සිකුරාදාට දෙකින් එකක් : ඡන්ද ලකුණ තීන්දු කිරීමට එජාප 10 ක කමිටුවක් (VIDEO)

ඉදිරි මහ මැතිවරණය සඳහා ඉදිරිපත්වන එක්සත් ජාතික පෙරමුණු සන්ධානයේ ලකුණ ඇතුළු මුලික ගැටළු විසඳා ගැනීම සඳහා එජාපයේ ජ්‍යෙෂ්ඨ මන්ත්‍රීවරුන් 10 දෙනෙකුගෙන් සමන්විත කමිටුවක්

පත්කිරීමට එම පක්ෂයේ නායක රනිල් වික්‍රමසිංහ සහ නියෝජ්‍ය නායක සජිත් ප්‍රේමදාස අතර ඊයේ (12) රාත්‍රී එකඟතාවයක් ඇතිකරගෙන තිබේ. ඒ රනිල් පාර්ශ්වයෙන් නම් 05ක් සජිත් පාර්ශවයෙන් නම් 05ක් ද වශයෙනි.

ඒ අනුව සජිත් ප්‍රේමදාස, අඛිල විරාජ් කාරියවසම්, රන්ජිත් මද්දුම බණ්ඩාර, ජෝන් අමරතුංග, මංගල සමරවීර, රවී කරුණානායක, ලක්ෂ්මන් කිරිඇල්ල, නවින් දිසානායක, කබීර් හෂීම් හා මලික් සමරවික්‍රම යන අයගෙන් එම කමිටුව සමන්විතවේ.

සිකුරාදා දිනයේදී මෙම කමිටුව අවසන් තීරණයක් ගැනීමට ද එකඟ වී තිබේ. ඒ අනුව සිකුරාදා දිනයේ පැවැත්වීමට නියමිතව තිබුණු පක්ෂ කෘත්‍යාධිකාරී මණ්ඩල රැස්වීම කල්දමා ඇති බව වාර්තාවේ.

කෙසේ වෙතත් ඊයේ රාත්‍රී පැවැති සාකච්ඡාවේදී ඉදිරි මහ මැතිවරණයට නව සන්ධානයකින් තරග වැදීම සම්බන්ධයෙන් රනිල් වික්‍රමසිංහ ගෙන් කිසියම් යහපත් ප්‍රතිචාරයක් ලැබී ඇතැයි සජිත් පාර්ශවයේ ආරංචිමාර්ග පවසයි. මෙම සාකච්ඡාව සදහා සජිත් ප්‍රේමදාස සමග කබීර් හෂීම් ද එක්ව තිබේ.