සජිත් ප්‍රේමදාස විපක්ෂ නායකවරයාට කිසි දිනක මාලිමා පක්ෂයේ නායක, අනුර දිසානායක පරාජය කරන්න නොහැකි බව
ජනාධිපති රනිල් වික්‍රමසිංහ මහියංගනයේ දී පැවසීය.
හැමදාම පාර්ලිමේන්තුවේ නැගිට ඕපාදූප කතා කර පැය දෙක තුන නාස්ති කළ විපක්ෂ නායකවරයාට අන්තිමට සිදුවුණේ අනුර දිසානායක තර්ජනයක් වීම යැයි ජනාධිපතිවරයා එහිදී කීය.
මෙරට ඉතිහාසයේ සිට තරඟය තිබුණේ දෙන්නෙක් අතර බව කී ජනාධිපතිවරයා, ආණ්ඩුව සහ විපක්ෂය අතර ඒ තරඟය තිබූ බව පැවසීය.
අගමැති ආණ්ඩු පක්ෂය බලා ගන්නා අතර විපක්ෂ නායක විපක්ෂය බලාගත යුතු බව කී ජනාධිපතිවරයා තමා විපක්ෂ නායක කාලේ එලෙස විපක්ෂයේම පක්ෂයකින් කිසිවෙකුත් අභියෝගයට නොආ බව කීය.
දැන් අනුර දිසානායක විසින් සජිත් ප්‍රේමදාස අභිබවා ගොස් ඇතැයි කී ජනාධිපතිවරයා, මේ වන විට සජිත්ට අනුර පරද්දන්නට නොහැකි තත්ත්වයට පැමිණ තිබෙන බව කීය.
සජිත් දැන් කරන මෝඩ වැඩවලින් අනුරට උදව්වක් ලැබෙනු ඇති බව මතක තියාගන්නැයි එක්සත් ජාතික පක්ෂයේ සැමට කියන බව පැවසූ ජනාධිපතිවරයා, තමා මෙහි පැමිණියේ ඩී.එස්.සේනානායක, ඩඩ්ලි සේනානායක , ජේ.ආර් ජයවර්ධන, රණසිංහ ප්‍රේමදාස උරුමය සමග බව කීය.
