්රමුඛතාව
විස්තීරණ අරමුදල් පහසුකම යටතේ සහාය ලද මෙම ප්රතිසංස්කරණ වැඩසටහන ශක්තිමත් ප්රතිපත්ති ක්රියාමාර්ග මත ගොඩනඟා ඇති අතර ප්රධාන ආධාරක පහක් සඳහා ප්රමුඛත්වය ලබා දෙන බව ජාත්යන්තර මූල්ය අරමුදල අවධාරණය කළේය.
* සමාජ ආරක්ෂණ ජාල, රාජ්ය මූල්ය ආයතනික ප්රතිසංස්කරණ සහ පිරිවැය ආපසු අයකර ගැනීම පදනම් කරගත් බලශක්ති මිල කරණයෙන් සමන්විත රාජ්ය මූල්ය ඒකාග්රතාව.
* ණය ප්රතිව්යුකරණය ඔස්සේ රජයේ මෙහෙයුම් කටයුතුවල ස්ථාවර මූලයනයක් තහවුරු කරගැනීම ඇතුළු රාජ්ය ණය තිරසර බව යළි පිහිටුවීම.
* මිල ස්ථායීතාව යළි පිහිටුවීමට සහ සංචිත යළි ගොඩනැගීමට බහුපාර්ශ්වික උපායමාර්ගයක් යෙදීම
* මූල්ය අංශය ස්ථායිතාව ආරක්ෂා කිරීම සඳහා වන ප්රතිපත්ති.
* දූෂණ අවදානම් සඳහා පිළියම් යෙදීමට සහ වර්ධනය ඉහළ නැංවීමට ව්යුහාත්මක ප්රතිසංස්කරණ සිදුකිරීම
ජාත්යන්තර මුල්ය අරමුදලෙහි ශ්රී ලංකාවේ නේවාසික නියෝජිත සර්වත් ජහන් පැවසුවේ අර්බුදය සමග ලාංකිකයින් ලක්ෂ 3ක් පමණ රට හැර ගොස් ඇති බවය. ආර්ථික ප්රතිසංස්කරණ වැඩපිළිවෙල ක්රියාත්මක කිරීමත් සමග ඔවුන්ට යලි දිවයිනට පැමිණීමට විශ්වාසයක් ගොඩනැගෙනු ඇතැයිද ඇය පැවසුවාය.
(උපුටා ගැනීම් - BBC සිංහල සේවය)