පාර්ලිමේන්තු මන්ත්‍රීවරුන්ට ගුවන් තොටුපලේ ප්‍රභූ පර්යන්තවලින් පරීක්ෂාවකින් තොරව
පැමිණීමට දී ඇති වරප්‍රසාද ඉවත් කළ යුතුයැයි කෘෂිකර්ම අමාත්‍ය මහින්ද අමරවීර පැවසීය.
අනවශ්‍ය පාර්ලිමේන්තු මන්ත්‍රී වරප්‍රසාද ඉවත් කළ යුතු බව කී අමාත්‍යවරයා, විදේශ රාජ්‍ය අමුත්තන්, ජනාධිපති හා අගමැති වැනි තනතුරු සඳහා ප්‍රභූ පර්යන්ත වරප්‍රසාද ක්‍රියාත්මක වුනාට කමක් නැතැයි ද කීය.
පාර්ලිමේන්තු මන්ත්‍රී අලි සබ්රි රහීම් මන්ත්‍රී වරප්‍රසාද භාවිතා කරමින් සිදු කර ඇති ක්‍රියාව හෙලා දකින බව පැවසු මහින්ද අමරවීර අමාත්‍යවරයා, ඔහුගේ මන්ත්‍රී ධුරය අහෝසි කිරීමට යෝජනාවක් ගෙනාවොත් තමා ඊට පක්ෂව කටයුතු කරන බව සඳහන් කළේය.
ලොකු ලොක්කන් ස්කෑන් කරන්න ගුවන් තොටට අලුත් යන්ත්‍ර
කටුනායක ජාත්‍යන්තර ගුවන් තොටුපොලේ ප්‍රභූ මගී පර්යන්තයේ අධි තාක්ෂණික ස්කෑන් පරීක්ෂණ යන්ත්‍ර සවි කිරීමට අවශ්‍ය පියවර ගන්නා ලෙස ජනාධිපති ලේකම් සමන් ඒකනායක රේගු අධ්‍යක්ෂ ජනරාල්වරයාට උපදෙස් ලබාදී ඇත.
ජනාධිපති වික්‍රමසිංහ ගේ උපදෙස් පරිදි ජනාධිපති ලේකම්වරයා මෙම පියවර ගෙන තිබේ.
ගුවන් මගීන් රැගෙන එන අත්බෑග් පරීක්ෂා කිරීමට කටුනායක ගුවන් තොටුපළේ සාමාන්‍ය මගී පර්යන්තයේ අධි තාක්ෂණික ස්කෑන් යන්ත්‍ර පැවැතිය ද ප්‍රභූ මගී පර්යන්තයේ එවැනි පහසුකම් නොමැති බව රේගු නිලධාරීහු සඳහන් කරති.
එම නිසා විශේෂ මගී පර්යන්තය හරහා එන ප්‍රභූන්ගේ අත්බෑග් පරීක්ෂා නොකෙරෙන බව එම නිලධාරීහු පවසති.
විදේශ රටවල බොහොමයක විශේෂ මගී පර්යන්ත වල මෙන්ම අතිවිශේෂ මගී පර්යන්ත වලද අධි තාක්ෂණික ස්කෑන් පරික්ෂණ යන්ත්‍ර සවි කර තිබේ. එමගින් ගුවන් මගීන් අත්බෑග් වලින් ගෙන එන නීති විරෝධී භාණ්ඩ සහ බදු ගෙවීමකින් තොරව ගෙනෙන භාණ්ඩ පිටතට රැගෙන යාම වැලකෙන බව රේගු නිලධාරීහු කියති.
ප්‍රභූ පර්යන්තය හරහා නීති විරෝධී භාණ්ඩ ගෙන ඒම වැලැක්වීම සඳහා ජනාධිපති ජනාධිපතිවරයා දුන් උපදෙස් පරිදි ජනාධිපති ලේකම්වරයා ශ්‍රී ලංකා රේගුවට දැනුම් දී ඇත්තේ මෙම උපකරණ විශේෂ මගීන් හා ප්‍රභූන් පිටවන පර්යන්තයේද සවි කරන ලෙසයි.
ඊට අදාළ වාර්තාවක් ලබා දෙන ලෙස ද ජනාධිපති ලේකම්වරයා රේගු අධ්‍යක්ෂ ජනරාල්වරයා වෙත දැනුම් දී තිබේ.
රත්‍රං කිලෝ තුනක් හා ජංගම දුරකතන සමඟ පාර්ලිමේන්තු මන්ත්‍රීවරයකු රේගුව විසින් අත්අඩංගුවට ගැනීමෙන් පසුව ඒ ගැන සොයා බැලූ ලේකම්වරයා මෙම උපදෙස් දී තිබේ.
