පසුගිය යහපාලන රජයේ ඇතැම් ප්‍රබල අමාත්‍යවරුන්, ඔවුන්ගේ ඥාතීන් හා සම්බන්ධිකරණ නිලධාරීන් කෝටි ගණනක
මුදල් කප්පම් වශයෙන් ලබාගත් ආකාරය සටහන් වූ හඬපට රැසක් තමා සන්තකයේ පවතින බව විශ්‍රාමික කපිතාන් ඇවන්ගාඞ් සමාගමේ සභාපති නිශ්ශංක සේනාධිපති පවසයි.
යහපාලන ආණ්ඩුවේ අවසාන දිනකිහිපය තුළදී රිමාන්ඩ් භාරයට පත්කිරීමෙන් පසු මේවනවිට වෛද්‍ය ප්‍රතිකාර සඳහා රෝහල්ගත කර සිටින කපිතාන් සේනාධිපති, ඉහත කාරණය සඳහන් කළ බව ඔහුගේ FB පිටුවේ සඳහන්වේ.
එම සටහනේ මෙසේද දැක්වේ.
''පසුගිය යහපාලන රජයේ ඉහළම ප්‍රබලයන්ගේ පුතාලා බෑණාවරුන් සහෝදරයන් හා හිටපු ප්‍රබල ඇමතිවරුන් ගණනාවක් තමන්ගෙන් ඉතාමත් අයුතු ලෙස ලබාගත් කෝටි ගණනාවක් කප්පම් මුදල් වහාම ආපසු ගෙවන ලෙස ඇවන්ගාඩ් ව්‍යාපාරයේ සභාපති නිශ්ශංක සේනාධිපති දැනුම් දී තිබේ.
දැනට රක්ෂිත බන්ධනාගාර ගතව සිටින ඔහුගේ සුව දුක් බැලීමට ගිය ජනප්‍රිය භික්‍ෂූන් වහන්සේ නමක් අත ඒ බව දන්වා ඇත.
තමන්ගේ බිරිඳ සහ දරුවා රක්ෂිත බන්ධනාගාරගත කරන්නේ යයි තමන් භීතියට පත් කරමින් ලබා ගත් මිලියන 500 ක් පමණ වන මුදල ඔහු නම් ගම් සහිතව හෙළි කර ඇති අතර එම කප්පම් මුදල් ඉල්ලීම සඳහා තමන්ට ලබාදෙන ලද දුරකතන ඇමතුම් සියල්ල ද පටිගත කර ඇත.
තමන්ට නැවතත් දෙවන රන්ජන් රාමනායක කෙනෙක් වීමට වුවමනා නැති බවත් තමන් ජීවිතයේ ආචාරධර්ම අනුව ජීවත් වන බවද පවසා ඇති ඔහු තමන් සාධාරණ ව්‍යාපාරයෙන් උපයා ගන්නා ලද මුදල කප්පම් ලෙස ගෙවීමට සූදානම් නැති බවත් සදහන් කර තිබේ.
නමුත් ඒවා ආපසු ලබා නොදුනහොත් තමන් දෙවරක් නොසිතන බවත් ඔහු සඳහන් කර තිබේ.
මේ වන විටත් පසුගිය අණ්ඩුවේ හිටපු ප්‍රබලයෙක් සේනාධිපති මහතාගෙන් ලබා ගත් කප්පම් මුදලෙන් කොටසක් ගෙදරට ගෙනවිත් දී ඇති අතර ඉතිරි කොසටද වහා ගෙවන ලෙස ඔහුට දන්වා ඇත.
සේනාධිපති මහතා විසින් එවකට අල්ලස් කොමිසමේ හිටපු ප්‍රධානී දිල්රුක්‍ෂි ඩයස් වෙත ලබා දෙන ලද ඇමතුමක්ද ඔහු විසින් මෑතකදී අන්තර්ජාලයට මුදා හැරි අතර එය මහත් ආන්දෝලනයක් රටතුල ඇති කල අතර ඇයට සේවයෙන් ඉවත් වන්නටද සිදුවිය.''
