මහින්ද රාජපක්ෂ ජනාධිපතිවරයාගේ පාලන සමයේ ඝාතනයට ලක්වු දෙමළ මාධ්‍යවේදියකුගේ

දහඅට වැනි අනුස්මරණය නැගෙනහිරදී පවත්වා තිබේ.

ශ්‍රී ලංකාවේ ඝාතනයට ලක් වු මාධ්‍යවේදීන් අනුස්මරණය උදෙසා මඩකලපුව ගාන්ධි උද්‍යානය ඉදිරිපිට ස්ථාපිත කර තිබෙන ස්මාරකය අසලදී ජනවාරි 24 වැනිදා මාධ්‍යවේදී සුබ්‍ර‍නියම් සුගීර්තරාජන්ගේ ඡායාරූපයකට මලින් පහනින් උපහාර දැක්වු දෙමළ ජනමාධ්‍යවේදීන් ඉල්ලා සිටියේ පසුගිය සමයේ ඝාතනයට ලක්වු සියළු මාධ්‍යවේදීන් වෙනුවෙන් යුක්තිය ඉටු කරන ලෙසයි.

සුඩර් ඔලි හා උදයන් පුවත්පත්වල හිටපු ත්‍රිකුණාමලය ප්‍රධාන වාර්තාකරු ‘රාජන්’ හෙවත් සුබ්‍ර‍නියම් සුගීර්තරාජන්ගේ අනුස්මරණය සංවිධානය කර ඇත්තේ නැගෙනහිර ලංකා මාධ්‍ය සංගමය, මඩකලපු දිස්ත්‍රික් දෙමළ මාධ්‍ය සමාජය සහ මඩකලපුව මාධ්‍ය සමාජය විසිනි.


ත්‍රිකුණාමලයේ සිසුන් පස් දෙනකු 2006 ජනවාරියේ ඝාතනය කෙරුණු බව හෙළි කෙරෙන ඡායාරූප මාධ්‍යවේදී රාජන් විසින් යාපනයේ සුඩරෝලි පුවත්පතේ මුල් පිටුවේ පල කොට දෙසතියක් ගතවත්ම ඔහු ඝාතනය කරන ලදී.

ෂන්මුගරාජා ගජේන්ද්‍රන්, ලෝගිදරාජා රෝහන්, තංගදුරෙයි සිවානන්දා, යෝගරාජා හේමචන්ද්‍රන් හා මනෝහරන් රජිහර් 2006 ජනවාරි දෙවැනිදා මියගියේ බෝම්බ ප්‍රවාහනය කරමින් සිටිය දී ඒවා පුපුරා යාමෙන් බවට ආණ්ඩුව සහ ආරක්ෂක අංශ ශ්‍රී ලංකාවේ අධිපති මාධ්‍ය ඔස්සේ ගෙනගිය ප්‍රචාරය බොරු කරන්නට රාජන්ගේ ඡායාරූප සමත් විය.

2006 වසරේ ජනවාරි 24 අඟහරුවාදා උදෑසන සිය නිවෙසට ආසන්නයේ දී, තිස් අට හැවිරිදි දෙදරු පියකු වූ සුබ්‍ර‍මනියම් සුගීර්තරාජන්, වෙඩි තබා ඝාතනය කිරීම සම්බන්ධයෙන් මේ වනතුරු නීතිය ක්‍රියාත්මක වී නැත.

ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS)විසින් ලේඛනගත කර ඇති පරිදි 2004 වසරේ සිට 2010 දක්වා කාලය තුළ ඝාතනයට හා අතුරුදහන් කිරීමට ලක්වූ මාධ්‍යවේදීන් ගණන 44 කි.

ඒ අතුරින් බහුතරය උතුරු නැගෙනහිර දෙපළාතේ දෙමළ මාධ්‍යවේදීන්ය. 

 

worky

worky 3

Follow Us

Image
Image
Image
Image
Image
Image