අපි, දුප්පත්භාවයෙන් රට මුදාගෙන පොහොසත් රටක් හදනවා - AKD

 
මේ කඩා වැටුණු රට අපට ගොඩනැගිය හැකියි. ඒ සඳහා අප කළ යුත්තේ කුමක්ද? ආරම්භක පියවර තමයි ජාතික ජන බලවේගය අතට බලය ලබා ගත යුතුයි.  බලය ගන්න අවශ්‍ය වෙන ඡන්ද තියෙන්නේ ගමේ. ගමේ ඡන්ද පෙට්ටිය මාලිමාවට කතිර ගහලා පුරවන්න ඕනෑකම තිබෙනවා. ඒකට ඔබගේ පවුලේ ඡන්ද, අසල්වැසියාගේ ඡන්ද, ඥාතීන්ගේ ඡන්ද, ගමේ ඡන්ද, ඔබගේ ඡන්ද කොට්ඨාසයේ ඡන්ද මාලිමාවට කතිරෙ ගහන තැනට පත් කරන්න ඕනෑ. අද ශ්‍රී ලංකා, යූ.එන්.පී. නැහැ. පරණ ඒවා පැත්තකින් තියන්න. පාර්ලිමේන්තුවේ අය පැරණි අමනාපකම් අතහැර එකතු වෙනවා. ඇයි අපට එකතු වෙන්න  බැරි?

 ඔය පාර්ලිමේන්තුවේ එකතු වුණු අය, යන්න කලින් අපේ දොරටත් තට්ටු කළා. ගන්න ඕනැද? මේ රට විනාශයට පත්කරපු, ඒ විනාශය සඳහා සහාය දුන්, රනිල් වික්‍රමසිංහලාගේ, රාජපක්ෂලාගේ හොරකම් ආරක්ෂා කරපු, ජනතාව පීඩාවට පත්කරන කොට ඒ පීඩාව ආරක්ෂා කරපු, ජනතාවට විරුද්ධව නීති සම්පාදනය කරන කොට, ඒවාට අත ඔසවපු කිසිවෙකුට ජාතික ජන බලවේගයේ දොරටුව විවෘත නොකරන බව ප්‍රසිද්ධියේ ප්‍රකාශ කරනවා. අපට ඕන අටවා ගන්න ආණ්ඩුවක් නොවෙයි. ජාතික ජන බලවේගය කියන්නේ පැහැදිලි වැඩපිළිවෙළක් තිබෙන, අවංකභාවය තිබෙන, රටත් ජනතාවත් ගැන කැක්කුමක් තිබෙන, මේක වෙනස් කිරීම සඳහා වුවමනාවක් තියෙන නව බලවේගයක්. ඒක ජයග්‍රහණය කරවීම තමයි අපේ වගකීම.

 ඔබ අප හැමදෙනාම එකතු වෙමු. මේ වැඩේ කරන්න පුළුවන්. මීට කලින් ඔබලාගෙන් බලය ලබා ගැනීම සඳහා ඡන්දය ඉල්ලුවේ නැහැ. අපට බලය ලබාදෙන්න ජනතාව අපිව තෝරාගෙන සිටියේ නැහැ. එදා ජනතාව තෝරාගෙන සිටියේ: මහින්ද, ගොඨාභය, සජිත් හෝ රනිල් වෙන්න පුළුවන්. අපට බලය ලබාදෙන්න මහජනතාවගේ සූදානමක් තිබුණේ නැහැ. අපි ජනතාවගේ ඡන්ද ලබා ගැනීමට වර්ධනය වෙලත් තිබුණේ නැහැ. හැබැයි මේ සැරේ එහෙම නොවෙයි.

 


දෙසතියක රුවන් වැකි

මහාචාර්ය හිනිඳුම සුනිල් සෙනෙවි

සබරගමු විශ්වවිද්‍යාලයේ භාෂා අධ්‍යයන අංශයේ මහාචාර්ය හිනිඳුම සුනිල් සෙනෙවි,

‘‘ජාතික පුනරුදයක් අවශ්‍ය වෙන මොහොතක, ඒ පුනරුදය ගොඩනගන්න එකම සුදුසුකම තිබෙන, අපේ කාලයේ විශිෂ්ටතම දේශපාලන ව්‍යාපාරය ගොඩනගන්න ඔබට, අපට හැකි වුණා. එහි ශක්තිය තමයි ඔබ. මේ මොහොතේ ශ්‍රී ලංකා භූමිය දෙස බැලුවම සෑම අතකින්ම ගරා වැටුණු, හැම අතකින්ම බිඳ වට්ටවපු මගේ රට, මහා ඛේදවාචකයකට තල්ලු කළ ඔබේ රට ගොඩනඟන්න පුළුවන් එකම ව්‍යාපාරයක් තිබෙනවා නම් ඒ ජාතික ජන බලවේගය පමණයි. අනෙකුත් දේශපාලන ව්‍යාපාර දිහා බලන්න. ඔවුන්ට අද වචන පටලැවෙන්නේ නැතිව, වැකියක් පටලැවෙන්නේ නැතිව කියා ගන්න බැහැ. ඒකට හේතුව ඒගොල්ලන් ගත කරපු දූෂිත, අශිෂ්ට දේශපාලන සංස්කෘතිය. මම සති දෙකක්, ජනමාධ්‍යයට සවන්දීලා ලියා ගත්ත වැකි ටිකක් ඉදිරිපත් කරන්නම්.

“එයාලා එහෙ ගියාට ඡන්ද තියෙන්නේ මහින්ද මහත්තයා ළඟ.” ජොන්ස්ටන්, “පොහොට්ටුව රැකගන්න මහින්ද මහත්තයා ආයෙත් ජනාධිපති කරනවා.” ප්‍රසන්න රණතුංග. ඔබ හිතලා බලන්න ඔහු හිටියේ කොතනද,  දැන් ඉන්නේ කොතනද? මේ කියන්නේ මොකක්ද කියලා.

“පොහොට්ටුව කුමන්ත්‍රණකාරී වැඩක් කළේ. අපි නිවැරදි තැනක නතර වුණා.” පියල් නිශාන්ත, “අපිව ප්‍රතික්ෂේප කළ නිසා තමයි රට බංකොළොත් වුණේ.” රවි කරුණානායක, “ඉතුරුවෙන කෙනත් එක්ක මම දේශපාලනය කරනවා.” නාමල් රාජපක්ෂ, “එස්.එම්. චන්ද්‍රසේන නිසා ෂෙහාන් මා එක්ක තරහ වුණා. අපිට දුකයි.” නාමල් රාජපක්ෂ, “අනු දෙකක් කොහෙද එහේ...? මෙහෙ අයත් එතන හිටියා.”, “මහින්ද රාජපක්ෂ නැතිව ඡන්ද කරන්න නම් බැහැ.” ජොන්ස්ටන් ප්‍රනාන්දු, “මමත් ගාල්ලෙනෙ. තුන්වෙනි සිවිල් යුද්ධයක් ඇති කරනවා ද නැද්ද කියලා සැප්තැම්බර් විසි එක ජනතාව තීරණය කරන්න.” වජිර අබේවර්ධන, “අන්තිමට මට මේක තනියම කරන්න බෑ. ටීම් එකක් තියෙන්න ඕනෑ. ටීම් එකක් හදාගන්න කියමු රනිල් වික්‍රමසිංහට. අපි නොවෙයි ආණ්ඩුව බෙදුවෙ. වැරැද්ද වුණේ රනිල්ගෙ කණ්ඩායමෙන්” නාමල් රාජපක්ෂ.

ඔබ හිතලා බලන්න. අපි මොනවද මේ අහන්නේ කියලා. මේක තමයි මේ වෙලාවේ තිබෙන උන්මත්තක දේශපාලනයේ ශේෂ පත්‍රය. අවුරුදු හැත්තෑ හයක් ඇවෑමෙන් ඔවුන් ඉතිරිකර ගත්තු දේශපාලන ශේෂ පත්‍රය තමයි මේක. “ජනාධිපතිටයි මටයි දෙන්නටම ජනාධිපතිකම ඉල්ලන්න බැහැ. ඒ නිසා මම අස්වුණා.” විජේදාස රාජපක්ෂ. “අපේක්ෂකයන් තුන්දෙනෙකුට සහාය දෙන එකම පක්ෂය තමයි, ශ්‍රී ලංකා නිදහස් පක්ෂය.” මේ පක්ෂයට ගියපු කල. දයාසිරි ජයසේකර මෙහෙම කිවුවා. දයාසිරි ජයසේකර ඔබ ගැනත් කිවුවා. ඔහුගෙන් නිවේදකයෙක් අහනවා “ඔබතුමන්ලා මේ විදිහට තැනින් තැනට පැනලා යනකොට, ජනතාවත් එහෙම යයිද?” දයාසිරි ජයසේකර කියනවා අපේ ගමන අපි යනවා, ජනතාවත් පනිනවා නම්, පනීවි.” “අපේ පැත්තෙන් පොල්ලෙල්ලක් දැම්මත් දිනනවා” කිව්වේ, බන්දුල ගුණවර්ධන. පොල්ලෙල්ලක් දිනවන්න අපි කවුද?

මෛත්‍රීපාල අත්අඩංගුවට ගත යුතුයි

ජනතාව ඉන්නේ සිහිබුද්ධියෙන්. ඒ නිසයි මේ භූමිය පිරී ඉතිරී තිබෙන්නේ. ඒ ගොල්ලෝ උම්මත්තක වුණාට ශ්‍රී ලංකාවේ ජනතාව එක මොහොතකදී තමන් පරිපූර්ණ පුරවැසියන් බව ඔප්පු කරන්න සූදානම්. ඒ මොහොත එළඹෙන්නේ සැප්තැම්බර් මාසයේ විසි එක්වෙනිදාට. වෛරී දේශපාලනයට, මුදලට විකිණෙන එකට අපි තිත තියන්න ඕනෑ. මනුෂ්‍ය ඝාතන පෙරදැරිකරගත් දේශපාලනය, ආර්ථික ඝාතන, සංස්කෘතික ඝාතන නිම කරන්නට සැප්තැම්බර් විසි එක බුද්ධිමත් තීරණයක් ගන්න ඕනෑ.

ජනාධිපති සහෝදරයෙක් තෝරා ගමු

අනධ්‍යයන සේවක සේවකයන්ගේ ප්‍රශ්නයට, මේ රටේ ජාතික විශ්වවිද්‍යාල දාහත ම මාස තුනක් වහල තිබ්බා. ඒ විදිහට මාස තුනක් වහල තිබුණේ ප්‍රශ්නය විසඳන්න මිලියන 400ක්  නැතිව. එක චණ්ඩි මන්ත්‍රීවරයෙකුට මිලියන 500ක්. මේ දේශපාලනයට තිත තියන්න ඕන නැද්ද? සැප්තැම්බර් විසි එක මේ රටේ කාන්තාව නිදහස් වෙන දවස. ගොවියා, කම්කරුවා, ලිපිකරුවා, මහාචාර්යවරයා, විද්වතා නිදහස් වෙන දවස. ඔබ සූදානම් වෙන්න ඕනෑ මේ මහා ජනතා රජය ඇති කරන්න.

අනුර කුමාර සහෝදරයා මහා වැඩි ඡන්ද ප්‍රමාණයකින්, තෝරා ගන්නා මහා ජනතා පෙරළියට, මහා විප්ලවයට  ඔබ සූදානම් වෙන්න. ඔහු ලංකා ඉතිහාසයේ ප්‍රථම වතාවට අතිගරු කෑල්ල අතහැරලා, කටපුරා ජනාධිපති සහෝදරයා කියන්න පුළුවන් කෙනෙක්. අපේ ජීවිතයේ කොටසක් වගේ දැනෙන අනුර දිසානායක සහෝදරයා ජනාධිපති හැටියට තෝරා ගෙන මේ රට මහා පුනරුදයකට පෙළගස්වන මහා මංගල්‍යය සඳහා ඔබට ශක්තිය, ධෛර්යය ලැබේවා!

'මේ තවත් එක් බල හුවමාරුවක් නොවෙයි' - ආචාර්ය හරිනි අමරසූරිය


ආචාර්ය හරිනි අමරසූරිය
ජාතික ජන බලවේගයේ ජාතික විධායක සභික ආචාර්ය හරිනි අමරසූරිය,

මේ තව දවස් හතලිස් දෙකකින් සමරන්න නියමිත ජයග්‍රහණය වෙනුවෙන් තබන මූලික පියවරක්. අපි අවුරුදු ගණනාවක් තිස්සේ සූදානම් වුණේ මේ මොහොත වෙනකම්. අපි කොට්ඨාස සභා හදන්න ගත්තේ අවුරුදු දෙකහමාරකට කලින්. කාන්තා සභා හදන්න පටන් ගත්තා. දිස්ත්‍රික් සමුළු  තිබ්බා. විවිධ ක්ෂේත්‍ර එකතු කළා. මේ සියල්ලම ක්‍රමානුකූලව සංවිධානය කරමින් මේ මොහොත දක්වා, අපි මේ ගමන ආවා. ඔබ අපි සියලු දෙනා එකතු වෙලා ඉන්නේ තවත් එක් බල හුවමාරුවකට නොවෙයි. මේ රට වෙනස් කරන ජනතාවාදී පාලනයක් ඇති කිරීමේ පළවෙනි පියවර තමයි මේ.

2024 සැප්තැම්බර් විසි එක මේ රටේ සුවිශේෂී ඓතිහාසික දිනයක්. අවුරුදු හැත්තෑ හයක් මේ රට පාලනය වුණේ ජනතාව මූලික කරගෙන නොවෙයි. ඒ පාලකයන් තීන්දු තීරණ ගත්තේ ජනතාව වෙනුවෙන් හෝ ජනතාවගේ සුබසාධනය වෙනුවෙන් නොවෙයි. ජනතාවගේ ප්‍රශ්න විසඳන්න නොවෙයි. ජනතාව පොහොසත් කරන්න නොවෙයි. ඒකෙ ප්‍රතිඵලයක් විදිහට අවුරුදු හැත්තෑ හයකට පස්සේ මේ රටේ ජනතාව දුප්පත් වෙලා, පාලකයන් පොහොසත් වෙලා තියෙනවා. ජනතා නියෝජිතයන් හා ජනතාව අතර විශාල පරතරයක් ඇති වෙලා තියෙනවා. සැප්තැම්බර් විසි එක කියන්නේ  ඒක වෙනස් කරන දවස.

අද මේ පාලකයන් පනින එක, ඩීල් දේශපාලනය දිහා බලනකොට පේන්න තියෙන්නේ මොකක්ද? මේ පාලකයන් මේ කිසිවක් කරන්නේ අපි ගැන හිතලා නොවෙයි,. මේ පාලකයන් මේ මොහොතෙත් වෙහෙසෙන්නේ තමන්ගේ බලය තවදුරටත්, මොනවා හරි කරලා තව ටික කාලයක් එල්ලිලා ඉන්න. විසි එක කියන්නේ මේ තත්වය පරිවර්තනය කරන දිනය. මෙවැනි පරිවර්තනයක් කරන්න නම් අපට නායකත්වය අවශ්‍යයි. මේ රටේ ජනතාව එකතු කරන්න පුළුවන්, මේ රට හදන්න අවශ්‍ය මානව සම්පත එකතු කරන්න පුළුවන්, රටේ ජනතාවගේ හද ගැස්ම තේරුම් ගන්න පුළුවන් නායකත්වයක් තියෙන්න ඕනෑ. ඒ නායකත්ව ගති අනුර සහෝදරයා තුළ තිබෙනවා. මේ සමාජය මුහුණ දෙන බරපතළ අර්බුදයටත්, ඒ අර්බුදය විසඳීමට, ඒ පරිවර්තනයට මෙවැනි නායකත්වයක් අවශ්‍යයි.

රනිල්ට අදාළ නැත්තේ මොනවා ද...?

අපේ මේ උත්සාහය සාමූහික ව්‍යාපාරයක් හැටියට මේ රටේ ජනතාව ඇත්ත ජයග්‍රාහකයන් බවට පත්කරන්න. අපි ඉදිරිපත් වෙන්නේ, තීන්දු තීරණ ගන්නේ කණ්ඩායමක් හැටියට. එහෙම දේශපාලන සංස්කෘතියකට නායකත්වය දිය හැක්කේ, කණ්ඩායමකට ඇහුම්කන් දෙන, හැකියාවන් හා දක්ෂතාවය තිබෙන අය ආකර්ෂණය කර ගැනීමත් ඒ අයව කළමනාකරණය කරන්නත් හැකි අයෙකුට පමණයි. ඒක තමයි නූතන ක්‍රමය.

අලුත් ක්‍රමය සහ නිවැරැදි ක්‍රමය

නායකත්වය කියන්නෙ සියල්ල තමන් අතට  අරගෙන, ඒකාධිපති කෙනෙක් වගේ මා තුළ තමයි සියලුම හැකියාවන් තියෙන්නේ කියන එක නොවෙයි. ඒක පැරණියි. කණ්ඩායමක් හරියට මෙහෙයව ගන්න පුළුවන් එක තමයි අලුත් ක්‍රමය හා නිවැරදි ක්‍රමය. අනුර සහෝදරයා මේ කාලය තුළ ඔප්පු කර තිබෙන්නේ ඒ නූතන  ක්‍රමයට, පුනරුදයට අවශ්‍ය නායකත්ව හැකියාව ඔහු තුළ තිබෙනවා කියන එකයි. මේ පැරණි, දුෂ්ට, ත්‍රාඩ, ආත්මාර්ථකාමී, උද්දච්ච දේශපාලන සංස්කෘතිය අවසන් කරලා, ජනතාව කේන්ද්‍රකර ගත් ජනතාවාදී පාලනයක් ඇති කිරීම තමයි අපේ බලාපොරොත්තුව. පුනරුදය කියන්නේ ඒකට.

අපේ ප්‍රතිපත්ති තුළත්, දේශපාලන සංස්කෘතිය තුළත්, දේශපාලන භාවිතය තුළත් අපේ මූලික අරමුණ වෙන්නේ අපි ගන්න තීන්දු තීරණ, අපි කරන වැඩ ජනතාවට කොහොමද බලපාන්නේ, ජනතාව මුහුණ දෙන ප්‍රශ්නවලට විසඳුම් සොයන්නේ කෙහොමද කියන එක. ඒක තමයි අපේ ප්‍රවේශය. ඒක තමයි අපේ කඳවුරත් අපට විරුද්ධ කඳවුරත් අතර තිබෙන ප්‍රධාන වෙනස. අපේ ප්‍රවේශය තුළ අපට වැදගත් වෙන්නේ මේ රටේ පුරවැසියා. අර කඳවුරට වැදගත් වන්නේ ඒ පාලන පංතිය පමණයි. ඔවුන්ට අනුව ජනතාව කියන්නේ ඔවුන් වෙනුවෙන් නඩත්තු කරන පිරිසක්.

මේ රට අපි සියලු දෙනාට ම අයිතියි

මේ දවස්වල අපේ ප්‍රතිපත්ති එකින් එක එළිදක්වමින් තිබෙනවා. අපේ ප්‍රතිපත්තිවල මූලික දෙයක් තමයි, මේ රටේ කිසිම පුරවැසියෙක් අපි අතහරින්නේ නැහැ කියන එක. කිසිම පුරවැසියෙක් ප්‍රතික්ෂේප වෙන්නේ නැහැ. අපේ ප්‍රතිපත්තිවල මූලික කරුණක් වෙන්නේ මේ රටේ සියලු දෙනා ආමන්ත්‍රණය කරන්නේ කොහොමද, මේ රටේ සියලු දෙනා එකතු කරන්නේ කොහොමද කියන එක. ඒ නිසා තමයි ගැහැනුන් හැටියට වෙනම සංවිධානය වෙලා අපට සුවිශේෂී වූ ප්‍රශ්නවලට විසඳුම් මොනවාද කියලා සාකච්ඡා කළේ. අපිට සුවිශේෂී වූ ප්‍රශ්නවලට අපිට කතා කරන්න පුළුවන් වේදිකාවක් අපි හදා ගත්තේ. එහි ප්‍රතිඵලයක් විදිහට තමයි, අපි සති දෙකකට විතර කලින් මේ රටේ ඉන්න ආබාධිත අය වෙනුවෙන් ප්‍රතිපත්තිය එළිදැක්වූවේ.

ජීවිත කාලය තුළ දී ආබාධයක් ඇති වුණාම සමාජයෙන් කොන් විය යුතු නැහැ. සමාජයෙන් හැළෙන්න බැහැ. සමාජයටත් පවුලටත් බරක් වෙන්න බැහැ. එසේ නොවෙන්න වගකිව යුත්තෙ ආණ්ඩුවයි. අපි ආබාධිත අය වෙනුවෙන් ප්‍රතිපත්තියක් එළිදැක්වූයේ ඒ වෙනුවෙන්. අපේ ආර්ථික ප්‍රතිපත්තිය තුළ, ආර්ථිකයට සියලු දෙනාගේ සහභාගිත්වය ලබාගන්නේ කොහොමද කියන එක අපි විස්තර කරනවා. අපි ඉදිරියට එළිදැක්වීමට නියමිත, අපේ සමාජ ආරක්ෂණය, සමාජ ආරක්ෂණ සුබසාධන ප්‍රතිපත්තිය තුළ මේ රටේ කවුරුවත් අසනීපයක දී සෞඛ්‍ය සේවය ලබාගත නොහැකි තත්වයක් හෝ අධ්‍යාපනයෙන් හැළෙන තත්වයක් ඇති වෙන්නේ නැහැ. මේ රට අයිති අපි සියලු දෙනාට. මේ රට දියුණු වුණාම, පොහොසත් වුණාම එහි ප්‍රතිලාභ අපි සියලු දෙනාටම සමානව ලැබෙන්න ඕනෑ.

අධ්‍යාපනයේ බර අපි බාරගන්නවා

ආණ්ඩුවක් හැටියට මාලිමාව ආණ්ඩුව සමාජ සුබසාධනයත්, සමාජ සංවර්ධනයේ වගකීමත් ගන්නවා. අපි යන බොහෝ තැන්වල කතා කරන්නේ අධ්‍යාපනයේ අර්බුද ගැන; මේ මොහොතේ අධ්‍යාපනය කොච්චර බරක් වෙලාද කියන එක. අධ්‍යාපනය ආස්වාදය ගෙන දෙන එකක් නොවෙන තැනට පත්වෙලා. ඒක කරදරයක්. මානසික පීඩාවක් වෙලා. එසේ සිදුවෙලා තිබෙන්නේ අවුරුදු ගණනාවක් තිස්සේ ආණ්ඩු අධ්‍යාපනය වෙනුවෙන් දැරිය යුතු වගකීම ක්‍රමානුකූලව අතහැරපු නිසා; ඒක දෙමාපියන් මතත්, පවුල මතත් පවරලා තියෙනවා. මාලිමාවේ ආණ්ඩුවක් තුළ අධ්‍යාපනයේ වගකීම දරන්නේ රජය. ඔබත්, දරුවාත් නිදහස් වෙනවා. දරුවන්ට තියෙන්නේ ඉගෙන ගන්න එක. දෙමව්පියන්ට තිබෙන්නේ විශ්වාසයෙන් යුතුව ඒ නිර්මාණය වෙන අධ්‍යාපන පද්ධතියට දරුවන්ව බාරදෙන්න. ගුරුවරුන්ට සිදුවෙන්නේ ඔවුන්ගේ වෘත්තියට නම්බුවක් වෙන විදිහට ඉගැන්නුම් පරිසරය හරියට කරගෙන යන්න. සියලු ක්ෂේත්‍රයන් තුළ ම ඔබ මත පටවා තිබෙන බර ආණ්ඩුවක් හැටියට අපි බාර ගන්නවා.

ඒ වෙනුවෙන් තව දින හතළිස් දෙකයි. ජයග්‍රහණය ගැන කිසිදු අවිශ්වාසයක් නැහැ. මේක සුවිශේෂී ජයග්‍රහණයක් වෙන්න ඕනෑ. ඒ වෙනුවෙන් අපි සියලු දෙනාම ඉදිරි කාලය තුළ වැඩ කරන්න ඕනෑ. මඩ බාල්දි පෙරළෙන්න පුළුවන්. නමුත් ඒවාට අපි යටත්  වෙන්නේ නැහැ. ජනතාව මේ මොහොතේ අරගෙන තිබෙන තීරණය ඒ මඩ ව්‍යාපාරවලින් වෙනස් කරන්න බැහැ. ඒ මඩ ව්‍යාපාරවලට අනුර කුමාර සහෝදරයාගේ ජයග්‍රහණයට කිසිදු හෝ බලපෑමක් කරන්න බැහැ. ඒවාට මුහුණ දෙමින් තව අය එකතු කරන්න ඕනෑ. අපි එකතු වෙන්නෙත් බලය ගන්නෙත් රටක් හදන්න. රට හදන ගමනට සියලු දෙනා එකතු කර ගනිමු. හැමෝම එකතු කරගෙන සැප්තැම්බර් විසි එක්වනදා ජනාධිපති අනුර සහෝදරයාගේ ජයග්‍රහණය තහවුරු කරමු.’’

(සටහන - ජයසිරි අලවත්ත)