COVID-19 සමඟ සටන් කිරීම සඳහා රටේ ණය ගැනීමේ සීමාව ඉහළ නැංවීම අත්‍යවශ්‍ය බව හිටපු මුදල් අමාත්‍ය  මංගල සමරවීර පවසයි.

මාධ්‍ය නිවේදනයක් නිකුත් කරමින් ඔහු එබව සඳහන් කර තිබේ.

එහෙයින්, ණය ගැනීමේ සීමාව ඉහළ නැංවීම සඳහා වහාම පාර්ලිමේන්තුවේ යෝජනාවක් ගෙන එන ලෙස රජයෙන් ඉල්ලා සිටින මංගල සමරවීර හිටපු මුදල් ඇමතිවරයා, ණය ගැනීමේ සීමාව වගකීමෙන් යුතුව වැඩි කරන එවැනි යෝජනාවකට සමස්ත පාර්ලිමේන්තුවම සහාය ලැබෙනු ඇතැයි කියා සිටියි.

ඔහුගේ එම නිවේදනයේ මෙසේද දැක්වේ.

COVID-19 ට එරෙහිව සටන් කිරීම සඳහා ලෝක බැංකු සමූහය විසින් ලබා දී ඇති ඩොලර් මිලියන 128 (රු. බිලියන 24.4) ක ණය ලබා ගැනීම ප්‍රමාද විය හැකිය.

2020 ජනවාරි 01 සිට 2020 අප්‍රේල් 02 දක්වා කාලය තුළ රජය ශ්‍රී ලංකා සංවර්ධන බැඳුම්කර හරහා ඩොලර් බිලියන 650.15 ක් ලබා ගෙන තිබෙන අතර එය චීන සංවර්ධන බැංකුවෙන් ඩොලර් ණයක් ලෙස සහ භාණ්ඩාගාර බිල්පත් සහ භාණ්ඩාගාර බැඳුම්කරවල මූලික වෙන්දේසියෙන් ලබා ගෙන තිබේ.

තවද, මහ බැංකුවේ රජයේ සුරැකුම්පත් සහ මහ බැංකුවේ විවෘත වෙළඳපල මෙහෙයුම් පිළිබඳ වෙනත් දත්ත මගින් අය-වැය හිඟය පියවීමට සැලකිය යුතු සෘජු මුල්‍යකරණයක් සිදු කරයි. මෙය රජයේ ණය ප්‍රමාණයට එකතු වීමෙන් ණය තොගය තව දුරටත් වැඩි වේ.

 

'අනුමත කරන ලද ණය ගැනීමේ සීමාව රු. බිලියන 721 කි'

2020 ජනවාරි 1 සිට 2020 අප්‍රේල් 30 දක්වා කාලය සඳහා 2019 ඔක්තෝබර් 23 දින පාර්ලිමේන්තුවේ යෝජනාවක් මගින් අනුමත කරන ලද ණය ගැනීමේ සීමාව රු. බිලියන 721 කි.

පසුගිය වසරේදී භාණ්ඩාගාරය විසින් 2019 අප්‍රේල්  03 සිට 2019 අප්‍රේල්  30 දක්වා කාලය තුළ බිල්පත් හා බැඳුම්කර බිලියන 194 ක් නිකුත් කරන ලදී. එබැවින් ණය ගැනීමේ සීමාව අතික්‍රමණය වීමට ආසන්න බව තහවුරුවේ.

ණය ගැනීමේ සීමාව ළඟා වූ පසු, රාජ්‍ය ණය නිකුත් කළ හැකි නීතිමය අධිකාරි බලයක් රජයට නොමැත. එහි ප්‍රතිපලයක් වශයෙන්, මෙම අර්බුදය කළමනාකරණය කිරීම සඳහා අවශ්‍ය අරමුදල් රැස් කිරීමේදී රජයට දැරිය නොහැකි අභියෝගයන්ට මුහුණ දීමට සිදුවනු ඇත.

මෙම නෛතික සංකූලතා හේතුවෙන්, COVID-19 ට එරෙහිව සටන් කිරීම සඳහා ලෝක බැංකුව විසින් ලබා දී ඇති ඩොලර් මිලියන 128 (රුපියල් බිලියන 24.4) ක මෘදු ණය ලබා ගැනීම ප්‍රමාද විය හැකිය.

එබැවින්, වසංගතයෙන් පැන නගින මෙම හදිසි හා අනපේක්ෂිත අවශ්‍යතා සැලකිල්ලට ගනිමින්, ණය ගැනීමේ සීමාව ඉහළ නැංවීම සඳහා වහාම පාර්ලිමේන්තුවේ යෝජනාවක් ගෙන එන ලෙස මම රජයෙන් ඉල්ලා සිටිමි.

ණය ගැනීමේ සීමාව වගකීමෙන් යුතුව වැඩි කරන එවැනි යෝජනාවකට සමස්ත පාර්ලිමේන්තුවම සහාය දෙන බව මට විශ්වාසයි.''

 

Apekshakaya

subscribeYT

Cyber Window

නවතම පුවත්